Năm 2023, ơm ƀư tĭng bôk nău kan rƀŏng tĭng lam dak hun hao nkual rnoi mpôl đêt n’hanh nkual yôk tâm pă an n’gor Quảng Nam rlău 782 rmen prăk. Tâm năm 2022 n’hanh 3 khay năm 2023, nău mbơh ƀư tĭng bôk nău kan aơ dôl mâp jêr jŏt. Nkô̆ nău lah ăp ngih pah kan Trung ương mbrơi an sam ƀŭt ntĭm ƀư tĭng, ăp ntŭk dŭt vĭ vĕ mbơh ƀư ăp nău nchrăp kan. Tĭng wa Nguyễn Công Thành, Groi Giám đốc N’gâng kan ntĭm nti n’gor Quảng Nam, âk nău ntrŭnh, rnoh an ƀư nău kơl đah kon hŏk nkual yôk ta ăp nău nchrăp ƀư ntĭm nti jêt mpeh tâm bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt n’hanh nkual yôk bah n’gor hôm e âk wăk kol:

“Ndrel tâm du ngih sam ƀŭt, du jrô nti, âk oh kon hŏk gŭ ndrel du nsưng ma 1 oh dơi geh nău kơl bah Trung ương, 1 oh mô dơi geh nău kơl bah n’gor ri dŭt jêr. Mpôl hên đă an rgâl nkra nău kơl gay geh nău kơl an tâm ban”.

Wa Lê Văn Dũng, Groi Bí thư rnâng kan N’gor ủy Quảng Nam ntĭm du đêt nău jêr jŏt ta ăp nkual yôk rnôk mbơh ƀư ăp nău nchrăp ƀư jêt kơt rnoh rnăk ach o dŭt âk, nău rêh nuĭh ƀon lan hôm e âk jêr jŏt jêng an manh rnôk mbơh ƀư nău nchrăp dŭt đêt. Ndrel đah nău dơi, nău nti bah rmôt can sbộ ta nkual yôk tâm di nău đă tâm rnôk ƀư tĭng ăp nău nchrăp ƀư jêt. Wa Lê Văn Dũng dăn đă:

 “An rgâl dơh ăp sam ƀŭt sam tra tâm rnôk mbơh ƀư yor sam ƀŭt dŭt âk jêr. Moh nău dơi tâm pă gưl an gưl n’gor, gưl nkuăl, đê̆ đŏng gưl xă ri Trung ương an geh nău ntrŭnh gay tâm pă gưl”.

Ntoh ngơi ta nar pah kan, wa Hầu A Lềnh, Kruanh N’gâng kan-Chủ nhiệm Ủy ban Dân tộc djôt dơn ăp nău dăn đă bah n’gor Quảng Nam. Âk jêr jŏt, wăk kol ntoh mhe tâm nău ƀư tĭng bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt n’hanh nkual yôk mbra dơi Mpôl pah kan rgum lĕ mbơh an Chính phủ ơm geh trong mkra dôh rklaih. Wa Hầu A Lềnh đă n’gor Quảng Nam tâm rgop rjăp đah ăp N’gâng kan, nău kan Trung ương tâm rnôk dôh rklaih jêr jŏt, rgâl nkra di nău kơl.

“Moh nău mpeh nău kan bah Trung ương ri trung ương an ƀư, an dôh rklaih. Thủ tướng Chính phủ lĕ jao an ăp n’gâng kan nău kan rgum mkra. Geh 3 rmôt nău an ƀư: Rmôt nău bôk năp lah dôh rklaih jêr jŏt, rmôt nău tal 2 lah mkra ăp nău vĭ vĕ n’hanh rmôt nău tal 3 lah ntop tay ăp nău mô hŏ geh”.