Ntoh nau tâm nar mât măt, Kruanh Quốc hội Vương Đình Huệ ân lah, Quốc hội hŏ geh du năm geh nau dơi, đah 10 nau kan ntoh lư geh báo chí săch. Ngăn lah, tâm ăp nar pah kan bôk năp bah năm 2024, Quốc hội hŏ ƀư dơi rơh rƀŭn ndal ngăch tal 5, nchră âk nkô̆ nau khlay, ngăn lah nchră Luật neh ntu (rgâl nkra) ndrel Luật ăp ntŭk ân manh prăk (rgâl nkra), geh ăp nŭih blau nau kan, ƀon lan, ntŭk kan tăch rgâl tâm ndrel bah dih n’gor rnê prêh. Lor ma rnôk rlu tết năm mhe, Kruanh Quốc hội hŏ hŏ ký nau ân dŏng bar luật khlay aơ.

Ntoh măt Đảng đoàn Quốc hội, Uỷ ban Rnâng kan Quốc hội, Kruanh Quốc hội rhơn ndrel rnê ăp ntoh măt Quốc hội, ăp ntŭk kan bah Quốc hội, ăp ntŭk kan bah Uỷ ban Rnâng kan Quốc hội, cán bộ, công chức viên chức, nŭih pah kan bah Văn phòng Quốc hội hŏ nsôih, gơih, ngăch blau ƀư jêng ăp nau dơi ueh ngăn bah năm 2023.

Lah rjăp, năm 2024 lah du năm geh nau ueh, lah năm ăp ntŭk kan, ăp gưl kan, ăp ntŭk kan, n’gor ân n’hao ngăch gay jêh dơi mpeh văng sa, rêh jêng bah lôch năm kan, Kruanh Quốc hội ân lah, Quốc hội mra dơi geh ăp nau tă geh dơi tâm năm 2023, yơn kŏ ân geh nsôih tay.

Nchrăp, rnoh nau kan tâm năm aơ âk, êng nau kan ƀa ƀơ ndâk pháp luật, mêt uănh gưl prêh, ntrŭnh ƀư nau kan khlay bah neh dak ndrel nau kan êng, Văn phòng Quốc hội hôm mbơh nchră nâp gay nchrăp nkah 80 năm nar săch kan bôk năp bah Quốc hội. Ndri ma, Kruanh Quốc hội Vương Đình Huệ, nkah:

‘Gâp hŏ mbơh âk tŏ mpeh mông kan, ndri ma, nơm ân ntơm nau kan ntơm bah ăp nar bôk khay ndrel tĭng nau nchrăp kan. Nơm ân nsôih gay rƀŏng tât du Quốc hội nar lơn ma geh nau blau, ƀư tĭng ƀon lan ƀư tơm, n’hao nau dơi ndâk pháp luật, yơn mro mât tâm dăch nau rêh, gay tŏng dơi nau ŭch bah nau kan, đăp mpăn nau kan bah Quốc hội yor nau kan geh nau dơi bah neh dak ndrel rnoi mpôl. Ăp nau ntrŭnh bah Quốc hội ngăn ngên sŏk ƀon lan ndrel ntŭk kan ƀư kan tơm. Đah nuih n’hâm nsôih ăp nau tă dơi geh ân jêng nau ueh tâm ban, năn, đăp mpăn ân nau ndâk neh dak hun hao ngăch, nâp ndrel tâm rnglăp lam ntur neh”.

Kruanh Quốc hội nkah ăp ntŭk kan bah Quốc hội, ăp Rnâng kan bah Uỷ ban Rnâng kan Quốc hội ndrel cán bộ, công chức, viên chức, nŭih pah kan Văn phòng Quốc hội ƀư ueh nuih n’hâm rđau kan bah Tổng Bí thư Nguyễn Phú Trọng tâm rơh mâp măt ndrel rhơn tết ăp rđau kan, rđau kan Đảng, Ngih dak, lah: “năm 2023 hŏ tâm rnglăp hôm, năm 2024 ân geh tâm rnglăp lơn đŏng. Năm 2023 hŏ geh nau dơi hôm, năm 2024 ân geh dơi rlau ma nê đŏng”.

Di rnôk năm mhe, Kruanh Quốc hội Vương Đình Huệ rhơn ăp ntoh măt Quốc hội, ăp ntŭk kan bah Quốc hội, ăp ntŭk kan bah Uỷ ban Rnâng kan bah Quốc hội, cán bộ, công chức, viên chức, nŭih pah kan bah Văn phòng Quốc hội geh du năm Giáp Thìn nâp nâl.

Bah năp nê, Tổng thư ký, Kruanh Văn phòng Quốc hội Bùi Văn Cường hŏ mbơh nau tă geh bah nau kan tâm rnôk Tết năm mhe Giáp Thìn 2024. Tĭng nê, Uỷ ban Rnâng kan Quốc hội hŏ mbơh, đă Rnâng kan Hội đồng Dân tộc, ăp Uỷ ban bah Quốc hội, Văn phòng Quốc hội, ăp ntŭk kan bah Uỷ ban Rnâng kan Quốc hội ƀư rjăp nau ntrŭnh mrô 26 bah Ban Bí thư, rđau mrô 30 bah Thủ tướng Chính phủ, nkre nkah ƀư ueh nau kan kơl an, mât chăm nau rêh drăp ndơ ndrel nuih n’hâm bah cán bộ, công chức, viên chức, nŭih pah kan, ăp rnăk vâl dơi kơl, nŭih geh nau rêh jêr jŏt.

Ăp nau kan khâl, rhơn tết bah Kruanh Quốc hội, ăp Groi Kruanh Quốc hội, ăp uỷ viên Rnâng kan Quốc hội tĭng nau pă, đăp mpăn nâp, ueh, têm nkrem, săk tam ndrel tâm di ma nau ngăn.

Ăp ntŭk kan bah Quốc hội, ăp ntŭk kan tâm Uỷ ban Rnâng kan Quốc hội hŏ mbơh rjăp ndal nau ntrŭnh ăp nau kan, nau nchrăp geh ƀư tâm nau kan năm 2024 đăp mpăn tâm di nau dơi./.