Bah năp nau khih ndơ sa geh âk, wa Nguyễn Minh Tâm, rmôt kan bah n’gor Quảng Bình đă Chính phủ, Quóc hội lŏ ƀư jêh nau kan, pháp luật gay njêng trong kan pháp lý mpeh nau mât đăp mpăn ndơ sa, ngăn lah geh tăch tâm trong. Tâm nau njrăng, rdâng rtoh ŭng sa, wa Nguyễn Minh Tâm kơp dơn: Hôm nau kan “klơ duh, tâm dâng n’ik” tâm nau ƀư ăp nau kan nkân njrăng nau aơ:

 ‘Rơh rƀŭn tal 5, Kruanh n’gâng kan ndâk nkra lah rjăp mra ndrel ma N’gâng kan Công an gay ƀư đăp mpăn nau njrăng rdâng ŭnh sa, mpuh n’hât ŭnh. Rơh rƀŭn tal 6 âk ntoh măt ntoh nau rvê nau kan njrăng rdâng ŭnh sa, Chính phủ kŏton ndrel kŏ rđau ƀư rjăp nau mêt uănh nau kan njrăng rdần rtoh ŭnh sa, ngăn lah tâm ăp đô thị têh, yơn ăp nau ŭnh sa têh mhe rlau ân saơ kơt lah nơm lŏ mô dơi rjăp bah năp nau tât bah ŭnh sa. Ŭch ăp n’gâng kan lŏ ƀư kan rjăp, năn, rklaih ngăn nau klơ duh tâm dâng n’ik gay ăp nau đă bah Chính phủ năn geh ƀư gay rdâng nau ji, nau roh hoach tă bah rtoh ŭnh sa tâm rơh tât”.

Tâm nau kan ntĭm nti, wa Trần Đình Gia, rmôt kan bah Hà Tĩnh ân lah, rnôk ƀư nau rgâl mhe nau kan, ndrôm săm ƀŭt ntĭm nti phổ thống, âk ndơ dŏng kơl an ntĭm nti ê geh ntuh kơl tâm ban, ntŭim nti nai ntĭm kon se ăp môn rgum hôm âk nau jêr...Mpeh nau mât njrăng nau ntĭm nti ntop tay, wa Trần Đình Gia, rgop nau:

‘Nti ntop tay lah nau ŭch geh bah âk nŭih, lah dơi geh mât, ntĭm mbơh ân tam, yơn ăp nau ntĭm mbơh mât, ƀư nau ntĭm nti ntop tay bah di ngih săm ƀŭt ri huch, geh tât du đê̆ nŭih ndăn nau geh ƀư khuch tât ntŭk kan. Nau aơ, ntŭk kan ntĭm nti ân geh nau ntĭm mbơh”.

Nchră tâm rơh rƀŭn nkoch ân geh ntuh kơl ntŭk ntu ngih dak si, wa Nguyễn Lân Hiếu, rmôt kan Bình Định lah rjăp: Lah ƀư tĭng nau kan ơm ntoch jong, mô geh nau tam ndrel đă ân geh nau rklaih:

‘Gâp đă tâm rnôk aơ ân geh ntuh kơl ƀư nau kan ân dak si tâm nkuăl yor lah ntŭk trong dak si dôl mô ueh n’ăp ma kon nŭih ndrel ntŭk ntu ƀư kan. Nŭih ji geh nau dơi hăn săm mpeh ba lơ, ăp nŭih hôm e lah nŭih ach o, nŭih ji jâk, ƀư mbăk jâk tâm ntŭk kan’.

 Lah rjăp nau khlay bah bôk nau kan ndâk njêng ƀon lan mhe ƀư nau rêh văng sa, rêh jêng geh n’hao lơn, yơn wa Nguyễn Văn Huy, rmôt kan bah n’gor Thái Bình rvê nau ƀư mô nâp văn hoá. Âk ntŭk geh nau mât nau vay ơm, ntŭk nkah ơm văn hoá, ntŭk rƀŭn rgum nsum geh ƀư hvêt, ăp nau nkoch mbơh mpeh nau mĭn mô tâm di hŏ ndrel ma dôl geh nau khuch, lơh mô ueh tât nau rêh bah nŭih ƀon lan tâm nkuăl ƀon lan gŭ:

 ‘Gay rgop âk lơn tâm nau ntrŭt dăng ƀon lan mhe, ƀư jêh ăp nau kan văn hoá tâm nau ndâk njêng ƀon lan mhe lah êng, gâp đă Chính phủ rgum ƀư nau mĭn râng nchră đă nau ndâk ăp luật mpeh văn hoá, ăp nau jêr mpeh nau geh ntuh kơl hŏ lơh khuch ngăn tât nau hun hao nau ơm, đă Chính phủ kơl an kơp, ntĭm nti gay nau ntrŭnh ân geh n’hêl lơn tay, tâm di kloh lơn tay mpeh ƀon lan mhe lah ăp nkô̆ nau geh tât nau kan văn hoá”.

 Kŏ tâm pơh rlau aơ, Quốc hội rgum tâm nchră tât nau kan văng sa, rêh jêng ndrel tơm prăk Ngih dak năm 2023 ndrel ăp khay bôk năm aơ. Ăp ntoh măt nchră, văng sa bah dak nơm mât nau hun hao ueh, văng sa nsum geh nau đăp mpăn tâm lam ntur neh dôl geh âk nau ê dơi. Lah rjăp nau ang ueh ngăn ân geh kơp dơn nê lah nkual ƀư nau kan tuch tăm lŏ ƀư rjăp nau kan n’gâng tơm bah jâng văng sa, ăp ntoh măt kŏ đă ân geh nkân uănh nau pơk bah jâng văng sa, kơl an ngăn tât ntŭk kan tăch rgâl bah 100 rkeh nŭih, nkre n’hao nau pă dơl kan, nau kan ân ăp nkuăl gay ƀư ueh nau dơi nchrăp êng, nau blau mhe, nau dơi mhe./.