Lơ 19/7, Rmôt hăn kan mêt uănh bah Quốc hội yor Thượng tướng Trần Quang Phương, Groi Kruanh Quốc hội ƀư tơm rmôt hŏ geh nar pah kan đah rđau kan n’gor Dak Lak mpeh nau ƀư nau ntrŭnh bah Quốc hội, geh: Nau kan bah neh dak ndâk njêng ƀon lan mhe, bôk nau kan n’huch ach o nâp nâl lvang năm 2021-2025 ndrel nau hun hao văng sa, rêh jêng nkual rnoi mpôl đê̆ ndrel gôl yôk lvang năm 2021-2030.

Mbơh đah rmôt kan, jêh bơi tât 3 năm ƀư 3 nau kan bah neh dak, nau ueh ƀon lan mhe ta Dak Lak geh âk nau dơi. Nau rêh nŭih rnoi mpôl đê̆ ăp nhoat geh rgâl, nau ơm, nau rêh âk nau mhe, rnoh ach o huch. Nau rêh drăp ndơ bah ƀon lan geh nau kơl an tât nau nâp. Ntrong kan chính trị geh nâp. Đăp mpăn chính trị rêh jêng geh mât.

 Yơn lah, êp ăp nau tă dơi geh, tâm nau ƀư 3 nau kan bah neh dak ta Dak Lak kŏ mâp nau jêr. Du đê̆ nau nchrăp jêr geh dơi. N’huch ach o ê nâp, mra geh ntoh tay ach o.

Nchŏng luh nkô̆ nau jêr tâm nau ƀư 3 nau kan neh dak, ăp ntoh măt ân lah: Nau dơi ndrel nau blau bah rmôt cán bộ ƀư nau kan ôt tŏng blau. Tơm prăk ƀư nau kan mbrơi khuch tât nau ngăch, nau ƀư. Ndrel ma nê, du đê̆ nau kan, nkô̆ nau bah 3 nau kan neh dak ê geh ƀư ngăn ndrel pă tơm prăk ê geh nau mbơh tâm ban, tŏng tă bah Trung ương ndrel ăp n’gâng kan. Wa Đinh Xuân Hà, Giám đốc n’gâng kan nchrăp kan ndrel ntuh kơl n’gor Dak Lak mbơh:

 “Hŏ geh nau ntrŭnh hŏ geh rgâl, ntop, yơn lah hôm tâm rkăng. Ngăn lah nau ntrŭnh aơ hôm geh têk leo, ntrŭp ma nau êng, răk nau ntrŭnh êng lŏ tĭng du nau ntrŭnh êng đŏng. Ngoai tâm ăp nau nê lŏ geh tât ntŭk êng tâm rnôk ƀư ri ăp ntŭk nkuăl lŏ geh ăp ntŭk kan mĭn kơt nau êng”.

 Bí thư n’gor uỷ Dak Lak Nguyễn Đình Trung kŏ mbơh ăp nau jêr, ê dơi kơt: Nua jao neh ân kônh wa rnoi mpôl đê̆ hôm âk nau nkol, ân geh nau kan tâm di ma nau ngăn; nau kan cán bộ ƀư kan tâm dâng kŏ geh âk nau tâm di ma Tây Nguyên, nkô̆, nŭih bah nau kan lvang năm 2021-2025 geh âk nau mhe ri ma nau kơp, năl nau pă, mbơh rnoh kan ntuh kơl hôm vĭ vĕ...

Ntoh nau tâm nar pah kan, Thượng tướng Trần Quang Phương, Groi Kruanh Quốc hội kơp dơn ăp nau tă geh dơi ƀư bah neh dak đah nau ndâk njêng ƀon lan mhe ma Dak Lak tă dơi geh. Nkre lah, đah nuih n’hâm uănh gay ma ndrel tâm rklaih nau jêr, nchră nau pah kan tâm n’gor, Groi Kruanh Quốc hội đă:

‘Ăp nŭih rđau kan bah n’gor ân geh nau rđau đă, djăt, geh nau mbơh đă djăt, geh nau mbơh ntop ăp nau đă bah rmôt ƀư nau kan ndrel ăp nŭih, nchih ăp nkô̆ hôm kol gay lŏ geh nau đă. Tal bar, lŏ kơl rđau rjăp lơn, n’hao nau kan bah Rnâng kan rđau kan ndrel tâm rgop ngăn đah ăp ntŭk kan, rmôt kan rgum n’hâm dăng nsum gay ăp nhoat rgala nau mơng tuch tăm gay ma hun hao văng sa rêh jêng”.

Rơh rlau aơ, Quốc hội ƀư nau nchrăp mêt uănh nau ƀư kan bah neh dak năm 2023 tâm 3 nkuăl. Ngăn lah: Mêt uănh, uănh nau geh ngăn ndrel pah kan sŏng đah 14 n’gor nkuăl Trung du ndrel gôl yôk Bắc Bộ tâm n’gor Yên Bái; Mêt uănh nau ngăn geh ndrel pah kan ngăn tâm rgop ƀư trực tuyến đah 19 nkuăl bắc Bộ ndrel Duyên hải miền Trung ndrel Tây Nguyên tâm n’gor Bình Định, mêt uănh nau ƀư ngăn ndrel pah kan sŏng tâm rgop ma trực tuyến đah 13 n’gor nkuăl Đồng bằng Sông cửu Long tâm n’gor Bạc Liêu.

Groi Thủ tướng kŏ jao ân N’gâng kan nchrăp kan ndrel Ntuh kơl ƀư tơm, tâm rgop mbơh đah ăp N’gâng kan, ntŭk kan: Tuch tăm ndrel hun hao ƀon lan, Lao động-thương binh ndrel Xã hội, Uỷ ban Dân tộc ndrel ăp N’gâng kan, ntŭk kan, nkuăl geh tât nau mbơh, tài liệu kơl an ăp nar pah kan đah ăp nkuăl, rmôt kan geh tât gay ma mbơh, săm ƀŭt ƀư nar pah kan ma ăp nkual, tâm nê nkah tât nau tă geh dơi, mbơh ăp nau kan ueh, nau blau mhe tâm nau ndâk, ƀư jêh nau kan, nau ntrŭnh ndrel ƀư mêt uănh, pă tơm prăk ƀư ăp nau kan neh dak tâm ăp nkuăl, kơp uănh, saơ ăp nau jêr, kol gay ma đă ăp nau kan ngăn gay ma doh rklaih, ntrŭt dăng ngăch nau ƀư nau kan. Văn phòng Chính phủ tâm rgop đah ăp N’gâng kan, ntŭk kan, nkuăl geh tât nau nchrăp ƀư nkô̆, bôk nau kan ndrel nau dơi êng êng khlay gay ma ƀư nau nchrăp kan ngăn./.