Mpeh ăp nkô̆ nau kan tơm tâm khay 2, Kruanh Quốc hội đă ăp ntŭk kan rgum ƀư ueh ân Rơh rƀŭn bah Uỷ ban Rnâng kan Quốc hội nchră geh ƀư nau ntrŭnh Đại hội Đảng lam dak tal XIII. Du nkô̆ nau khlay êng nê lah Rơh rƀŭn lam dak lôch nau kan Hội đồng nhân dân ăp n’gor, nkuăl ƀon têh tâm Trung ương (nchrăp ƀư tâm Quảng Ninh).

Mpeh ăp nkô̆ nau kan tâm 3 khay bôk năm ndrel lôch năm, Kruanh Quốc hội Vương Đình Huệ đă Uỷ ban Pháp luật ƀư tơm nau ndâk Bôk nau nchrăp luật, pháp lệnh năm 2024, ntrơn rgâl Bôk nau kan ndâk njêng luật, pháp lệnh năm 2023, ăp ntŭk kan êng nchrăp tâm rgop đah ăp ntŭk geh tât mpeh nau ƀư bôk nau kan gay ma mbơh Uỷ ban Rnâng kan Quốc hội, Quốc hội geh nau dơi.

Êng mpeh nau nchrăp Luật neh ntu (rgâl nkra), Kruanh Quốc hội đă ăp ntŭk kan mât nâp nuih n’hâm nau ntrŭnh bah Uỷ ban Rnâng kan Quốc hội mpeh nau sŏk nau rgop bah ƀon lan, tâm nuih n’hâm nsôih tâm rnoh prêh ngăn, ƀư jêh ndrel ndŏ Uỷ ban Rnâng kan Quốc hội tâm khay 3. Geh tât nau kan mêt uănh, Kruanh Quốc hội Vương Đình Huệ, đă:

‘Ntrŭnh ƀư ăp nau kan mêt uănh bah năm aơ, 4 nkô̆ nau mêt uănh khlay, kơt: ŭnh nar, săm ƀŭt nti, nau ƀư săm ƀŭt ntĭm nti kon se, 3 bôk nau kan bah neh dak, ăp nau kan bah dak si, ăp nau kan aơ kŏ geh jêr ndrel duh, vay n’hao nau kan mât uănh tât nau kan văng sa, ăp ntil ntŭk nti ƀư tơm prăk, chứng khoán, ntŭk tăch rgâl neh, ntŭk ƀư trái phiếu ntŭk kan tăch rgâl. Hội đồng Dân tộc, ăp uỷ ban mĭn gay ma săch nkô̆ gay đă rgum mbơh, ơh ăp nau kan geh ntoh rnôk aơ, kơt nau đăng kiểm lah nau kan dŭt jêr. Ăp nkô̆ nau aơ, lah kâp Quốc hội ôp ri mbơh, ri ma ân geh ƀư nkre. Ndri ma, Hội đồng dân tộc, ăp ntŭk kan Quốc hội săch nau kan ngăn, tâm dăch ma nau rêh, mô dơi lôch ƀư, jêh ri nchlơi, kŏ mô ân geh nau mhe mham. Nau kan ntoh mhe ri nơm ân geh ăp nau kan mhe”.

Tĭng nau nchrăp, Uỷ ban Rnâng kan Quốc hội, Quốc hội mra ƀư ôp nau gay mêt uănh ăp nau kan ntoh tâm nau rêh. Kruanh Quốc hội nkah ân nau đă săch nau kan tâm di, ngăn kŏ kơt lah lŏ mĭn gay rgala mhe nau kan ndrel nau ôp:

“Nau kan mô di lah nchâp đă Kruanh n’gâng kan, kruanh ăp ntŭk ma ndrel ƀư ân kloh ăp nau kan gay rklaih nau kan mpeh nau rêh dôl geh. Kloh, rjăp, ƀư kloh ăp nau kan, gay joi luh nau doh rklaih nau jêr. Mpeh nau nchrăp ăp nkô̆ mêt uănh năm ba kơi, tĭg gâp, nơm ân uănh nau ƀư ăp nau ntrŭnh mpeh bôk nau kan ndâk hun hao văng sa, ăp nau kan tơm bah neh dak, ăp nau ntrŭnh bah Trung ương, nau ntrŭnh bah Quốc hội, jêh ri Chính phủ ƀư ăp nau kan gay nơm geh ƀư, kơp uănh tay nau kan mêt uănh nau ntrŭnh pháp luật bah Hội đồng dân tộc, ăp Uỷ ban mpeh nau ntrŭnh kan mêt uănh ma tĭng nau ntĭm mbơh bah Rnâng kan Quốc hội đah HĐND ăp gưl, mô lah nau kan ntuh kơl tâm rơh tât aơ ân geh kơp, mhâm ƀư joi luh nkô̆ nau ƀư mbrơi ngăn kơt nê”.

Năm aơ, Quốc hội mra ntơm sŏk phiếu rnơm kan yor Quốc hội săch ndrel ân, ndri ma, Kruanh Quốc hội lah rjăp, nau nchrăp gay ntoh măt Quốc hội nchră n’hêl mpeh nau rnơm bah ăp nŭih kŏ lah nau kan khlay bah Hội đồng Dân tộc, ăp Uỷ ban, ăp Rnâng kan bah Quốc hội ndrel Uỷ ban Rnâng kan Quốc hội. Kruanh Quốc hội kŏ đă nchrăp ueh ndrel ơm ân ăp nkô̆ nau kan, tơm prăk Ngih dak, nau tâm nchră tâm nghị viện, tâm nê ăp rơh hăn khâl dak ba dih bah Kruanh, ăp Groi kruanh Quốc hội, Hội nghị sĩ mom tâm lam ntur neh yor dak nơm ƀư tơm leo trong./.