Rơh ôp nau đah ăp nau ôp bah ntoh măt Quốc hội hăn sŏng tâm ăp nau ê dơi, nkol râm nau ƀư 3 nau kan bah neh dak mpeh nau ndâk njêng ƀon lan mhe, hun hao văng sa, rêh jêng nkuăl rnoi mpôl đê̆ ndrel gôl yôk, jŭt n’huch ji ngot ach o nâp nâl. Wa Mai Văn Hải, ntoh măt bah n’gor Thanh Hoá, ôp:

 ‘Jêh rlau 2 năm ƀư Bôk nau kan bah neh dak hun hao văng sa, rêh jêng nkuăl rnoi mpôl đê̆ ndrel gôl yôk lvang năm 2021-2025 hŏ geh du đê̆ nau dơi đŏng. Yơn êp nê nau ƀư du đê̆ nau kan jê̆, nkô̆ nau ƀư bah bôk nau kan leo dŏng tơm prăk hôm mbrơi ndrel geh âk nau hôm nkol mpeh nau kan mât. Dăn Kruanh n'gâng kan mbơh moh nau jêr, nau nkol têh ngăn rnôk aơ ntŭk lah nkô̆ ndrel ntrong rklaih. Dăn lah ueh bah Kruanh n'gâng kan”.

Kruanh n'gâng kan Uỷ ban Dân tộc mbơh, bôk nau kan bah neh dak mpeh nau hun hao văng sa, rêh jêng nkuăl rnoi mpôl đê̆ ndrel gôl yôk lah nau jêr ngăn. Yor nau kan têh ndrel geh tâm nkuăl jêr jŏt. Ăp nau kan, nau kơl geh rgum tâm bôk nau kan geh n’ăp ma nau kan bah rơh bah năp hôm geh nau tam:

‘Nau rvê ngăn rnôk aơ lah nau ntrŭnh ƀư tâm ntŭk yor geh ăp nau kan ntrŭnh ƀư hôm tât tâm ƀon lan, ăp rnăk vâl. Mpeh nau kan ntrŭnh mbơh ntĭm đă hŏ geh tŏng ăp, yơn lah mô dơi der tâm nau ngăn geh nau kan hôm ntuh luh ri ma Trung ương ân geh n’hao nau mêt uănh, bonh đă ndrel joi trong rklaih ân năn nau jêr, nau kol bah nkual. Đah nkual, tâm nau mbơh aơ mra n’hao nau pă gưl tâm ăp tu tơm ân nkuăl ntrŭnh, rgum rmôt kan gay ma ƀư”.        

Kŏ tâm nar rƀŭn ôp nau, Kruanh n’gâng kan Uỷ ban Dân tộc Hầu A Lềnh ơh nau mpeh ăp nau jêr, nkol tâm nau ntrŭnh kơl rnoi mpôl geh tât nau pă gưl xã, thôn nkual rnoi mpôl đê̆, gôl yôk:

Ăp xã, thôn geh 15% lah nŭih rnoi mpôl đê̆ hao gŏ lơ ri geh năl lah xã mô lah thôn, nkuăl rnoi mpôl đê̆. Tal 2 lah xã ach o, thôn ach o geh rnoh 15% rnoh nŭih rnoi mpôl đê̆ rêh tâm nê hôm rnăk ach o ri lah xã ach o. Nau kan pă gưl aơ geh du đê̆ nau kan lah, rnôk geh năl lah xã ach o, thôn ach o ri hôm ăp xã, thôn geh tâm dâng 15% ri mô hôm lah xã ach o, xã jêr jŏt tay ôh, ndrel aơ lah du nau kan hôm nkol”.

 Geh tât nkô̆ nau mbơh pă gưl ntĭm nti ân nkuăl rnoi mpôl đê̆, wa Nguyễn Lân Hiếu, rmôt kan bah n’gor Bình Định, ôp:

  ‘Dăn ôp lah Uỷ ban hŏ geh moh nau kơp uănh mpeh rnoh mô gĭt play săm ƀŭt bah ăp nŭih tă geh nti play săm ƀŭt bah ăp rnoi mpôl đê̆ ntơm bah rnôk druh ndăm ân tât du têh. Kruanh n’gâng kan moh geh nau tâm di Mặt trận Tổ quốc ndrel N’gâng kan ntĭm nti gay ma rklaih nau kan aơ”.

 Kruanh n’gâng kan Hầu A Lềnh, ơh nau:

 ‘Tĭng nau kơp tât rnôk aơ phung hên, nŭih rnoi mpôl đê̆ ê blau ngơi ê blau nchih nau Yoăn geh nklăp 15% aơ lah nau dôl rvê. Hên mra tâm rgop ma n’gâng kan ntĭm nti ân geh nau kan tâm ăp nau ntrŭnh ntĭm nti tâm rơh tât ân nsrŭng nau kan aơ đah ăp nkual rnoi mpôl đê̆, ngăn lah 6 nau ntrŭnh bah n’gâng kan chính trị mpeh nau hun hao nkuăl văng sa, têm nê geh tay nau kan hun hao ntĭm nti geh mbơh nau kan aơ, mra mĭn ndrel geh nau ƀư gay jut jăng mô blau săm ƀŭt ân kônh wa rnoi mpôl đê̆”.

