Nau kan săch nŭih kan geh ƀư rjăp tĭng di nau ntrŭnh bah Đảng, Pháp luật bah ngih dak, geh dơi nau tâm ban prêh ngăn bah ăp ntoh măt Quốc hội, Quốc hội hŏ nchră nau ntrŭnh mpeh nau ân ƀư ntop groi Thủ tướng đah 432/432 ntoh măt Quốc hội tâm di nau. 3 nŭih geh ân săch ƀư Groi Thủ tướng, geh: Uỷ viên Bộ Chính trị Nguyễn Hoà Bình, Uỷ viên Trung ương, N’gâng kan Tơm prăk Hồ Đức Phớc ndrel Uỷ viên Trung ương, N’gâng kan nchră nau Bùi Thanh Sơn. Săch ntop ƀư Kruanh n’gâng kan tư pháp đah wa Nguyễn Hải Ninh ndrel Kruanh n’gâng kan Tài nguyên ndrel Môi trường đah wa Đỗ Đức Duy.

Ntoh nau tâm nar rƀŭn, ntoh măt Quốc hội, Uỷ ban Rnâng kan Quốc hội, Kruanh Quốc hội Trần Thanh mẫn lah ueh nau rđau kan tâm dăch bah Rnâng kan rđau kan Trung ương Đảng, N’gâng kan chính trị, Ban Bí thư, ngăn lah Tổng Bí thư, Kruanh dak Tô Lâm tâm nau nchrăp ndrel ƀư rƀŭn. Ăp ntoh măt Quốc hội ntoh n’hao nuih n’hâm kan, tâm nchră dŏng, ntrŭnh kan geh dơi nau tâm ban, tâm di prêh. Kruanh Quốc hội Trần Thanh Mẫn lah rjăp:

            ‘Phung he rnơm lah, đah nau rđau kan bah Đảng; nau lăp kan bah lam ntrong kan chính trị, ăp gưl, ăp ntŭk kan; nau nsôih bah lam Đảng, lam ƀon lan, lam tahen, nsum mpôl ntŭk ƀư kan tăch rgâl, nŭih ƀon lan nơm tâm dak ba dih, ngăn lah neh dak nơm mra rlet nau jêr, nau ntul rlong, ƀư jêh prêh ngăn ăp nkô̆ nau hun hao văng sa, rêh jêng, đăp mpăn rnă njrăng, nau kan tâm nchră ma dak ba dih ndrel njrăng rdâng sa khma, mpŭng lir bah năm 2024, rgop nau ƀư dơi nau ntrŭnh Đại hội  ntoh măt lam dak tal 13 bah Đảng; nchrăp ân Đại hội Đảng bộ ăp gưl, rƀŏng tât Đại hội ntoh măt lam dak tal 14 bah Đảng”.

Jêh rnôk lôch rơh rƀŭn, Văn phòng Quốc hội rƀŭn mbơh, nau mbơh nau tă dơi geh bah rơh rƀŭn. Tổng thư ký Quốc hội, Kruanh Văn phòng Quốc hội Bùi Văn Cường mbơh: rơh rƀŭn tal tal 8, Quốc hội gưl 15 hŏ geh nau dơi ueh, ăp nŭih kan geh ntơm săch mô lah ân ƀư geh dơi nau tâm ban nau rnơm prêh:

 ‘Kruanh dak ri tâm nau ntrŭnh bah Trung ương khay 10 aơ mra săch. Kruanh n’gâng kan tơm prăk nkre ƀư nau kan ân tât rnôk geh săch Kruanh n’gâng kan mhe. Hôm Kruanh n’gâng kan nchră nau ri Groi Thủ tướng lŏ ƀư Kruanh rnoh nŭih kan bah Chính phủ, bôk năm kan ri nau ntrŭnh bah Quốc hội nchrăp geh 4 Groi Thủ tướng, mhe nơh tâm ban ntơm 4 Groi Thủ tướng hao 5 Groi Thủ tướng. Rnoh moh săk hŏ săch hôm, 2 nŭih ƀư Groi Thủ tướng hŏ geh ndrel 3 nŭih kan mhe dơi geh ân ƀư lôch lah jêng 5”.

 Kruanh Ban nau kan ntoh măt Nguyễn Thanh Hải kŏ mbơh: tĭng nau ntrŭnh bah Trung ương, ntơm bah rnôk aơ tât lôch năm 2024 mra rgum ƀư jêh ăp nau kan rđau kan gưl prêh ndrel gưl uỷ, n’gâng kan ăp gưl, gay n’hao nau rđau kan bah Đảng đah nau kan hun hao văng sa, rêh jêng, văn hoá, neh dak, rnă njrăng, tâm nchră đah ba dih ndrel nchrăp ân Đại hội Đảng ăp gưl rƀŏng tât Đại hội Đảng lam dak tal 14 bah Đảng. Nau kan ƀư rjăp nŭih kan gay đăp mpăn trong kan chính trị ân jêh lôch lơn, tâm rnglăp lơn, ueh lơn, nau kan săk tam, geh nau tam lơn ndrel pơk trong nơih ân ueh lơn ân hun hao văng sa rêh jêng; n’hao nau rehe bah ƀon lan; n’hao nau tâm dăch ma ƀon lan ƀư nâp nau rnơm bah ƀon lan đah Đảng ndrel Ngih dak:

‘Cán bộ rnôk aơ geh pă tĭng ntrong geh hao, geh jur, geh lăp, geh luh tĭng nau đă nau kan, nau ŭch pah kan ndrel nau dơi ƀư jêh nau kan bah ăp nŭih n’hêl. Nau kan Quốc hội ân săch ƀư 3 Groi Thủ tướng, 2 Kruanh n’gâng kan nar aơ, nchră ăp nau ntrŭnh geh nau dơi prêh rlau 90% ntoh nau “nuih n’hâm bah Đảng, nau ŭch bah ƀon lan”, “Đảng đă, ƀon lan săch” geh nau tâm ban kơl an, nau rnơm prêh bah ntoh măt Quốc hội ndrel ntoh măt bah nŭih ƀon lan”./.