Ta n’gor Quảng Bình, bu ur nkual yôk prêh nău mĭn bu ur tât dâk druh geh sai, deh kon. Lah deh tâm rnăk âk kon ri ân lor kon bu klô hăn nti, kon bu ur ân gŭ ta jay pah kan. Mô dơn geh nău yô̆ nđach tâm rnăk wâl, ăp nuĭh bu ur hôm mbăk anh ăp nău way ơm rluk kơt geh sai, khân păng ân deh âk kon gay geh nuĭh kan, mô dơi râng nchră nău, n’glêh an ăp nău kan khlay tâm rnăk tâm ban kơt tâm lam ƀon lan đŏng. Gay mbrơi jut jăng bah ăp nău ntêt bu ur,  nkra ăp nkô̆ nău khlay jăch ndăn đah bu ur n’hanh kon se, tâm bah ri aơ nơh, Hội Liên hiệp bu ur ăp gưl n’gor Quảng Bình du rơh ƀư lễ ntoh măt rmôt nkoch trêng lam ƀon lan ta ăp nkuâl mpeh yôk yang. Aơ lah ngoăy tâm ăp trong ntĭt leo tâm ban ban bu ur bu klô n’hanh nkra ăp nkô̆ nău khlay đah bu ur n’hanh kon se.

Xã Trường Sơn, nkuăl Quảng Ninh, n’gor Quảng Bình lah ngoăy tâm 8 xã geh trung ương Hội LH bu ur Việt Nam săch  ƀư ntŭk rlong tơm ta lam dak  mpeh mbơh ƀư nău nchrăp kan 8. Ta aơ, nău kan rmôt mbơh tơih ntŭk rêh jêng lĕ geh njêng đah 10 nuĭh kan ndrel. Rmôt kan geh nău kan mbơh tơih, rgŏ jă nuĭh ƀon lan rgâl nău mĭn, trong kan tâm nău pah kan jan sa, hun hao wăng sa, jut jăng nău tâm nglah n’hanh nău mô tâm ban bu ur tâm rnăk vâl n’hanh ntŭk rêh jêng, ăp nău way mô hôm tâm di, geh nău kan mô ueh. Wa Hồ Thị Thư, bản Đá Chát, xã Trường Sơn, nkuăl Quảng Ninh, n’gor Quảng Bình an gĭt, ntơm nơh, gay ma đă sai an yuh tât râng ăp nău kan ta ntŭk rêh jêng lah nău mô geh dơh. Yơn lah, bâh geh ăp nău pah kan bâh rmôt kan mbơh nău ta ntŭk rêh jêng, sai yuh geh âk nău rgâl na nê̆ tâm nău mĭn n’hanh nău pah kan. Nô lĕ gĭt tâm kơl nău kan ta rnăk vâl gay ma yuh geh tay mông nar ƀư ăp nău kan ta ntŭk rêh jêng tâm ƀản

“Let năp tay gâp mbra geh ƀư rơh rƀŭn nchră ƀon lan mbơh tơih mpeh nău tâm ban bu ur bu klô. Ntĭt lah đah bu klô rĭ an geh ƀư n’hanh tâm kơl nău kan an ur, an kon an tâm ban n’hanh dơh nơih tâm rnăk vâl. Lah sai mô gĭt vât đă êng du hê ur pah kan, ƀư nău jêr an ur, yơn lah he geh rgum nti nău kan an tâm ban bu ur bu klô mbra geh âk nău ueh an săk nơm nkre lah tâm ntŭk rêh jêng. Săk nơm mbra mbơh an ƀon lan gĭt, ngăn lah ăp rơh mom ndăm”.

Mô dơn kanŭng yuh Thư ma âk bu ur êng ta xã Trường Sơn lĕ tâm kơl tâm mbơh, lôch geh tât râng ăp rơh mbơh tơih ta ntŭk rêh jêng ta bản, âk nuĭh sai lĕ geh nău rgâl, gĭt tâm kơl nău kan ntơm nơh kơt lah kanŭng lah nău kan bu ur dơm. Âk nău bên mô tâm di lĕ ntơm nklơi jăng, nsĭt tay nău đăp mpăn an rnăk vâl n’hanh ƀon lan. Ta xã n’har bri aơ đŏng, Hội LH bu ur n’gor geh mbơh nău kan ta ntŭk geh nău knơm, nti mpeh tâm ban bu ur bu klô ta 2 thôn n’hanh nău kan câu lạc bộ leo kan bâh nău rgâl mhe ta ngih nti phổ thông dân tộc bán trú Trung học cơ sở Trường Sơn; nkre lah, ta gâl xã lĕ geh njêng tay 6 rmôt kan mbơh tơih nău kan ta ntŭk rêh jêng ta 6 bản. Wa Dương Thị Hồng Chuyên, kruanh Hội Liên hiệp bu ur nkuăl Quảng Ninh, n’gor Quảng Bình an gĭt, bâh ăp rmôt kan mbơh nău ta ntŭk rêh jêng lĕ geh mbơh tơih tât ƀon lan rnoi Bru-Vân Kiều mpeh nău gĭt vât kơt lah: Luật tâm ban bu ur bu klô,  pah kan tâm rnăk vâl, nău kan njrăng tâm gŭ ur sai mô tŏng năm deh n’hanh dăch ndul mpôl; ăp nău mbơh n’hanh nău blău kan gay ma ngăch kơl an ăp nuĭh geh sai lơh tâm rnăk vâl.

