Ôi 12/12, Mpôl đại biểu Quốc hội n’gor Gia Lai ƀư Rƀŭn nchră mâp nuĭh ƀon lan jêh rơh rƀŭn tal 6, Quốc hội khóa 15 ta xă Ia Hrú, nkuăl Chư Pưh. Ta rƀŭn nchră, jêh rnôk djăt đại biểu quốc hội mbơh ăp săk rnglăy tâm rơh rƀŭn mhe rlău, nuĭh ƀon lan ta xă Ia Hrú, nkuăl Chư Pưh, n’gor Gia Lai nkoch nău răm rhơn ta năp lôch uĕh bah rơh rƀŭn tal 6, Quốc hội khóa 15.

Nuĭh ƀon lan uănh lah prêh nuih n’hâm nău kan bah ăp nuĭh đại biểu Quốc hội n’gor Gia Lai lĕ geh âk nău rgop khlay tâm nău lôch uĕh bah rơh rƀŭn. Ta nar mâp, nuĭh ƀon lan dăn đă âk nău hôm e nkân ta ntŭk, kơt: trong thôn ƀon ta thôn Tong Yong jŭr djơh, djơh hô; rnoh khlay điện tăch an nuĭh ƀon lan ta thôn ƀon lah mô hŏ tâm di; an uănh lơn tâm nău nchrŏng trong rgâl ntil tơm tăm, mpa rong n’hanh đăp mpăn ntŭk tăch an ăp ndơ lŏ mir khlay; lơn lah, nuĭh ƀon lan ji nuih mpeh trong mkra sam ƀŭt pă an kơp dơn neh ta ntŭk kân, jŏ jong...