Wa Phan Thị Sương, ngih ta Thôn 1, xã Ia Tơi, nkuăl Ia H’Drai, n’gor Kon Tum mbơh: 2 hê ur sai yuh ƀư công nhân cao su, geh prăk khay. Manh prăk ngân hàng tĭng rnôk, du tŏ geh 150 rkeh, nô yuh ntuh kơl rong ndrôk, jêh ri tăm 2,5 ha cà phê, rlau 3 ha tơm sa play...Rnơm nê ăp năm nkŭp rnon tâm rnăk vala yuh hôm geh ntơm 250 tât 300 rkeh:

‘Rnăk hên dŭt jêr ngăn, yơn hôm manh prăk bah ngân hàng gay ma rvăt ndrôk rong gay ân văng sa hun hao. Rnơm geh tơm prăk ngân hàng ân manh rong ndrôk, manh prăk pă kan pah gay ma ntuh kơl tăm tơm sầu riêng, tơm cà phê, tơm sa play tât rnôk aơ văng sa bah hên geh âk nau ueh ngăn, hao đŏng. Lah kơt mô geh tơm prăk bah ngân hàng chính sách đah ma nau kơl an bah nkuăl ta aơ tât nau rêh ƀon lan ri hên mô geh ndơ kơt rnôk aơ ôh”.

 Lah nkuăl n’har bri bah Kon Tum, nau hun hao văng sa, rêh jêng, n’hao nau rêh ân ƀon lan lah nau tơm tâm nau kan geh ăp gưl uỷ Đảng, n’gâng kan nkuăl Ia H’Drai kơl an ƀư lor. Nau kơl an nŭih ƀon lan geh manh prăk hun hao văng sa, âk rnăk ach o, êp ach o bah nkuăl gay ma hun hao tuch tăm ndrel nau rêh. Wa Đinh Văn Trung, Giám đốc ntŭk ƀư kan Ngân hàng chính sách xã hội ntŭk kan bah nkuăl Ia H’Drai, mbơh:

‘Tơm prăk manh bah chính sách xã hội hŏ pă geh rlau 20 rbăn rnăk ach o ndrel nŭih geh kơl an manh, đah rnoh manh rlau 173 rmen prăk. Ndơn geh nau kơl an tơm prăk aơ bah ăp rnăk ri hên rnơm ngăn ntuh kơl tăm tơm si, mpa rong đah neh ntu aơ. Ntơm bah prăk manh ăp rnăk ƀư nau kan tuch tăm, tăch rgâl leo săk geh văng sa âk”.

Tâm Gia Lai, ntơm bah bôk năp tât rnôk aơ, hŏ geh rlau 13 rbăn rnăk geh rnoi mpôl đê̆ geh manh prăk. Tơm prăk kơl ndâk nau kan, n’hao nau rêh ân kônh wa tâm nkualư hôm jêr. Rnăk nô Đinh Văn Hiơp, ta Tổ dân phố Plei Dơng, nkual têh Kông Chro, nkuăl Kông Chro bah năp nơh lah rnăk ach o. Jêh 3 năm geh manh 40 rkeh tă bah Ngân hàng chính sách xã hội gay ma tuch tăm, mât rong, rnôk aơ ndrôk ngih nô geh 9 mlâm. Râm rnoh aơ geh 6 mlâm geh deh ntơm bah 3 mlâm me. Nô rnơm jêh aơ rnăk păng mra geh âk lơn:

 ‘Bah năp nơh tăm ba, jêr ngăn, gâp nsôih rong ndrôk. Lap lah gâp manh geh 40 rkeh, 40 rkeh rong 3 mlâm ndrôk, hôm 5 rkeh nkra ndrung. Nau mât rong nar lơn ma geh oi, hên tăm pih ân ndrôk sa ân nâp nâl đŏng”.

 N’gor Gia Lai rnôk aơ geh 38.500 rnăch ach o, geh 90% tâm rnoh aơ lah rnoi mpôl đê̆. Tâm 6 khay năm 2023, Ntŭk kan Ngân hàng chính sách n’gor Gia Lai manh 964 rmen đah 25 rbăn rnăk, tâm nê nŭih rnoi mpôl đĕ 13 rbăn rnăk, rnoh manh bơi tât 500 rkeh, geh 52% rnoh ân manh. Bơi tât 1000 rnăk geh kơl an bơi tât 50 rmen gay ma rgâl nau kan, neh gŭ, neh tuch tăm ndrel ƀư ngih. Tơm prăk manh kơl an âk rnăk ach o, êp ach o ndrle rnăk rnoi mpôl đê̆ tâm Gia Lai geh rklaih nau jêr tâm nau rêh, hun hao văng sa, rklaih ach o nâp. Wa Đinh Văn Nghĩa, Groi Giám đốc Ngân hàng chính sách xã hội n'gor Gia Lai, mbơh:

Rnôk aơ ăp nau kan ân manh prăk chính sách đah nŭih ach o ndrel nŭih geh kơl an êng yor ngân hàng ƀư tâm nkuăl hŏ rgop nau ueh ndrel nkuăl ƀư ăp nau kan bah neh dak mpeh n’huch ach o nâp nâl, ndâk ƀon lan mhe, hun hao văng sa rêh jêng nkuăl rnoi mpôl đê ndrel gôl yôk. Ntơm tơm prăk kơl an kônh wa jut lôch ăp nau khuch bah nau rêh, rgâl nau mĭn, nau kan, blau dŏng prăk aơ tâm di nkô̆, âk rnăk hao rklaih ach o”.

Tâm Dak Nông, jêh 20 năm ƀư nau ntrŭnh mrô 78 năm 2002 bah Chính phủ mpeh nau ân manh prăk kơl an hŏ rêng tât ăp nkuăl jru, ngai, kơl an âk rnăk geh dơi rklaih hao, ndâk njêng nau rêh đăp mpăn. Rnôk aơ, ntŭk kan ngân hàng chính sách xã hội n’gor Dak Nông dôl ân manh 18 nau kan, đah rnoh rlau 3.500 rmen. Bah tơm prăk aơ, rnăk ach o ndrel ăp nŭih geh kơl an prăk gay ntuh kơl, hun hao văng sa, rklaih ach o nâp nâl. Tât rnôk aơ, rnoh rnăk ach o bah Dak Nông hôm 11%. Ntơm bah du n’gor jêr ngăn, Dak Nông rklaih rmôt ach o, mô hun hao./.