“Tâm let năp tay, Hội liên hiệp bu ur nkuăl mbra ndrel tay đah ntŭk kan bu ur xã gay ma ntĭm đă, leo ƀư pah kan nău kan mbơh tơih ntŭk rêh jêng geh săk rnglăy ueh. Ngăn lah ntŭk kan mbra uănh khlăy nău nti kan, n’hao nău gĭt vât mpeh mpeh tâm ban bu ur bu klô, rdâk njêng rnăk vâl hơm răm đăp mpăn”.

Ta meng ăp nău kan mbơh tơih ăp rmôt kan hôm nha geh rgŏ jă, ntrŭt đă ƀon lan tât râng ăp nău kan ngăn lah bu klô ndrel tâm mbơh nău kan, tâm kơl nău kan ta rnăk vâl, nta nău dơh nơih an bu ur n’hao nău dơi tâm ban bu ur bu klô, bah tâm lơh ta rnăk vâl, ntop ƀư lôch ăp nău kan ma bôk nău kan nkô̆ mpŏng ngih dak hun hao wăng sa rêh jêng nkual ƀon lan rnoi đê̆ n’hanh gôl yôk lĕ ngluh mbơh. Wa Nguyễn Thị Kim Dung, kruanh rnâng kan tuyên giáo, trung ương Hội liên hiệp bu ur Việt Nam an gĭt, nău kan “rmôt kan mbơh tơih ntŭk rêh jêng” bâh nău nchrăp kan ƀư tĭng tâm ban bu ur bu klô n’hanh doh rklaih ăp nău jăch ndal đah bu ur n’hanh oh kon se bu ur yor Hội liên hiệp bu ur Việt Nam leo kan lĕ kơl an 120 nuĭh oh yuh bu ur xã Trường Sơn, nkuăl Quảng Ninh geh gĭt đah nău mhe mpeh tâm ban bu ur bu klô, jut jăng ăp nău way mô tâm di n’hanh geh njoat n’hao nău dơi kan bâh bu ur tâm rnăk vâl, ntŭk rêh jêng.

“Nău tâm ƀah mpeh bu ur bu klô n’hanh ăp nău tâm mưch ta ntŭk rêh jêng dôl geh âk n’hanh ngăn lah ƀon lan rnoi đê̆. Yor lah, rđil đah nău geh nsum mpeh nău gĭt vât n’hanh tâm ban kơt nău rêh wăng sa ntŭk rêh jêng bâh ƀon lan rnoi đê̆ dôl hôm nha geh ăp nău tâm ƀah ngai. Mpôl hên ŭch an lah n’hao nău gĭt vât gay ma khân păng rgâl, jut jăng ăp nău tâm mưch nĕ, jut jăng ăp nău kŏ văk nĕ gay ma kihân păng geh nău dơi, geh nău nkhêp ma n’hao nău kan, nău dơi kan bâh nơm”.

Kơp tât khay 5 năm aơ, n’gor Quảng Bình lĕ njêng geh 32 rmôt kan mbơh tơih ta ntŭk rêh jêng, 6 Câu lạc bộ leo kan bâh nău rgâl mhe n’hanh 19 ntŭk knơm. Bâh nău geh ƀư tĭng bôk năp mbra dơi saơ, ăp nău kan bâh nău nchrăp kan 8 geh njêng n’hanh mbơh tơih ƀư tĭng nău mpŏng kan bâh nău nchrăp kan, nkre geh ƀư lĕ rngôch, nkre na nê̆, ngăn ngên, tâm di đah nău ngăn, nsĭt tay nău dơi an bu ur n’hanh oh kon se ta ntŭk geh mbơh tơih, ntop n’hao nău gĭt vât, rgâl nău mĭn, trong kan.