Ta Đại hội Hội sinh viên Việt Nam tâl XI mhe ƀư khay 12 năm 2023 mhe aơ, âk đại biểu hŏ mpơl nău nđơr, nău rôih dăng bah sinh viên Việt Nam tâm n’gâng kan rdâk njêng n’hanh mât njrăng neh dak. Ŭch rŏng n’hanh geh ăp trong blău ƀư mhe gay rdâk njêng Trung ương Hội nâp dăng.

Tâm năm kan mhe aơ, trong leo “Sinh viên 5 uĕh” lah trong kan sinh viên tơm khlay tay; dơi ăp gưl Hội Sinh viên Việt Nam rgum an ƀư rloh rlău đah âk trong nkra mhe, blău ƀư mhe. Gay saơ kloh lơn nău dơi geh, ntrŏng ăp trong nkra rgâl mhe tâm pah kan an ƀư trong leo kan “Sinh viên 5 uĕh” tâm let năp tay, Võ Đức Phúc, ntơh măt Hội Sinh viên Việt Nam Nkual ƀon têh Hồ Chí Minh an lah: rgâl mhe lah nkô̆ nău tơm khlay, lah n’gâng sơn bah trong leo geh nău ntrŭnh rgum, ân sŏk sinh viên lah nuĭh rgum tơm tâm trong leo ƀư.

          “Mpôl hên rgâl mhe nău mĭn, sŏk nău mĭn di lah jâng nsing an nău gĭt êng tâm di, uănh jong mhe, dâk kan tâm di. Đah sinh viên, mpôl hên ân rgâl mhe nău mĭn tĭng trong rƀŏng gay sinh viên gĭt, wât, nsĭng nơm, tĭng trong leo ƀư, ntơm bah nê khân păng ntrŭt ntrôl suan gay têh jêng n’hanh hun hao. Đah ăp gưl cán bộ hội, he ân khân păng ăp nău mĭn  lah, khân păng nkre lah tơm nuĭh têk ndrêng trong leo kan, nkre lah tơm nuĭh geh dŏng trong leo kan. Khân păng lah ăp nuĭh têh jêng bah trong leo ƀư gay kon nuĭh lah n’gâng tơm, găr ntil bah trong leo ƀư”

Nău lah dâk kan: Sinh viên Việt Nam, Nâp săk tơm – geh âk nău nđơr- nta trong dơh an let năp tay- rdâk njêng neh dak mbra rlay kah tay suan dăng tâm sinh viên Việt Nam nđơr hun hao neh dak têh ndrŏng, hơm răm, rsang rnglăy, rhơn mƀak, mpơl dơi nău nsing nơm bah sinh viên đah Đảng, Ngih dak, chế độ Xã hội chủ nghĩa. Mai Hải Yến, Kruanh Hội sinh viên Học viện cán bộ nkual ƀon têh Hồ Chí Minh an lah:

“Đại hội năm dŭt di nuih n’hâm đah nău lah yor păng geh tâm ban kơt nău ntrŭnh rgum dŭt âk n’hanh gâp dŭt di đah nuih n’hâm đah nău lah “Nâp dăng săk tơm” jêng gâp dŭt ŭch rŏng tâm năm kan tât, Hội Sinh viên Việt Nam tâm ban kơt ăp gưl hội mbra njêng ntŭk gay khân păng dơi bun dăp nău mĭn, tiăr nti nuih n’hâm uĕh lŏng tâm trong leo ƀư gay khân păng năl dơi săk tơm rơh he tâm ban kơt nđơn tay njăr trong rdâk njêng săk tơm sinh viên Việt Nam”

Đah nkô̆ “Trong nkra ntrŭt ntrôl dăng ăp nău kan rƀŏng trong bun dăp nău rêh uĕh an sinh viên tâm nô nău mhe”, Vũ Thu Hằng, sinh viên 5 uĕh gưl nkual ƀon têh Hà Nội nkoch ta Đại hội Hội sinh viên Việt Nam:

“Tâm rnôk rgâl mbrô tâm ban kơt lam ntŭr neh ƀư dăng kơt aƀaơ an he âk trong dơh hun hao  yơn nkre ndơ̆ luh ăp nău jêr jŏt ntul rlong tâm nău kơi năp nti han săk chính trị an sinh viên….

Gay tŏng đah nău ŭch geh bah n’gâng kan cách mạng tâm rơh mhe, trong leo sinh viên lah mpôl kan Hội Sinh viên ân mô rlu nsrôih nsan hao, rgâl mhe dăng nkô̆ n’hanh trong kan, ntik nău khlay kan dâk hăn lor bah sinh viên. Nguyễn Tuấn Thành, Nhih nti Quốc tế (Đại học quốc gia Hà Nội) an lah, bah meng nău ndrel hăn bah Hội sinh viên, ăp sinh viên ân lor nchrăp, nsrôih, blău ƀư mhe tâm ăp nău kan kơt nti, tâm nđŭr gay nta trong dơh an nău rêh let năp tay, gay Việt Nam jêng dak tâm ban đah ăp dak têh ndrŏng 5 châu kơt Wa Hồ mpŏng ŭch:

“Nău kan đoàn, hội an gâp mâp na nê̆ đah ăp trong nchrăp kan ngăn ngăn, đah ăp kon nuĭh ngăn ngăn, n’hao nău dơi pah kan rmôt, ân ngăch ngăr săk jăn mhâm ƀư tâm ntŭk gŭ rêh kơt nê. N’hanh gâp pơk hvi buăt nthoi bah gâp lơn tâm ăp nău tâm boh aƀaơ lah nău ma ăp nuĭh tât bah ăp nău kan đoàn hội, jêng lah gâp nti ta nhih nti ta jrô nti geh rmôt băl nti nsum. He râng rơh tâm rlong ntơm njêng nău kan ri he ân geh team (rmôt) ri nê lah nău gâp pơk hvi buăt nthoi tâm nău kan xã hội kơt nê kơl gâp jêng ăp rmôt băl n’hanh hŏ dơi tât rnoh kan nsum" 

Ŭch rŏng rdâk njêng Hội Sinh viên Việt Nam nâp dăng, rgop rdâk njêng, mât njrăng Đảng n’hanh lam trong kan chính trị, tĭng ƀư ăp kôp ăp trong nkra rdâk njêng tơm Hội nâp dăng, tâm rnglăp rgum lam hvi sinh viên; nsrôih râng rdâk njêng, mât njrăng Đảng n’hanh lam trong kan chính trị. Nguyễn Nguyệt Anh, Groi kruanh Hội Sinh viên Việt Nam n’gor Nghệ An, Kruanh Hội Sinh viên Việt Nam Nhih nti Đại học Vinh an lah, bah meng nău nti ri sinh viên ân lor nchrăp geh âk trong blău ƀư mhe, gŭ mĭn khoa học, nkre rgop nău gĭt blău bôk rngok an neh dak, nkre n’hao nău gĭt blău săk nơm:

“Nău dơn kan bah sinh viên ri mô dơn nti ma hôm lah gŭ mĭn khoa học đŏng, nê lah ntŭk mha êng đah ăp băl nti gưl 3. Tâm let năp tay, mpŏng lah, đah ăp gŭ mĭn khoa học ri geh ăp rơh tâm rlong săk blău n’hanh geh nău nsrôih ntop kơl ntĭm nti way ƀư mbro bah  ăp nai ntĭm nti, ăp nuĭh rnâng kan mpeh măt khoa học”./.