Đảng viên A Don, groi kruanh HĐND xã Đăk Trăm, nkuăl Đăk Tô lah du nuĭh ntoh ang kơt nĕ. Dơi geh Đảng ủy xã đă sĭt sinh hoạt đah Chi bộ thôn Đăk Rô Gia, đồng chí A Don lĕ njêng rmôt kan tâm kơl tăm tao Y Du lôch nĕ tâm rgop kan, ký ton nău kan đah công ty Cổ phần ƀư sĭk Kon Tum njêng dâng lŏ tăm tao têh aơ.

Ơi đồng chí A Don, dơi gĭt bâh bar pe rnăk ƀon lan đah rnoh neh tăm bôk năp mô nă âk, rlău 2 năm njêng, rmôt kan tâm kơl tăm tao Y Du yor A Don ƀư kruanh lĕ geh rlău 150 rnăk ƀon lan tât râng n’hanh njêng geh nkual tăm tao hvi rlău 35 ha ta xã Đăk Trăm. Đah nău kan lah groi kruanh HĐND xã Đăk Trăm, sinh hoạt ta chi bộ thôn Đăk Rô Gia, mơh nău ƀư an đồng chí mbơh tơih, rgŏ jă ƀon lan tât râng ta rmôt kan ndrel gay ma tăm tao mêh?.

Năp lor, săk gâp nơm saơ nău rêh bâh ƀon lan tâm xã dŭt jêr jŏt, âk rnăk ê hŏ gĭt pah kan jan sa jêng lah gâp saơ dŭt yô̆ nđach n’hanh an geh nău kan lah kơl an ƀon lan, njêng rmôt kan ndrel, gâp dâk lor ký tâm ton kan đah lĕ rngôch ăp công ty, ăp doanh nghiệp gay ma mât đăp mpăn ntŭk tăch tao an ƀon lan. Bâh geh nău kơl bâh công ty, gâp n’hanh ƀon lan lĕ ntrŭnh njêng rmôt kan ndrel, rgŏ jă âk ƀon lan n’hanh ƀư nuĭh kan ndrel tăm tao, yorr đah nău kan tăm bum, tăm ba rĭ tăm tao geh âk lơn. Ƀư du yan tao mbra geh dŏng 3-4 năm ba kơi, nău geh âk lơn đah tăm bum, ba. Mpeh đah công ty lĕ nta nău dơh nơih kơl an ƀon lan manh ntil, phân, tât yan sreh tao ƀon lan mơ trok an mpeh công ty”.

Rơh bôk năp nău rgŏ jă ƀon lan tât râng ta rmôt kan tăm tao aơ rĭ geh nău jêr đŏng n’hanh đồng chí mhâm ƀư gay ma ƀon lan djăt tĭng ndrel ƀư mêh?

Bôk năp gâp rgŏ jă ƀon lan, geh mâp âk nău jêr đŏng, nău jêr bôk năp, mpeh nău nkoch rêng gay ma ntĭm an ƀon lan nău tăm, ƀon lan hôm wĭ wĕ yơn lah rnôk njôt ti nti kan” bâh geh cán bộ khuyến nông jŭr nti nău kan rĭ mơ ƀon lan gĭt vât. Gâp lĕ tât ta ăp rnăk vâl, ntĭm ƀon lan mpeh kĩ thuật tăm tao, lôch nĕ gâp mbơh rblang an ƀon lan gĭt lah bâh geh tăm tao rnăk vâl geh mbơm oi, geh prăk rvăt ndeh, ƀư jay. ƀon lan saơ gâp tăm tao geh kơt nĕ rĭ ƀon lan djăt tĭng, ƀư tĭng gâp kan. Rmôt kan ndrel hên geh 153 nuĭh, lĕ rnoh neh tăm tao ta lam xã aƀaơ lah 35 ha.

Yan sreh tao mhe nơh rnoh tao geh bâh rmôt kan ndrel dĭng âk geh eh?

