Quân đoàn 3 geh ndâk tâm lơ 26/3/1975 tâm nau rgum dĭng lĕ rmôt kan tahen tơm tâm ntŭk tâm lơh tâm Tây Nguyên, jêng rmôt kan tơm leo trong hăn. Quân đoàn 3 hŏ ntoh nau kan bah rmôt kan tơm, rgop nau khlay têh tâm nau rklaih Tây Nguyên ndrel rƀŏng tât rklaih dĭng lĕ Miền Nam, đăp mpăn neh dak tâm lơ 30/4/1975. Nkre, quân đoàn kŏ tâm lơh gay mât nkuăl n’har bri Tây Nam, Tây Bắc ndrel râng nau kan mât đăp mpăn dak ba dih kơl an ƀon lan Campuchia rklaih bah phung nkhĭt rŭng Pol Pot. 

Tâm rnôk ndâk njêng ndrel mât ne dak, Quân đoàn 3 hŏ tâm dăch dơh ngăn đah gưl uỷ, n’gâng kan ndrel ƀon lan ăp rnoi tâm ntuơk gŭ ƀư nau kan, rgop nau khlay tâm nau hun hao văng sa, rêh jêng, rnă njrăng neh dak bah Gia Lai lah êng, ăp n’gor Tây Nguyên lah nsum. Đah ăp nau kan têh ndrel geh âk nau dơi ngăn tâm rnôk tâm lơh ndrel tâm nau kan ndâk njêng n’hanh mât neh dak, Quân đoàn 3 geh Đảng n’hanh Ngih dak pă nkhôm săk ntơ Anh hùng Lực lượng Vũ trang Nhân dân tâm lơ 20/12/1979; geh pă nkhôm 3 Huân chương Hồ Chí Minh, 57 Huân chương Quân công, 242 Huân chương Chiến công ăp nau kan ndrel âk nau geh dơi rnê nkhôm êng êng; geh Ngih dak Camphuchia pă nkhôm Huân chương Ăng Co; 81 rmôt kan ndrel 47 nŭih geh Đảng, Ngih dak pă nkhôm nau dơi Anh hùng lực lượng vũ trang nhân dân.

Tâm nê geh 9 rmôt geh rnê nkhôm săk ntơ Anh hùng tal bar; Lữ đoàn CB7 và Trung đoàn BB66 geh rnê nkhôm săk ntơ janh dăng tal Pe tâm rnôk rgâl mhe. Ƀư kơt tĭng ueh nau vay ơm ueh ang bah 49 ndâk njêng, tâm lơh ndrel têh jêng, ăp cán bộ, tahen Quân đoàn 3 mro nsôih gay ƀư nau kan ân Đảng, ân neh dak ndrel ƀon lan, ƀư ueh ăp nau ueh ơm bah tahen Wa Hồ, nchih nkoch tay ăp nau dơi ƀư kloh tay 12 rplay mah: “Nsôih ân geh nau dơi, blau nau mhe, tâm rnglăp, tâm ban, ƀư rjăp, nsôih săk nơm” bah quân đoàn janh dăng ndâk Quân đoàn nâp nâl ăp ntil. Ntoh nau tâm rnôk mâp măt, Trung tướng Nguyễn Doãn Anh rhơn ăp nau dơi, nau tă geh bah Quân đoàn 3, nkre đă rmôt kan tâm rnôk mhe tât lŏ ntrŭnh jru nâp nau ntrŭnh, ntrong kan bah Đảng, Ngih dak mpeh tahen neh dak.

Uănh khlay nau ntĭm nti nau mĭn, ndâk njêng nau ueh êng bah Quân đoàn tâm rnôk mhe, leo trong lor tâm nau ƀư nau ntrŭnh bah Quân ủy Trung ương, n’gâng kan neh dak năm 2024. Trung tướng Nguyễn Doãn Anh- Uỷ viên TW Đảng, Groi Tổng Tham mưu trưởng tahen ƀon lan Việt Nam lah rjăp:

TĐ: “Gâp rnơm lah, tahen Quân đoàn 3 mra nsôih, geh dơi âk nau dơi têh lơn tay tâm ăp nau kan, ndrel gưl uỷ, n’gâng kan ndrel ƀon lan tâm nkuăl ndâk nkuăl Tây Nguyên ndrel Quân khu 5 drŏng mpeh nau kan văng sa, nâp mpeh chính trị, nâp nâl neh dak-rnă njrăng, rgop nau ndrel Đảng, lam ƀon lan, lam tahen ndâk ân dơi nau kan ndrel mât nâp neh dak Việt Nam XHCN tâm rơh rgâl mhe”.

Trung tướng Nguyễn Doãn Anh kŏ đă Quân đoàn uănh khlay n’hao nâp nâl lơn nau kan kơl an ăp ntil, ndoh ndơ dŏng bah ăp nau kan, ƀư ueh nau kan “nsôih njêng êng-nâp nâl ndrel jăp, ntrŭt dăng nau kan tuch tăm, ƀư nau mât chăm nau rêh drăp ndơn ndrel nuih n’hâm ân tahen, ntrŭnh ƀư ân tam ueh nau kan bonh đă, ngăn lah tâm nkuăl jru, nkual ngai, nkuăl jêr jŏt, rgop nau ƀư nâp nuih n’hâm nau rêh bah ƀon lan ân nâp nâl”./.