Dâk leo lor bôk năp tâm trong wăng sa, ntlơi ăp nău way ơm rluk mâl n’hanh ndrel tâm pă đah ƀon lan ƀon tơm, đảng viên Pờ Lò Hừ hŏ geh nuih n’hâm nsing nơm âk đah ƀon lan. Gay aƀaơ, ƀon lan ach o La Hủ ntŭk bôk tu dak me sông Đà, mpeh xã n’har bri Pa Ủ, nkuâl Mường Tè (Lai Châu) hŏ ntrôl dăng ƀư njêng nsan hao klaih rlău ach o.

Mâp nô Pờ Lò Hừ  ta neh nsoh kalơ yôk. Nô mô ru kol hăn tiăp ndrôk rpu. Bah nău kuăl n’gloh lam bri bah nô Pờ Lò Hừ, ndrôk rpu mpôl n’hoch sĭt tât ta ndrĭch yôk lưn. Ăp mbăt boh sui mbrach lah ndrôk mpôl wăch âk lơn.

 Deh luh n’hanh têh jêng ta me neh jêr jŏt ta bản Chà Kế, rlău 10 năm deh nău rêh ntrơn du tĭng mir tĭng ba, hŏ ndu rnăk Hừ tât đah me neh Pha Bu, ngai đah ƀon tơm rlău 60km. Năm kon se bah Hừ tâm ban kơt nuĭh ƀon lan La Hủ êng ƀa ƀă ta aơ rlău ăp nar khay tĭng me bơ, u che nar aơ ta aơ ôi tay ta ri hăn bri dak joi sa da dê. Rơh mô đăp mpăn lah nkô̆ jêng tât rnoh âk ach o bah nuĭh ƀon lan La Hủ dŭt âk tâm 54 rnoi nuĭh oh nô lam dak. Nô Pờ Lò Hừ nkoch:

        U che ri roh ơm, hôm bơ̆ lah kon dŭt rnôk nê hôm jê̆, mô gŭ ta ntŭk  ma hăn lêng lang jêng jêr jŏt. Gŭ ntrơn du tĭng mir tĭng ba nău rêh krit jêr ngăn, wăng sa jêr jŏt đŏng, ntop đah  mô tŏng geh ndơ sa. Hôm aƀaơ hŏ rgâl âk hôm, gŭ ta ntŭk n’hanh đăp mpăn. Nsrôih wămh sa gay hun hao, hôm aƀaơ Ngih dak kơl ƀon lan ƀư gung trong rsong hăn đăp mpăn hôm đŏng, ăp ntil ndơ wăng sa dơh lơn đŏng.

        Ta năp ăp nău jêr jŏt mpeh ntŭk gŭ sop nkăp, trôk nar djơh, rnăk wâl jêr jŏt tâm ban kơt rnoi nuĭh he, lah đảng viên, bí thư chi bộ nkre ƀư kruanh bản, Pờ Lò Hừ joi ôp joi, kơt nti gay rdâk wăng sa rnăk wâl. Lôch âk năm đăp dêh, tât aƀaơ tâm 43 năm deh Hừ hŏ geh drăp ndơ hang rmen prăk, đah ndrôk rpu mpôl rlău 100 mblâm, bar pe jât ha quế, sa nhân, thảo quả, sâm...:

        Lăp Đảng nar lơn ma gĭt wât lơn, hôm ntop đah sinh hoạt ăp khay ri nkre nkoch trêng, nkre kơt nti tâm kơl nsum ƀon lan nar lơn ma rhơn nđơr. Lah bí thư chi bộ, bôk năp lah ân gĭt ntĭt leo lor an ƀon lan gĭt wăng sa kơt mât rong, tăm ăp ntil tơm sa play, tơm geh rnoh khlay. He mô ntĭt leo lor an kônh wa ƀon lan ri ƀon lan lơn ma jêr jŏt. Mô gĭt wăng sa, kônh wa mô gĭt mĭn rvê, bôk rngok mô sol ang.

