Tâm nkuăl ƀon têh Quảng Ngãi, Thượng tướng Trần Quang Phương, Groi Kruanh Quốc hội ndrel rmôt kan ntoh măt Quốc hội n’gor Quảng Ngãi hŏ geh nar mâp cử tri đah cán bộ mât nau kan ndrel nai nti kon se tâm ntŭk kan ntĭm nti n’gor Quảng Ngãi. Tâm nar mâp, rmôt kan Quốc hội n’gor Quảng Ngãi hŏ mbơh nau tă geh bah rơh rƀŭn tal 6, Quốc hội gưl XV ndrel du đê̆ nau kan bah ntoh măt Quốc hội n’gor.

            Ta aơ, Groi Kruanh Quốc hội Trần Quang Phương njoăl nau lah ueh tât ăp rmôt cán bộ mât nau kan ntŭk kan ntĭm nti ndrel nai nti kon se n’gor Quảng Ngãi yor geh ăp nau rgop têh tâm nau kan ntĭm nti. Groi Kruanh Quốc hội Trần Quang Phương kŏ nkah tât nau khuch ma ma tuý, tâm lơh tâm kon se nti...hŏ geh tâm ntŭk kan ntĭm nti, đă n’gâng kan ân geh nau nkoch trêng, ntĭm mbơh, njrăng, rdâng, mât đăp mpăn ntŭk ntĭm nti:

            ‘Rnôk aơ nau ŭch bah kon se rƀŏng âk nau kan ngăn. Yơn ma mô di lah ăp nê kŏ dơi ƀư nai ôh, kŏ lơi ân nau rêh geh âk nai ma mô geh nŭih kan. Đă nai nti lah nai nti, nai nti ân geh nau blau ngăn. Knŭng geh nŭih blau mơ ntĭm nti nŭih blau, nê lah du nau geh ngăn, mô dơi geh du rmôt nai ntĭm mô blau ma lŏ ntĭm nti ân kon se geh nau blau ôh”.

            Tâm nar mâp cử tri, ăp cử tri lah cán bộ mât nau kan ntĭm nti ndrel nai ntĭm n’gor Quảng Ngãi hŏ geh âk nau đă geh tât nau kan ntĭm nti. Ngăn lah, ăp cử tri tâm ntŭk kan ntĭm nti đă ntop tay rmôt geh nau kơl an tâm nau ntrŭnh 105 bah Chính phủ mpeh nau ntrŭnh hun hao ntĭm nti mầm non, nau ân sa dĭng nar ân kon se ntơm du năm tât 2 năm; nau ân nai ntĭm nti mầm non nti ndop jrâu, n’hao nau ntĭm nau Việt ân kon se rnoi mpôl đê̆...Ăp nai ntĭm đă ơm ƀư prăk khay mhe ân nai nti, đăp mpăn geh prăk khay tâm ban, kơp dơn ntŭk kan ngăn đah nau kan ntĭm nti.

            Âk nau đă Trung ương lŏ kơl an prăk ntuh kơl tă bah ntŭk ntu ngih vâl tâm ăp ngih săm ƀŭt mầm non, phổ thông, ngăn lah tâm nkuăl gôl yôk, tă bah tơm prăk Bôk nau kan bah neh dak ndrel ăp tơm prăk êng bah Trung ương gay ma tŏng dơi nau kơl an ntĭm ndrel nti. Groi Kruanh Quốc hội kơp dơn ăp nau đă mpeh nau kan đah ntŭk kan ntĭm nti, nkre mbơh ăp nau nkol rnôk aơ mra lŏ geh Quốc hội ndrel ăp ntŭk kan Trung ương kơl an doh rklaih.

            Tâm nar mâp cử tri Quận 3 bah rmôt kan ntoh măt Quốc hội nkuăl ƀon têh Hồ Chí Minh jêh rơh rƀŭn tal 6, Quốc hội gưl 15, cử tri kơl an tât nau kan kơt nau ƀư n’gâng kan đô thị, njrăng rdâng nau sa khâm, kơp uănh rnoh geh ban cán bộ...Cử tri Nguyễn Văn Công, Phường 9, Quận 3 rvê nau sa khâm hôm âk. Ăp nau tih kơt Vạn Thịnh Phát đah rnoh prăk mô dơi geh kơp lĕ dôl ƀư nkol nau hun hao bah neh dak. Êng nê rnôk aơ sa khâm dôl geh tâm ăp ntŭk “moh nau kan lŏ geh ân nkhôm”, “ân geh sa”.

            ‘Rnôk aơ nau ma lam dak geh tât sa khâm âk ngăn. Sa khâm tâm ăp ntŭk ndrel sa jru tâm nau mĭn bah âk nŭih. Nŭih ƀon lan nkoch ăp nau kan kŏ ân geh nkhôm, ân geh pă, geh sa, geh prăk ƀư jêng nau rêh mô ueh tâm kon nŭih”.

            Êng nê, cử tri kŏ đă ntŭk kan n’gâng kan rklaih sim mô hôm ân dŏng, rnoh mrô điện thoại ƀư rlăm ăp ntŭk kan n’gâng kanl roh nau đăp mpăn, nau nchih nklă, mhĭng ƀŏ, lir ăp ntil tâm ăp ntŭk...

            Tâm nar mâp, Groi Kruanh HĐND nkuăl ƀon têh Hồ Chí Minh Phạm Thành Kiên mbơh: rơh rƀŭn HĐND nkuăl ƀon têh dăch tât, HĐND nkual ƀon têh mra tâm nchră ndrel mbơh âk nkô̆ nau geh tât nau kan văng sa, rêh jêng, nau kan ntrŭnh ƀư nau mrô 98 mpeh nau rlong ƀư du đê̆ nau kan hun hao văng sa nkuăl ƀon têh Hồ Chí Minh. Geh tât nau ntrŭnh mrô 98, wa Trần Kim Yến, Kruanh Uỷ ban MTTQ Việt Nam nkuăl ƀon têh Hồ Chí Minh mbơh tay:

            ‘Gay ntrŭnh ƀư nau ntrŭnh mrô 98 lah du nau nsôih têh ngăn bah rmôt cán bộ, bah ăp ntŭk n’gâng kan, ntŭk bah nkual ƀon têh, bah ăp Quận, nkuăl, phường, kơp n’ăp ma nau leo lăp kan ndrel nsôih kan bah ăp n’gâng kan, ntŭk kan Trung ương rgop nsum đah nkuăl ƀon têh Hồ Chí Minh. Păng mô di knŭng lah nơm ndâk nau nchrăp ndrel ƀư ma ân geh du Rnâng kan rđau kan, tâm nê Thủ tướng ƀư tơm rđau kan”.

            Êng nau rklaih du đê̆ nau nkol bah cử tri Quận 3, rmôt kan ntoh măt Quốc hội nkuăl ƀon têh Hồ Chí Minh ndrel HĐND Nkuăl ƀon têh kŏ kơp dơn du đê̆ nau đă gay njoăl tât ăp ntŭk kan n’gâng kan rklaih tĭng nau dơi./.