Rƀŏng tât nkah gĭt 120 năm ndâk njêng n’gor Dak Lak, ndrel đah bôk nău kan N’gâng kan Công an dôl ƀư, Ủy ban Mặt trận tổ quốc Việt Nam n’gor Dak Lak lĕ rgŏ jă ndâk ƀư 300 mlâm jay tâm rnglăp kơl ăp rnăk ach o, rnăk jêr jŏt đah jay gŭ ta ntŭk. Ngăn ngên mbơh ƀư ăp nău kan rƀŏng tât mbah rhơn nkah gĭt 120 năm ndâk njêng n’gor Dak Lak, bah khay 3 năm aơ, N’gâng kan Công an lĕ ƀư chôk neh ntơm ndâk nkra, jao an rup gui jay n’hanh prăk ntop kơl ndâk ƀư 1.200 mlâm jay an nuĭh ach o, nuĭh rnoi mpôl đêt, rnăk wâl dơi kơl, rnăk ach o jêr jŏt đah jay gŭ ta n’gor Dak Lak.

Wa Nông Thị Thu, Groi Kruanh Ủy ban Mặt trận Tổ quốc Việt Nam n’gor Dak Lak an gĭt, tât aƀaơ, Mpôl rgŏ jă prăk nkrem “Yor nuĭh ach o” n’gor lĕ rgŏ jă ndâk ƀư geh 352 mlâm jay, dĭng lĕ khlay rlău 23 rmen prăk, rlău trong nchrăp n’gluh an. Ăp ntŭk lĕ jêh n’hanh jao an 225 mlâm jay an nuĭh ƀon lan ơm dơi đăp mpăn gŭ âm tâm ăp jay mhe.