Rlău du khay aơ, kơp bah nar sĭt gŭ tâm jay tâm rŏng yor công an ƀư an, wa H’Wăn Byă 56 năm deh, ta thôn 2, xă Ea Siên, nkual têh Buôn Hồ hôm e nâm ơm nău răm m’ak. Wa nkoch, nău rêh me rong kon êng, âk năm hăn gŭ manh, 2 sào neh ƀư mô tŏng sa, jêng nău geh jay ƀư nâp nâl kơt du nău mbơi.

Băng: Đah Công an ƀư an du mlâm jay gâm răm ngăn. Bah rnôk trơn ta aơ saơ săk soan uĕh lơn, nuih n’hâm rhơn đŏng, mô hôm rvê đah jay gŭ tay. Gâp ranh hôm, mô hôm soan pah kan, mô dơi ƀư luh prăk gay ƀư jay mhe. Hôm gŭ manh jay bah nô bu klô mro mô dơh. Lah uĕh rmôt công an n’hanh ăp gưl nău kan.

Geh nsum nău răm đŏng rnôk gŭ jay mhe di rơh aơ, wa Trần Anh Dũng 58 năm deh, ta thôn 3, xă n’har bri Ea Bung, nkuăl Ea Sup, n’gor Dak Lak, nkoch:

Năm 1980 rnăk wâl gâp bah Đà Nẵng hăn Ea Súp ndâk njêng nău kan. Yor jêr jŏt an gŭ tâm jay si truh sat mô tât 20 m2, mih ri truh, duh ri nsŭk m’hŭl. Dơi Công an nkuă Ea Súp n’hanh ăp gưl ƀư an jay kloh uĕh, aƀaơ geh jay mhe gŭ rêh mô rvê mih, nsŭk m’hŭl hôm, rnăk âl gâp dŭt răm.

Ea Sup lah nkuăl bôk năp ta Dak Lak jêh rnoh an ƀư dơi jao lah ndâk ƀư 80 mlâm jay an ăp rnăk jêr jŏt bah năp yan mih dak lip. Đại úy Hoàng Thế Quang, Đội trưởng đội tham mưu, Công an nkuăl Ea Súp nkoch nău blău ơm.

Công an nkuăl Ea lĕ dăn đă ăp ntŭk kan pă lŭ loih xi măng kơt ăp nuĭh ndranh ƀư manh lŭ loih xi măng n’hanh ntop kơl lor prăk nar luh, gay ngăch jêh ƀư ăp jay kơl ăp rnăk wâl.

Dak Lak lah n’gor geh rnoh nuĭh ƀon âk ngăn Tây Nguyên đah 1,95 rkeh nuĭh, 49 rnoi nuĭh oh nô gŭ rêh ndrel. Rnoh rnăk ach o bah n’gor aƀaơ hôm e bơi 8%. Kơl ăp rnăk bah oi jêr jŏt, bah n’gul khay 3/2024, N’gâng kan Công an mbơh ƀư bôk nău rgop an tâm nchră ndâk ƀư 1.200 mlâm jay tâm kơl ta Dak Lak. Du mlâm jay khlay 80 rkeh prăk, tâm nĕ N’gâng kan Công an ntop kơl 50 rkeh prăk, n’gâng kan ƀon lan manh hôm ƀa ƀă; công an ăp nkuăl, xă ntop kơl nar luh. Jay xây tĭng 36B (N’gâng kan Công an), rnoh neh 36 m2, đah mpir gạch, chor ntưm tôl, mpông loih n’hanh neh ntă gạch men. Tĭng Thiếu tướng Lê Vinh Quy-Giám đốc Công an n’gor Dak Lak, tât rnôk aơ, lam n’gor lĕ jêh bơi 500 mlâm jay jao an nuĭh ƀon lan dŏng. Aƀaơ Công an ăp nkuăl, nkual têh, nkual ƀon têh dôl ntrôl ngăch gay ƀư jêh lĕ rngôch ăp jay bah năp lơ 30/10/2024:

Mpôl hên tâm rgop đah ăp n’gâng kan, nău kan, n’gâng kan ƀon lan ăp ntŭk n’hanh n’hao rmôt kan rƀŏng tât bah dâng gay ntop kơl an kônh wa đah nar luh, đah soan ndâk ƀư n’hanh ndoh ndơ ƀư jay an kônh wa. Rlău ma đăp mpăn uĕh nâp, công an n’gor đă đŏng công an ăp nkuăl an jêh tâm rnôk ơm ngăn jao an ăp rnăk, nta nơih an kônh wa đăp mpăn pah kan jan sa.

Bôk nău rgop an tâm nchră 1.200 mlâm jay tâm kơl an ăp rnăk jêr jŏt dơi uănh mĭn dŭt n’hâm bah N’gâng kan Công an đah nuĭh ƀon lan n’gor Dak Lak. Nău ƀư aơ rgop ngăn ngên đăp mpăn nău rêh jêng, ndâk njêng ƀon lan mhe, ntrôl ntrong leo “Lâm ƀon lan mât rnă njrăng bri dak”; rƀŏng tât mbah rhơn nkah gĭt 120 năm Nar ndâk njêng n’gor Dak Lak.

Ta năp nĕ, Công an n’gor Dak Lak n’hanh Công an nkuăl Cư Kuih lĕ tâm rgop đah n’gâng lan ƀon lan lĕ ƀư ntơm ndâk nkra “Jay tâm kơl” an nuĭh bên, rnăk wâl tahen khĭt CAND Trần Quốc Thắng, tă ƀư đội Công an xă Ea Tiêu khĭt tâm rơh ƀư rŭng răng lơ 11/6.

Ƀư tĭng nău ntrŭnh bah Đảng, Ngih dak n’hanh N’gâng kan công an mpeh trong kan mât uănh tahen sôt rmanh, rnăk wâl tahen khĭt, nuĭh geh soan đah cách mạng, năm bah năp, Prăk nkrem tâm kơl oh nô N’gâng kan Công an; Prăk nkrem tâm kơl oh nô Công an n’gor Dak Lak ndrel đah nău rgop, ntop kơl bah lĕ rngôch rmôt Công an ta lam dak lĕ uănh tât, ntop kơl du gâl prăk 500 rkeh prăk gay ndâk ƀư “Jay tâm kơl” an nuĭh bên rnăk wâl Thiếu tá, Trần Quốc Thắng lĕ khĭt.