Pơh rlau aơ, Rmôt kan mêt uănh bah Uỷ ban Rnâng kan Quốc hội hŏ pah kan đah UBND n’gor Bình Định mpeh nau ƀư nau ntrŭnh bah Quốc hội mpeh rgâl mhe bôk nau kan ndrôm săm ƀŭt ntĭm nti phổ thông. Tĭng nau mbơh, n’gor Bình Định hŏ ƀư jêh nau kan ntĭm nti tĭng Bôk nau kan ntĭm nti phổ thông năm 2018 ân rlau 12.700 nai nti kon se ndrel cán bộ mât nau ntĭm nti phổ thông. N’gâng kan ntĭm nti n’gor Bình Định ntrŭnh nkra, dŏng săm ƀŭt ntĭm nti ân n’gor jrâu 1,2,3,6,7 ndrel 10 tĭng nau đăp mpăn tŏng geh nau ueh, nâp ân ăp ntŭk ntĭm nti bah n’gor tĭng nau ŭch.

Tâm nar pah kan đah rmôt kan mêt uănh bah  Rnâng kan Quốc hội, UBND n’gor Bình Định đă Ngih dak pă dơm ân kon se rnoi mpôl đê̆, gôl yôk, nkuăl jru ngai, đă N’gâng kan ntĭm nti ơm pă nau kan thi tốt nghiệp Trung học phổ thông ntơm năm 2024-2025 ân ăp nkual nchrăp ueh lơn tâm nau kan.

Groi Kruanh Rnâng kan Quốc hội Trần Thanh Mẫn đă n’gor Bình Định lŏ ơm ƀư ueh ăp nau tă dơi geh, rklaih ăp nau nkol bah N’gâng kan ntĭm nti ma rmôt kan hŏ nchŏng luh, rgum ăp tu tơm gay ma hun hao nau kan ntĭm nti, ntrŭt dăng nau ntrơn rgâl mrô tâm nau ntĭm nti:

 ‘N’hao nau nâp ƀư ueh ân ăp nŭih nai ntĭm nti kon se ndrel cán bộ mât nau kan ăp gưl. Ntrŭt dăng nau ntrơn rgâl mrô dŏng dơi nau dŏng công nghệ mhe, tâm rgop nsum gay ma dŏng ân geh săk tam ăp nau kan, bôk nau kan nkô̆ nau bah neh dak, ăp tu tơm rgum tâm di pháp luật tă bah ƀon lan gay ntop tay nau ntuh kơl ân nkual rnoi mpôl đê̆, nkuăl jêr jŏt”.

Rmôt kan mêt uănh bah Uỷ ban Rnâng kan Quốc hội ân lah, nau ntrŭnh nau rđau mhe, ntĭm mbơh ƀư nau kan ntĭm nti phổ thông 2018 bah n’gor Bình Định geh ƀư rjăp, ntĭm nti chính trị-pháp lý geh nau nơih ueh ân ăp ntŭk kan, n’gâng kan, nkuăl ƀư.

 Ndrel tâm rơh rlau aơ, Groi Kruanh Rnâng kan Quốc hội trần thanh Mẫn ndrel rmôt kan bah Uỷ ban Rnâng kan Quốc hội hŏ pah kan đah UBND n’gor Hưng Yên mpeh nau ƀư nau ntrŭnh bah Quốc hội mpeh nau rgâl mhe nau kan ntĭm nti phổ thông. Bí thư n’gor uỷ Hưng Yên Nguyễn Hữu Nghĩa mbơh, n’gor kơl an ntuh kơl ntŭk ntu ân nau kan ntĭm nti, tâm nê nau tơm lah ndâk ngih săm ƀŭt, jrâu nti, nsôih tŏng dơi nau ŭch ntĭm nti bah ăp kon se nti:

‘Ntơm bah bôk năm kan phung hên hŏ ntrŭnh nau ntrŭnh mrô 12 mpeh “Hun hao ntĭm nti n’gor Hưng Yên tât năm 2025 ndrel rƀŏng tât năm 2030”. Nau ntrŭnh ntoh nau nkô̆ nau kan rgum, ăp nkô̆ nau hun hao n’hêl, mô knŭng rklaih ăp nau kan mpeh ntŭk ntu ƀư kan ndrel tâm rgop nsum ma nau ntrŭnh bôk nau kan ntĭm nti, ndrôm săm ƀŭt nti mhe tâm rơh tât aơ, rgum tâm 5 nkô̆ nau tơm: ngoai-kon nŭih, ngăn lah nai nti kon se ndrel rmôt mât nau kan bah ntŭk kan ntĭm nti, bar lah ntŭk ntu dŏng kan, ndơ dŏng, pe lah geh tât nau pă tơm nŭih kan, puăn lah ntrŭt dăng nau kơl an ndrel ndrel 5 lah geh tât nau kan ƀư ntrŭnh bah nau kan aơ”.

 Ntoh nau tâm nar pah kan, Groi Kruanh Rnâng kan Quốc hội Trần Thanh Mẫn đă, tâm rơh tât, n’gor Hưng Yên lŏ kơp, nchră nau rgum ntrong kan ntĭm nti, gay uănh, ntrơn rgâl tŏng dơi ueh lơn nau ŭch bah nŭih nti ndrel n’hao nau nâp ntĭm nti ăp ntil:

“Rgum tu tơm ntuh kơl ân ntĭm nti, ân geh ntrŭt dăng tay lơn nau kơl an tâm nau rêh ntĭm nti. Rnôk aơ geh âk ngih săm ƀŭt ndâk êng, âk nai nti ƀư êng nau kan ri nơm ân geh nau dŭt n’hâm rhơn, ŭch ngăn, geh nau nơm ân mât dơm. Nau ntrŭt dăng nau pă gưl, pă nau kan, n’hao nau mât ƀư êng đah nau ndơn nau kan tâm ăp ntŭk ntĭm nti, jêh ri n’hao nau kan mêt uănh, rklaih mhal nau tih tâm nau kan ntĭm nti./.