Ta xă Ia Krêl-ntŭk geh rnoh gŭ ur sŏk sai ơm âk ta nkuăl Đức Cơ, năm 2022 kơp dơn 8 nuĭh gŭ ur sŏk sai ơm. Âk oh jêt dôl ta năm hăn nti tât ngih sam ƀŭt lĕ ơm ntlơi nău nti gay tât đah ăp nău ur sai ndal n’hanh âk nău khuch.

Dŭt n’hâm nking n’gang ngăch ăp nuĭh gŭ ur sŏk sai ơm ta ntŭk, bôk năm 2023 xă Ia Krêl lĕ ndâk njêng Ban ntĭm rđău đah nău lăp tâm ban bah lĕ trong chính trị, ntrôl dăng trong kan nkoch trêng an nuĭh ƀon lan wât na nê̆ nău khuch bah gŭ ur sŏk sai ơm, tâm gŭ mô tŏng năm deh yor tih pháp luật. Tă gĭt na nê̆ nu nău ngăn bah ăp thôn ƀon, bah bôk năm tât aƀaơ, xă lĕ rgŏ jă 7 kôp ur sai nău gŭ ur, sŏk sai rnôk mô hŏ tŏng năm. He ndrel djăt ăp nău nkoch bah oh Rơ Chăm H’Thao-xă Ia Krêl, nkuăl Đức Cơ jêh rnôk H’Thao ntlơi ăp nău ŭch bôk năp bah săk nơm mpeh nău mbra ur sai ơm rnôk năm aơ oh mhe tâm năm hăn nti:

“Djăt wa Chắt nkoch trêng mpeh Ủy ban geh mâp âk băl gŭ sai ơm, oh n’hanh bơ̆ hăn ta nĕ âk kônh ôp ndơ lơh sŏk sai ơm. Rnôk nĕ jêh djăt âk kônh lah lơi gŭ sai ơm jêng ntlơi ngăn. Ủy ban nkoch trêng kơt nĕ oh diăt tĭng nău ăp wa ntĭnh jêng oh ntlơi rnôk tŏng năm ri sŏk sai”.

Tĭng wa Rơmah Chắt-Groi Kruanh UBND xă Ia Krêl (nkuăl Đức Cơ), nău nking n’gang gŭ ur sŏk sai ơm dơi đŏng lah, rlău ma trong kan nkoch trêng ƀa ƀơ, na nao gay rgâl nău mĭn, nău ƀư bah ƀon lan ri nkô̆ nău ntrŭnh an nsing tâm ăp nău mbơh ngăn ntơm bah dâng. Yor nê, rmôt cán bộ xă Ia Krêl lĕ geh nău tâm pă na nê̆ an tĭng kruanh thôn, ƀon, nuĭh dơi nsing nơm tâm rnoi mpôl gay ƀa ƀơ uănh, mâp đah tĭng rnăk wâl geh oh, kon tâm rnoh năm deh dơi geh gŭ ur sŏk sai ơm. Wa Rơmah Chắt, Groi Kruanh UBND xă Ia Krêl an gĭt:

“Mât uĕh nău ƀư tơm bah nuĭh nsing nơm, kruanh thôn, ƀon, bí thư chi đoàn, chi hội bu ur rnôk ma mpôl hên dơi gĭt nău mbơh ntơm bah ăp rmôt kan aơ, mpôl hên ƀư hăn mâp rnăk wâl, tâm rgop ăp ban nău kan rgum nu nău mbơh rgŏ jă gay khân pơng dơi gĭt nău gŭ ur sŏk sai ơm. Mpôl hên hăn nkoch trêng rgŏ jă mâp dŭt âk jêr jŏt, an nsrôih bôl bu mô tâm rgop Ban ntĭm rđău lăp tâm jay nkoch trêng rgŏ jă rblang du tơ̆, 2 tơ̆ mô dơi rơh tal 3 tay, nkoch trêng an dơi”.

Bu ur, kon se bu ur lah nuĭh khuch âk ngăn bah gŭ sai ơm, yor nê nău mât ƀư tơm n’hanh nău ngơi bah bu ur rnoi mpôl đêt gay rgâl yor nău rêh bah khân pơng dơi ăp gưl bu ur dŭt uănh khlay.

Ta xă Dun, nkuăl Chư Sê, Câu lạc bộ “Bu ur ngơi mô đah gŭ sai ơm” dơi ndâk njêng ta ƀon Greo Pết tâm khay 4/2023 lĕ wăch rgum rlău 30 nuĭh, bu ur mpeh tâm âk rơh năm râng. Câu lạc bộ đah nău ŭch rgum oh yuh bu ur ndrel ty ƀư nău mbơh “Mô sông nsao ơm, mô tâm gŭ ndrel du rnoi deh”. Bah ntrong kan Câu lạc bộ aơ, âk nuĭh geh nău ŭch gŭ ur sŏk sai ơm lĕ dơi rgŏ jă lôch uĕh.

Dôl uănh ngăn lah nău ntoh bah câu lạc bộ “Bu ur druh ndăm an êng” ƀon Greo Pết, xă Dun lĕ kơl ăp bu ur druh Jarai gĭt đah rmôt kan gay dơi năp nău wât khlay mpeh ur sai n’hanh rnăk wâl, bah nĕ mât uĕh nău ƀư tơm, nău kan bah bu ur druh rnoi mpôl đêt tâm nău jŭt jăng ăp nău way ơm rluk mâl, nsrôih lah mô đah gŭ ur sŏk sai ơm gay geh nău rêh uĕh lơn. Oh Kpah Lan H’Thu-Druh ndăm CLB “Bu ur druh an êng” xă Dun, nkuăl Chư Sê an gĭt:

“Oh mbra mô gŭ sai ơm yor tih pháp luật. Rnôk CLB ƀư nău kan mbra nsrôih râng kơl ăp băl jêr jŏt”.

An gĭt mpeh nău rƀŏng kan bah Câu lạc bộ “Bu ur druh an êng” xă Dun, yuh Rah Lan H’Nhum-Kruanh Rmôt kan Liên hiệp bu ur xă Dun, nkuăl Chư Sê lah:

“Ăp nuĭh mô tŏng năm deh ur sai mhe rlău mpôl hên lĕ nking n’gang 4 nuĭh ŭch gŭ sai, mpôl hên nking n’gang, nkoch trêng, rgŏ jă rnăk wâl mô dơi nsông ơm, an kon sau sŏk sai ơm lah khuch tât săk soan oh kon n’hanh tih pháp luật tay”.

Dơi nking n’gang du hê sŏk sai ơm tâm ban mbra ntop tay du rnăk wâl rklaih luh nău kop ji, ach o ji ngot. Aơ lah nău nsrôih tĭng njoat bah ăp ban, nău kan, nsum mpôl, ƀon lan tâm trong kan nkoch trêng an nău ur sai mô hôm nău rvê, ma mbra lah nău uĕh lăng, hơm răm rnôk sĭt gŭ nsum du jay./.