Trong hăn ngăch Khánh Hoà-Buôn Ma Thuột rlet nkuăl M’drak jong 17 km, yor UBND n’gor Khánh Hoà ƀư tơm ntuh kơl. Rnoh neh rklaih ntrơn tâm lam nkuăl lah 127,1 ha bah 143 rnăk ƀon lan. Tâm nê geh ăp ntil neh tâm ntŭk rklaih ntrơn ntrok tâm geh neh in neh tăm tơm keo, neh tâm 3 ntil bri ndrel tuch tăm. Wa Nguyễn Đức Thảo-Groi Kruanh M’Drak mbơh, tât rnôk aơ, nau kan rklaih ntrơn ntŭk mhe knŭng bư rgâl rgum, ndâk nau dŏng neh, trong rƀŏng, ntŭk ân ndơ, ndŏk, ƀư jêh nau veh trong trích lục, nau kơp drăp ndơ tơm tăm ndrel ƀư mbơh sŏk lơi neh tât nŭih, ntŭk kan geh tâm nkuăl ƀư kan. Rnôk aơ nkuăl ê jao neh sŏk lơi ân ăp rmôt ƀư nau kan. Wa Nguyễn Đức Thảo nkoch tât nau ntrơn pă neh ƀư nau kan:

“Nau nchrăp luh 30/6 ân geh jao jêh 70% neh, yơn lah tât rnôk aơ nau ntrŭnh bư jao neh mô geh kơt nau nchrăp luh. Rnôk aơ nkuăl dôl rgum ntŭk kan ndâk nau ƀư, nau mbơh ăp nau kan gay ma mbơh tât ăp ntŭk kan, êng nŭih geh neh khuch gay ma ƀư trok tâm kơl an trok tâm nau ntrơn ntŭk gŭ gay ƀư nau kan”.

Wa Trương Thanh Tâm-Groi Giám đốc ntŭk kan hun hao rnoh neh nkuăl M’Drak mbơh, nkô̆ nau mbrơi rklaih pă neh gay ƀư nau kan nkra trong hăn ngăch rlet nkuăl lah yor nkol nau ntrŭnh 10/2023 bah UBND n’gor Dak Lak. Nau ntrŭnh aơ mbơh, tơm tăm rgum tâm neh tăm bri bah ƀon lan ân geh sŏk lơi gay ma tăch mplŏ prăk. Nau ntrŭnh rnoh tăch neh trok tâm mhe geh ƀư tâm lơ 30/6, rnôk aơ ê geh nau mbơh ngăn neh in jŏ jong bah ăp ntŭk, ăp rmôt. Gay ƀư nagưch nau pă neh gay ƀư kan, wa Tâm mbơh lah, UBND n’gor Dak Lak ân geh ndal ƀư nau kan ân tâm di ngăn. Wa Tâm mbơh:

‘Nkuăl hŏ đă n’gor ntrơn rgâl nkra nau ntrŭnh mrô 10 tĭng ntrong jêh rnôk trok tâm kơl an ƀon lan geh sŏk ndơ geh tâm mir tăm rgum tăm mô geh kâp ƀư leo tăch rgum. Rnoh trok tâm kơl an knŭng kơp tĭng rnoh prăk ntuh kơl njêng jêng bri, mô kơp rnoh geh jêh aơ. Ntĭm mbơh n’hêl nau kan, nau ƀư, năl rnôk geh sŏk bah rnôk dŏng neh gay ma nsing tâm nau trok tâm ân ƀon lan, ƀư nau nsing ân nau trok tâm ntrơn pă neh ƀư kan”.

Tâm nkuăl Ea Kar, bôk nau kan nkra trong Khánh Hoà-Buôn Ma Thuột hăn rlet geh rnoh jong rlau 13,5km. Trong aơ tâm bôk nau kan rgum mrô 2 ndrel mrô 3. Rnoh neh ntrơn leo gay ma pă ƀư nau kan lah 104,4 ha. Tât rnôk aơ, nau kan kơp hŏ geh 100% nau nchrăp, pă ndrel sŏk lơ 13 nau kan trok tâm đah 69,2 ha, hŏ jao neh geh 50,2 ha ndrel geh 48% rđil đah nau nchrăp geh mbrơi kan. Wa Chu Vĩnh Cường-Giám đốc ntŭk kan hun hao rnoh neh nkuăl Ea Kar đă:

‘Tal bôk năp, đah nau trok tâm ntrơn neh gay ma ƀư nau kan ri hên đă UBND ơm ân ƀư gay ma geh dŏng rnoh mhe ngăn bah rmôt kan kơp năl mpeh nau geh dơi trok tâm. Tal 2, đă n’gor ơm uănh ân ƀon lan geh sŏk tơm si jêh rnôk tăm jêh rnôk geh trok tâm kơl an nau ntrơn neh. Bonh đă ƀon lan jêh rnôk ndơn nau pă trok tâm neh gay ƀư kan ri ơm jao gay ma ntŭk kan jao ân tơm ntuh kơl ơm geh ƀư nau kan”.

Ăp nau jêr nkol kŏ geh du nau nsum nê lah tâm nau ntrŭnh mrô 10/2023 bah UBND n’gor Dak Lak, nau ntrŭnh ƀư rnoh neh trok tâm, rklaih ntrơn mbrơi neh pă ƀư kan, ê geh nau mbơh ntĭm ngăn nar, tơm neh dŏng, kơl an tơm tăm...Nau ntrơn rgâl, geh jao ăp nau doh rklaih nau kan ân geh ơm, gay nau kan trok tâm jao neh ƀư kan ân geh đăp mpăn tâm di nar./.