Yan bôk năp ƀon lan geh sreh tao klâp ma bâh 60-80 tấn/ha tao yan mhe tăm, đah tơm tao sreh yan tal 2, tal 3 rĭ geh bâh 80 tât 100 tấn/1ha, geh klâp ma 70-90 rkeh prăk, n’hâp lĕ prăk kan ƀon lan hôm nha geh bâh 50 tât 70 rkeh prăk. Gâp saơ ƀon lan tăm tao geh âk lơn, công ty ký tâm ton kan rvăt tăch ndơ tăm, mpôl hên geh bảo hiểm lah 850 rbăn jêng lah ƀon lan mô hôm rvê nău mĭn lah geh âk yơn tăch mô khlăy mô lah geh rnoh khlăy ma tao mô jêng. Yơn lah ƀon lan nsrôih kơt nti, nsrôih pah kan rĭ mơ geh âk. Lah ƀư tĭng di nău ntrŭnh kĩ thuật bâh công ty rĭ mbra geh âk lơn, nău geh mbra âk lơn, ƀon lan geh rnoh prăk rmeh gay ma trok rnon.

Nău ngăn pah kan tăm tao rđil đah ăp ntil tơm tăm êng ma ntơm nơh ƀon lan lĕ tă mât tăm rĭ đồng chí saơ nău geh bâh tao mhâm mêh?

Nău tăm tao lah rđil đah ăp ntil tơm êng rĭ geh âk lơn. Na nê̆ tăm tao 1 yan rĭ tâm năm mbra geh sreh mbro bâh 4-5 năm ba kơi. Hôm tăm bum rĭ tăm du yan kanŭng rôk 2 tơ̆, lôch nĕ lah he tăm tơm mhe. Bôk năp , công ty kơl prăk ƀư neh, tal 2 công ty kơl prăk rgâl tơm tăm, tal pe công ty rdeng bâh ntŭk tăm tât công ty, tal poăn, công ty an ƀon lan manh tơm nti, phân poh, tât yan sreh tao rĭ ƀon lan trok rnon ntil, phân bâh công ty”.

Gay ma ƀon lan kơt nti, ƀư tĭng rĭ đồng chí saơ nău kan bâh nuĭh đảng viên kơt đồng chí tâm ban kơt ăp đảng viên êng tâm chi bộ thôn Đăk Rô Gia mhâm mêh?.

Gâp lah nuĭh đảng viên, gâp an hăn lor bôk năp. Bâh trong pah kan wăng sa, an tât nău rêh tâm rnăk vâl an hăn lor bôk năp. Bâh nĕ ƀon lan văr nĕ saơ nău ueh, nău di bâh gâp rĭ ƀon lan mbra kơt nti, ƀư tĭng. Mhâm he ngơi rĭ he an geh ƀư kơt nĕ, pah kan jan sa an geh săk rnglăy, mhâm ƀư an geh ntil ndơ na nê̆ rĭ ƀon lan mơ geh djăt n’hanh ƀư tĭng.

Bâh nău dơi bâh rmôt kan tăm tao kơt nĕ, đồng chí mơh geh nău nchrăp kan tâm nău  kuăl jă tay ăp nuĭh kan ndrel lah ăp nuĭh ƀon lan tâm ƀon Đăk Rô Gia tâm ban kơt ăp ƀon êng tât râng tăm tao tâm ban kơt lah pơk hvi tay du đê̆ nău pah kan jan sa ăp ntil tơm tăm êng mêh?.

Săk gâp nơm way dŭt kơl an ăp nuĭh kan ndrel, yor ƀon lan he ê hŏ gĭt pah kan jan sa. Gâp way nsrôih rgŏ jă ăp nuĭh kan ndrel, mbơh an ƀon lan gĭt, gay ma ƀon lan vât yor nău geh bâh nău kan lăp ta rmôt kan ndrel, ăp nuĭh kan lah geh nău nsrôih mbra geh nău geh âk, nkre lah he an geh ƀư pơk hvi nău kan, mbra tăm bâh 30-40 ha tao, klâp lah ăp nuĭh kan ndrel mbra geh tay nău rêh đăp mpăn lơn”.

Dăn lah ueh đồng chí A Don mpeh nău tâm ngơi aơ.