Đảng viên Đặng Dậu Quý deh năm 1983 ta xã Cư Suê, nkuăl Cư M’gar, tă lôch nti đại học lôch nĕ pah kan ta ngân hàng ta Dak Lak đah rnoh prăk khay âk. Yơn lah, lôch bơi tât 10 năm, saơ nău kan ƀư ta ngân hàng mô tâm di, nô rlu kan gay ma tĭng nău ŭch rŏng pah kan tuch tăm. Ơm geh 1,6ha mir geh mê̆ bơ̆ pă an, ndrel đah rnoh prăk ntêm geh rnôk ƀư ta ngần hàng, nô nănh ntih mât tăm tay lĕ rngôch 800 tơm cà phê lĕ ranh, manh tay prăk ngân hàng tăm tâm breh 300 jrŏng tiu n’hanh bơi tât 100 tơm sầu riêng.

Bôk năp, yor mô geh nău gĭt blău kan, âk tơm sầu riêng, tiu lĕ khĭt jêng tât roh dơm. Mô mĭn rvê, mô plơ̆ rŭch, nô manh tay prăk rnăk vâl, băl mpôl tăm rgâl ăp tơm i khĭt, kơt nti tay nău kan bâh ăp nuĭh way kan tuch tăm dŏng tăm tĭng trong hữu cơ nâp nâl. Rhoăt nău tă gĭt bâh nău mô dơi, lôch nĕ nô ntơm bên đah mir tơm an nău geh âk. Geh nău dơi đah mir tơm, nô nănh ntuh kơl pơk hvi tay nău kan ƀư mir ươm ntil tơm. Êng tâm năm 2022 mhe nơh, mir tơm ăp ntil ndrel đah nău tăch ntil lĕ an geh rlău 600 rkeh prăk. Nô Đặng Dậu Quý nkoch.

“Đah nău kan lah đảng viên, he gĭt nău kan nơm lah an geh hăn lor tâm nău pah kan hun hao wăng sa, n’hanh geh hun hao ueh rĭ mơ dơi geh kơl an rnăk vâl n’hanh kơl an nuĭh êng. Kơt năm mhe nơh, gâp geh 6 tấn sầu riêng tăch geh rlău 300 rkeh, 2 tấn tiu tay lah an nău geh 120 rkeh n’hanh kơp tay mir ươm ntil, cà phê tay geh rlău 100 rkeh prăk đŏng. N’hâp lĕ ăp rnoh ntuh kơl, rnăk vâl geh rlău 300 rkeh prăk đŏng”.

Đảng viên Võ Văn Hoàng 64 năm deh, ta xã Ea Tu, nkuăl ƀon têh Buôn Ma Thuột đah nău nsrôih, gơih nđơr n’hanh âk nău tâm rŏng. Deh luh ta n’gor Quảng Ngãi, lôch nĕ tĭng mê̆ bơ̆ gŭ ta Dak Lak nti nău kan bâh ta năp rklaih đăp mpăn 1975. Nău pah kan jan sa, rlet rlău âk nău ŏ r’ah jêr jŏt đah âk nău mô dơi lôch nĕ mơ geh dơi. Aƀaơ, lôch âk năm pah kan, wa geh 5 ha mir tăm sầu riêng tâm breh đah du đê̆ tơm sa play kơt lah măng cụt, cam, quýt, play bŭng...Lĕ nău geh bâh ƀư mir ăp năm klâp ma 4 rmen prăk, n'hâp lĕ prăk kan wa hôm nha geh rlău 2 rmen prăk. Geh nău dơh nơih tâm nău pah kan jan sa wa way kơl an ăp rnăk jêr jŏt manh prăk, tơm ntil, phân poh n’hanh nău rnă njrăng tâm ban kơt rdâk njêng nkual ƀon lan mhe ta ntŭk. Wa Võ Văn Hoàng nkoch.

“Lah đảng viên ta ntŭk rĭ he an geh hăn lor tâm nău pah kan jan sa hun hao, bah nĕ ƀon lan ƀư tĭng. He gĭt pah kan rĭ nkoch an ƀon lan, ntĭm kơl an ƀon lan ndrel an hun hao. Bar pe năm ƀư mir ươm, saơ ăp rnăk i jêr jŏt rĭ he kơl, rnăk jêr jŏt đê̆ rĭ tăch an bu đor, hôm ăp rnăk ma jêr jŏt ngăn rĭ gâp an dơm, êng đah ăp rnăk mô geh ngih jay gŭ rĭ kơl ƀư jay tâm pêt tâm rŏng rĭ gâp tâm rgop kơl an du rnăk bâh 5-10 rkeh prăk đŏng, tĭng nău rêh bu. Gâp lĕ tâm rgop ƀư trong hăn, rgŏ jă ƀon lan thôn 3 ƀư lĕ ăp trong hăn tâm thôn ƀon”.

Wa Lại Thị Loan- kruanh Hội nông dân n’gor Dak Lak uănh rnê, dŭt âk ăp đảng viên lĕ mpơl nău kan hăn bôk năp tâm nău pah kan jan sa hun hao wăng sa. Ăp nuĭh kan ndrel kơt Đặng Dậu Quý mô lah Võ Văn Hoàng lah ăp nuĭh đảng viên hăn ba năp, ƀon lan tĭng ba kơi”, lah ăp nuĭh ntoh lư tâm nău kan njêng nău trĕ lam tâm nău hun hao jut jăng ach o ta ntŭk. Wa Lại Thị Loan an lah, gay ma nău kan hun hao wăng sa jut jăng ach o bâh ntŭk kan ăp nar lơ ma têh dăng lơn, rnoh đảng viên tâm ntŭk kan ăp nar lơ ma âk lơn, tâm rnôk let năp tay ntŭk kan dŭt mât uănh khlăy nău kan hun hao đảng viên, njêng bôk nău kan gay ma ăp nar geh ntoh luh âk lơn tay ăp nuĭh ntoh ang đảng viên ntoh lư.

“Mpôl hên dŭt uănh khlăy tâm nău mbơh tơih nuĭh ntoh lư gay ma nglăp lăp đảng. Tâm ăp nău nchrăp kan na nê̆, rĭ ndrel đah ăp ntŭk kan êng, mpôl hên geh ăp nău nhcrăp kan na nê̆ kơt lah đă ăp đảng viên, ăp chi hội kruanh ntĭm leo ăp nuĭh ƀon lan gĭt blău gay ma nti tay, kơl an, lah saơ tâm di rĭ nglăp đảng gay ma ăp nuĭh aơ geh lăp ta ntŭk kan đảng”.

  Mô dơn ngăch ngăr tâm nău pah kan jan sa blău, ăp đảng viên kơt nô Đặng Dậu Quý mô lah nô Võ Văn Hoàng hôm nha dŭt nsrôih tâm nău pă kan, mbơh nău tă blău kan, kơl âk nuĭh kan ndrel geh nău rêh jêr jŏt ndrel hun hao pah kan jan sa, n’hao nău geh, đăp mpăn nău rêh jêng, nsrôih tâm rgop âk ta nău kan rdâk njêng nkual ƀon lan mhe ta ntŭk.