Tâm lơh bu ur bu klô n’hanh tâm lơh rnăk wâl ta lam dak lah nsum, ta nkual rnoi mpôl đêt lah êng, lah nău nkoch mô geh nău ơm. Nău aơ dôl ntrôl dăng du gâl bu ur rnoi mpôl đêt nar lơ jêng geh nkhah êng, hŭch âk tâm rnôk nău rêh jêng geh âk nău rgâl n’hanh hun hao kơt aƀaơ. Aơ lah ngoăy tâm âk nkô̆ nău ăp ntŭk mât ntrong kan “ntŭk tât nsing nơm” đah nău ŭch ngăch n’hŭch khuch bah tâm lơh tâm ta bu ur bu klô ntơm bah gưl ntŭk gŭ rêh tă bah nău pă an rhŏ ntop kơl ndal an nuĭh geh lơh dông tĭng nkô̆ nău bu ur bu klô geh: du dêr, mât uănh dak si, mbơh ntĭm/ôp ntĭm nău mĭn, mbơh ntĭm pháp luật di, ntop kơl trơn gưl bah lơ (rnôk ŭch); Wăch rgum geh tât râng n’hanh n’hao nău wât bah nuĭh ƀon lan ta ntŭk tâm njrăng n’gang n’hanh rdâng đah tâm lơh ta bu ur bu klô; đăp mpăn nău tâm rgop đah ăp ding geh tât tâm ntop kơl nuĭh rmanh bah tâm lơh ta bu ur bu klô, jêng rmôt pah kan kơl ƀư kan tâm ban bu ur bu klô ta ntŭk.

Ta Lào Cai, bah bôk năm 2023 tât aƀaơ, rmôt bu ur ăp gưl n’gor Lào Cai ndâk njêng mhe 2 năm “Ntŭk tât nsing nơm ta ntŭk gŭ rêh” ta nkuăl têh Nông Trường Phong Hải, nkuăl Bảo Thắng n’hanh xă Thẳm Dương, nkuăl Văn Bàn đah rlău 40 nuĭh tât râng. Aơ lah 2 ntrong kan yor Hội Liên hiệp Bu ur n’gor ntĭm rđău ƀư rlong lor lvang 2021-2025.

Tĭng trong nchrăp bah UBND n’gor Lào Cai mpeh mbơh ƀư tâm ban bu ur bu klô n’hanh mkra ăp nău khlay đah bu ur n’hanh kon se ta ntŭk, tâm lvang 2021-2025, lam n’gor nâp nâl, n’hao uĕh mô lah ndâk njêng mhe 48 ntŭk tât nsing nơm ta ntŭk.

Ta Bình Định, ntrong kan “Ntŭk tât nsing nơm ta ntŭk gŭ rêh” ntop kơl bu ur n’hanh kon se geh lơh dông tâm rnăk wâl lĕ dơi mbơh ƀư n’hanh ntơm lĕ nsĭt săk rnglăy uĕh ngăn. Aƀaơ ntrong ƀư “Ntŭk tât nsing nơm ntŭk gŭ rêh” ntop kơl bu ur n’hanh kon se geh lơh dông tâm rnăk wâl lĕ dơi mbơh ƀư ta 5 nkuăl: An Lão, Vân Canh, Vĩnh Thạnh, Hoài Ân, Tây Sơn. Ntrong ƀư aơ dôl nar lơ rgop n’hao wât bah ntŭk gŭ rêh ƀon lan gŭ tâm nău ƀư njrăng n’gang n’gang lơh dông ta rnăk wâl, lơn lah mât njrăng oh yuh bu ur, ăp nuĭh mô lap tâm nău rêh jêng. Wa Hoàng Thị Thanh Nhã, Groi Kruanh Hội LHPN n’gor Bình Định an gĭt:

Nău rƀŏng bah ntrong ƀư aơ gay kơl an mpôl nuĭh bu ur n’hanh kon se rnôk geh nău lơh dông tâm rnăk wâl ri geh du ntŭk gay du dêr. Geh du ntŭk gay khân pơng tâm nkoch, rblang ăp nău ma khân pơng ŭch kơl, ŭch ntop kơl.

Ta Lai Châu, Wa Nguyễn Thị Thủy, Groi Giám đốc N’gâng kan Lao động, Thương binh n’hanh Xã hội n’gor Lai Châu an gĭt: Đah bôk nău “Đăp mpăn nău rêh jêng, n’hao nău dơi n’hanh nta an bu ur n’hanh kon se bu ur, gay ƀư tĭng tâm ban bu ur bu klô n’hanh jŭt jăng tâm lơh tâm dông ta bu ur”, UBND n’gor Lai Châu lĕ an trong nchrăp ƀư tĭng trong kan lam dak tâm ban bu ur bu klô nkual rnoi mpôl đêt n’hanh nkual yôk lvang 2022-2030 gay rgum êp tâm ƀah bu ur bu klô, nta an, geh dơi an bu ur n’hanh bu klô nuĭh rnoi mpôl đêt râng, dơi geh tâm ban tâm ăp ntil nău chính trị, nău rêh, văn hóa n’hanh hun hao wăng sa, rgop an nău hun hao nsum bah n’gor:

Tâm lvang tât n’gor mbra rgâl âk ntil ăp trong nkoch trêng, tâm nĕ uănh khlay ta ngih sam ƀŭt, doanh nghiệp, ntŭk ƀon lan gŭ rêh, ngăn lah rƀŏng tât nkual rnoi mpôl đêt, ăp ntŭk ma nău wât bah nuĭh ƀon lan hôm e đêt mpeh trong kan tâm ban bu ur bu klô. Mpôl hên mbra mbơh ƀư geh săk rnglăy ăp ntrong kan, nĕ lah “ƀon lan dăch dêh n’hanh đăp mpăn đah kon se bu ur”, “ngih sam ƀŭt đăp mpăn, dăch dêh mô tâm lơh tâm dông”, “ntŭk tât nsing nơm, jay du dêr ta ntŭk gŭ rêh”. Lơn lah, mpôl hên hun hao tay n’hanh pơk hvi ntrong ƀư “nking n’gang n’hanh n’hŭch nău khuch bah tâm lơh tâm ta bah dâng”.