        Mô dơn rvê an săk nơm n’hanh oh nô băl mpôl, đah nău dơn kan bah nuĭh đảng viên, âk năm aơ Pờ Lò Hừ hôm kơl rhiăng rnăk nuĭh ƀon lan tâm bản, tâm xã. Mô dơn nta joi geh nău kan mbro an 5 nuĭh kan n’hanh nău kan tât khay klêh donh an 30 nuĭh kan, ăp năm ăp rnăk ji ngot tât ntŭr Hừ an ba, an phe; rnăk mô geh tơm prăk n’hanh nău tă ơm gĭt kan păng an manh dơm prăk, hôm ntĭm nti trong wăng sa đŏng. Nuĭh mô geh, moh ndơ ŭch nô kơl  ndơ nê, aƀaơ Hừ hŏ geh nău nsing nơm bah nuĭh ƀon lan ƀon tơm he nơm: Yuh Ly Mò Nu, nuĭh ƀon lan ta bản Pha Bu, xã Pa Ủ rhơn nkoch: Nơm geh bí thư chi bộ Hừ kơl wăng sa, lôch âk năm krit ji ngot, aƀaơ rnăk gâp hŏ klaih rlău ach o. Nău rêh mô hôm jêr jŏt kơt ntơm nơh đŏng ôh jêng ăp oh kon he dơi an nti rplay siƀŭt uĕh lơn đŏng. Mô dơn geh rnăk hên dơm ôh, ma âk rnăk tâm bản tâm nkual dơi ntop kơl đŏng, jêng nău rêh ăp tŏng lơn rlău  ntơm nơh. Kônh wa tâm bản dôl dŭt rhơn nđơr.

        Dâk hăn  lor tâm trong hun hao wăng sa, mir, yôk, bri ta ntŭk, âk năm rlău aơ đêt nuĭh gĭt lah tâm ƀon lan La Hủ ta xã n’har bri Pa Ủ hôm geh du hê “nuĭh ndrŏng jâng plat”. Ntơm bah trong ntĭt leo wăng sa têh hvi bah bí thư chi bộ, kruanh bản Pha Bu Pờ Lò Hừ, tât aƀaơ ta xã Pa Ủ hŏ ntoh âk trong ntĭt leo êng ƀa ƀă ta bản Thăm Pa, Nhú Ma, Ứ Ma, Xà Hồ, Mu Chi... Nkoch mpeh nău khlay bah đảng viên Pờ Lò Hừ ta ntŭk, wa Phạm Hồng Bình, Groi Bí thư Đảng ủy xã Pa Ủ, nkuâl Mường Tè an gĭt:

        Đah ăp ntŭk jêr jŏt, nău rêh kônh wa hôm đêt nău tâm gĭt êng tâm ban kơt nău dơi hun hao, ăp nuĭh ntoh lư kơt aơ dŭt di ma uănh khlay. Ăp nuĭh nê nkre lah nuĭh gŭ na nê̆ ta ntŭk, nkre lah nuĭh tâm ƀon lan rnoi mpôl đê̆ hŏ geh nsing nơm đah  ƀon lan. Ma nău kan na nê̆ bah ăp nuĭh nê hŏ jêng ring tam n’hanh lah nuĭh ntĭt leo lor gay nuih n’hâm gơih nđơr, n’hanh tâm  kơl, rgŏ jă kônh wa ƀon lan ta ntŭk kơt nti n’hanh ƀư tĭng, kơl an jâng wăng sa- rêh jêng kon nuĭh bah xã tĭng kơn dơi n’hao geh.

        Pa Ủ tă dơi gĭt tât lah nkual glo tơm ach o bah n’gor Lai Châu, geh rnôk rnoh ach o âk tât 95%. Ndrĭ yơn, nơm geh ăp đảng viên lor pơk trong klaih rlău ach kơt Pờ Lò Hừ, aƀaơ rnoh rnăk ach o ta ntŭk hŏ hŭch jŭr hôm rlău 77%. Ăp nău kan an ƀon lan nê hŏ dơi nchih nkah, rnôk rnăk nô lah 1 tâm 8 rnăk geh nău dơi ntoh lư tâm Kơt nti n’hanh ƀư tĭng nău mĭn, nuih n’hâm, trong gŭ rêh Hồ Chí Minh năm 2023, dơi Ban Tuyên giáo Tỉnh ủy Lai Châu dăn đă Kruanh UBND n’gor pă an Bằng khen./.