Wa Vũ Thị Lưu Mai, rmôt kan bah nkual ƀon têh Hà Nội đă N’gâng kan ƀư kloh nau pă tơm prăk bah nkô̆ nau kan neh dak hôm dêh, knŭng geh 4.634 rmen, tâm ban 51%. Tâm nê, du gưl geh pă ân nau tâm nchră, ntĭm nti. Ngăn lah, dŏng nau ân tâm nchră tâm ban bu ur bu klô 64 rmen. Ơh nau mpeh tâm gŭ ur sai 102 rmen. Rƀŭn 88 rmen. Tâm nê ndâk nau kan dak si knŭng 38 rmen. Kruanh n’gâng kan Uỷ ban Dân tộc Hầu A Lềnh mbơh: Bôk nau kan aơ geh pă rơh aơ lah 2.382 rmen đah aka nkô̆, tâm nê nkô̆ nau ntĭm nti, nkoch mbơh ƀư ăp nau kan. Ndri ma, rnoh tơm prăk gay kơl an bu ur hŏ dŏng ƀư nau kan bah năp nê, ăp nau kan êng mra ntrŭnh ƀư bah rơh ba kơi”.

 Bah năp Quốc hội, Groi Thủ tướng Chính phủ Trần Lưu Quang ndơn nau ê dơi đah Quốc hội ndrel kônh wa tâm nkual rnoi mpôl đê̆, gôl yôk rnôk mbrơi ƀư nau kan hun hao văng sa, rêh jêng nkual rnoi mpôl đê̆ ndrel gôl yôk. Tât lơ 31/5/2023, tơm prăk bah năm 2022 ân nau kan aơ geh 58% ntuh kơl hun hao, tơm prăk bah năm 2023 knŭng geh 17% tơm prăk hun hao. Tâm rnôk nê knŭng hôm 2 năm n'gul gay ƀư rơh 1 bah nau kan aơ, rlau ma nê, âk rnoi mpôl đê̆ geh kơl an dôl rêh nkuăl n'har bri bah neh dak, ndơn ân nau jêr gay ma mât neh dak nơm. Groi Thủ tướng chŏng ăp nau nkol tâm nau ƀư kan lah yor nau ntrŭnh âk tâm rkăng, ƀư jêr nau pă prăk bah Trung ương. Groi Thủ tướng lah rjăp tâm rơh tât gay ntrŭt dăng nau doh rklaih, ƀư jêh nau kan nâp gay Bôk nau kan geh leo prăk ƀư kan tâm di nau đă:

 “Nau khlay lah nơm mra ntrŭnh dăng nau pă gưl ân nkuăl gay ăp nŭih ƀư kan nchrăp ƀư ăp nau ma knŭng geh nơm mơ blau nau mhâm ƀư ân geh tâm di. Nuih n’hâm nsum bah hên lah nsôih gay lŏ geh rklaih ăp nau kan ma hên gĭt mra geh nau ntoh luh, mhâm ƀư ân geh nau kan aơ tâm di nau ntrŭnh ndrel tâm di nau đă bah ăp nŭih bu ŭch”.

Rnôk rƀŭn nchră mpeh nau kan rnoi mpôl,  Kruanh Quốc hội Vương Đình Huệ kơp dơn nau ôp geh khuh, sŏng ndrel ndâk nâp. Mbơh kloh nau kol, nau ê dơi, ngăn lah nau mbrơi ƀư nau kan bah neh dak. Du đê̆ nau mbơh ntrŭnh mbrơi mô lah mô tâm ban, ê kloh, ê tâm di rnoh ngăn, Kruanh Quốc hội đă tâm rơh tât ân ntrŭnh rjăp ăp nau kan ân tâm di, tŏng năn ăp nau ntrŭnh, trong rƀŏng khlay mpeh lan rnoi mpôl lvang năm 2021-2030. Rgum ăp tu tơm gay ntuh kơl hun hao văng sa, rêh jêng nkual rnoi mpôl đê̆ ndrel gôl yôk, tâm nê, rgum tâm nkuăl jêr jŏt ngăn, rmôt rnoi mpôl hôm âk nau jêr ndrel nau jêr geh êng...Ƀư ân săk tam nau kan kơl an neh gŭ, neh tuch tăm, ntrơn rgâl nau kan ân ăp rnăk rnoi mpôl đê̆ ê geh mô lah mô tŏng neh gŭ, neh tuch tăm ndrel đăp mpăn rnoh neh bri ndrel neh geh rgum ân hun hao tăm bri geh jao, ân manh neh tât ăp tơm bri ngăn ngên./.