Trong hăn lăp ta jay wa Hồ Phình, 47 năm deh, ta bản Kè, xã Lâm Hóa, nkuăl Tuyên Hóa nque nkuăch ta bar pe jâng yôk. Ta năp nơh, rnăk vâl wa Phình way mô tŏng ndơ sa. Rnăk vâl geh 6 nuĭh yơn lah kanŭng geh 2 sào neh tăm tuh mbo n’hanh 1 sào neh tăm ba, năm i mô jêng, lĕ rnăk vâl wa knơm ta nău kơl an bâh ngih dak.

Mô ŭch đah nău rêh ach o, wa Hồ Phình joi trong kan ƀư tĭng ăp nău kan hun hao wăng sa. Bâh rnoh prăk 50 rkeh prăk manh bâh Ngân hàng chính sách xã hội, wa rvăt ntil ndrôk, sŭr n’hanh tơm ntil gay ma tăm bri. Bâh âk năm rgum nkrem, wa Hồ Phình geh 5 ha neh bri ndrel âk ndrôk, rpu, sŭr, djăt. Wa hôm nha tăm tay ba, mbo...nău geh bâh ba tŏng sa ăp năm, mbo dŏng an mât rong sŭr, djăt, nău wăng sa rnăk vâl lĕ geh rgâl âk.

“Hôm nha geh âk nău jêr jŏt yơn ma an geh nsrôih, pah kan an sâm geh lơn. Bôl ma hôm nha ach o yơn  gâp hôm geh mbơm oi đah ƀon lan. Nchih săm ƀŭt dăn luh rnăk ach o, dăch ach o gay ma Đảng, ngih dak kơl an nuĭh jêr jŏt lơn he nơm. Ăp rnăk jêr jŏt rĭ he kơl an ƀon lan, ê hŏ gĭt ƀư mir ba rĭ he ntĭm an ƀon lan pah kan”.

Wa Hồ Phình lah ngoăy tâm âk nuĭh Mã Liềng bôk năp geh lăp Đảng n’hanh lah nuĭh bôk năp ta xã Lâm Hóa nchih sƀ dăn luh rnăk ach o. N’ha săm ƀŭt dơn lah rnăk ach o bâh wa mô dơn kơl an rnăk ach o lơn geh dơn nău kơl ma lah nău kan an ƀon lan nuĭh Mã Liềng ƀư tĭng gay ma bah ach o.

Wa Cao Thị Vân, kruanh bản Kè, xã Lâm Hóa, nkuăl Tuyên Hóa an gĭr, ŭch rgŏ jă ƀon lan Mã Liềng hun hao wăng sa rĭ ăp đảng an geh ƀư lor, bah ach o lor, hăn ndrel đah kan rĭ ƀon lan mơ bah ach o ƀư tĭng he. Ndrel đah hun hao wăng sa rnăk vâl, wa Hồ Phình hôm nha tât ăp rnăk ăp jay tâm ƀon, ntĭm an ƀon lan mât rong, tăm bri, pă tơm ntil, kon rong.

“Nô Hồ Phình hăn ta ăp jay mbơh rblang, rgŏ jă ƀon lan, lah mâp ăp nău jêr rĭ kơl an ƀon lan. Gay ma rgŏ jă ƀon lan ta aơ rĭ cán bộ ngơi hăn ndrel đah nhup ti nti kan” rĭ ƀon lan mơ gĭt vât. Tâm ba năp nơh Đảng n’hanh ngih dak way mât kơl, kơl an ƀon lan dŭt âk, ƀon lan ăp nar lơ ma hun hao, geh jay gŭ, điện mpoh ang n’hanh geh ngih nti an kon hoc”.

Xã Lâm Hóa geh rlău 150 rnăk đah klâp ma 650 nuĭh lah nuĭh Mã Liềng (du mpôl bâh rnoi Chứt). Wa Đinh Văn Bắc, groi Bí thư Đảng ủy xã Lâm Hóa, nkuăl Tuyên Hóa, n’gor Quảng Bình an gĭt, bản Kè aƀaơ geh klâp ma 10 đảng viên, tâm nĕ geh 7 đảng viên lah nuĭh Mã Liềng. Bâh nău kan lah groi Bí thư chi bộ, wa Hồ Phình ndrel đah ăp đảng viên ta bản Kè way hăn lor, hăn bôk năp tâm ăp nău kan, ƀư tĭng nău ntrŭnh, nău kơl bâh Đảng, ngih dak, rgŏ jă nuĭh ƀon lan hun hao wăng sa, rêh jêng, jut n’huch ach o. Tĭng wa  Đinh Văn Bắc, Hồ Phình geh kơp dơn lah rnăk ƀon lan pah kan jan sa tăch rgâl blău gâl xã 5 năm mbro. Năm e nơh, wa lah Đảng viên ƀư lôch dŭt jăp nău pah kan.

 “Nău lan hăn lor bôk năp, leo kan, mât kan êng bâh Đảng viên n’hao dơi săk rnglăy tâm nău mbơh tơih rgŏ jă ƀon lan mpeh hun hao wăng sa rêh jêng, mât nâp nâl rnă njrăng ta ăp bản. Nău rêh rgâl mhe dŭt âk, ngăn lah ƀon lan hăn kan lor tâm nău hun hao wăng sa, rêh jêng”.

Wa Bùi Thanh Chuyên, groi Bí thư rnâng kan nkuăl Ủy Tuyên Hóa, n’gor Quảng Bình an gĭt, lam nkuăl geh 44 đảng viên lah nuĭh ƀon lan rnoi đê̆. Aơ lah mpôl kan tơm khlăy tâm nău kan mbơh tơih kơl kan bâh Đảng, pháp luật bâh Ngih dak, hun hao wăng sa, rêh jêng, mât đăp mpăn văn hóa mpôl rnoi ta ăp bản làng ta n’har bri. Tĭng nău mbơh bâh wa Bùi Thanh Chuyên, tâm let năp tay, nkuăl geh hun hao đảng viên tâm ƀon lan rnoi đê̆, rdâk njêng mpôl kan đảng viên hăn lor bôk năp, trĕ lam ta ăp ntŭk kan.

 “Tâm let năp tay, rnâng kan thường vụ nkuăl ủy geh mât uănh ntrôl dăng nău hun hao Đảng viên ta nkual ƀon lan rnoi đê̆ gay ma ăp nar geh âk ƀon lan geh lăp kan ta ntŭk kan bâh Đảng, jêng nuĭh kan ntoh lư  tơm khlăy n’hanh lah ntŭk nơm hăn lor bôk năp ta rơh rgŏ jă ƀon lan ƀư tĭng ueh ăp nău ntrŭnh, nău kơl”.

Nău nglăp ăp nuĭh rnoi đê̆ ntoh lư lăp Đảng ta nkuăl gôl yôk Tuyên Hóa, n’gor Quảng Bình lah nău kan tơm khlăy mpeh chính trị. Bâh nĕ, lĕ geh n’hao nău kan tơm khlăy tâm nkual ƀon lan rnoi đê̆ ta ăp ntŭk.