Năm 2021, BCH Đảng bộ nkual ƀon têh Pleiku, n'gor Gia Lai hŏ ƀư lôch jêh Nghị quyết mpeh hun hao pâl nđaih. Ƀon Ốp (Plei Ốp), du ƀon Jrai way ơm ta  phường Hoa Lư, dơi sơch gay rdâk njêng ntŭk pâl nđaih văn hoá, nsum mpôl nkual ƀon têh. Rƀŏng tât nău dơi dja, ăp gưl uỷ bah nkual ƀon têh phường n'hanh chi bộ ƀon Ốp hŏ geh nău rđău đă, nchŏng đă n'gâng kan n'hanh ƀon lan tĭng ƀư nău kan na nê̆.

- Hơi wa Rơ Châm Thót- Bí thư chi bộ ƀon Ốp- phường Hoa Lư, nkual ƀon têh Pleiku, aƀaơ, Plei Ốp moh geh ndơ dơh gay rdâk njêng ƀon lan mhe n'hanh hun hao pâl nđaih nsum mpôl mât săk tơm bah nuĭh Jrai?

Aƀaơ Plei Ốp geh dŭt âk nău dơh uĕh n'hanh hun hao. Lor bôk năp, ƀon geh 2 jay rot; ntŭk hun hao wăng sa geh âk dơh uĕh, hôm lah ntŭk dăch nklang nkual ƀon têh đŏng jêng dŭt dăch nhih dak si, nhih nti, gung trong geh ŭnh lơp uĕh jêng nău rêh dơh lơn. Plei Ốp aƀaơ geh rlău 125 rnăk n'hanh rlău 600 nuĭh, tâm nê nuĭh Jrai lah rlău 80 rnăk n'hanh nuĭh Bahnar 20 rnăk, hôm ƀa ƀă lah nuĭh yăn. Nơm geh nău tâm rnglăp bah lĕ rngôch ăp nuĭh, nău rêh nar lơn ma hun hao n'hanh ƀư lôch jêh rnoh tât rdâk njêng ƀon lan mhe. Mpôl hên way ƀư hop nkoch trêng gay kônh wa gĭt tâm rnglăp, nsum ti ƀư lôch jêh tât rnoh rdâk njêng ƀon lan mhe, bol mô tŏng ăp mpeh tơm prăk kaih gay pơk hvi gung gay dơh rsong hăn.

-Đah nău rđău kan bah chi bộ đảng, n'gâng kan, Plei Ốp hŏ geh moh nău dơi ntoh lư mêh, hơi wa? ?

Aƀaơ ƀon Ốp geh dŭt âk rgâl mhe. Kơp ntơm bah năm 2017 - 2020, wăng sa ntơm hun hao, geh âk nhih jay ƀư têh uĕh, tâl bar lah rvăt ndeh máy cày gay rdeng ndơ tuch tăm n'hanh máy móc dŏng an nău kan tuch tăm, tâl pe đŏng lah 100% rnăk geh điện n'hanh 80% trong prah dak chai, tuh bê tông, n'hanh bor chĭng gong hôm mât kơt ơm tâm ăp jay rot. Tâl puăn, tâm ƀon geh jay rot dŭt têh gay kônh wa ƀư rgum ƀon, tâl prăm hôm mât ndrâm dak gay kônh wa hăn bâk dak dŏng sa ăp nar n'hanh mât ndray tu dak rsang. Ƀon Ốp aƀaơ n'gluh rnoh tât kan gay geh âk oh kon hăn tât nti đại học, aƀaơ hôm 1,2 rnăk ach o, kônh wa lah kop ji hăn but săm ji, bảo hiểm y tế kônh wa mbra rvăt mô lah ngih dak phăt, âk rnoh tât kan aƀaơ ƀon Ốp n'gluh 100%.

- Gay Plei Ốp hun hao jêng ƀon văn hoá pâl nđaih nsum mpôl ntoh lư, nkual ƀon têh Pleiku, ri gưl ủy hŏ moh ndơ ƀư gay kônh wa gât mât njrăng êng văn hoá uĕh êng bah nuĭh Jrai nkre đah jut jăng mbrơi ăp nău way ơm rluk mâl, mât njrăng ntŭk gŭ rêh mêh?

Chi bộ, kruanh thôn, bu ranh ƀon ntrŭt nsôr oh kon jăp gơih hăn nti. Ăp khay mpôl hên sinh hoạt gay rđău đă ăp đảng viên kơl kônh wa ntrŭp bóng đèn bar ding trong, tâl bar đŏng lah mpôih kuaih kloh uĕh gung trong, tâl pe lah rgŏ jă ăp oh mon hăn nti. Mpôl hên n'gluh nău ton tâm ƀon, gay kônh wa jêng trong way bên gŭ rêh kloh uĕh mbra wơt năch bah ngai nkhêp geh rnôk weh hăn khâl ƀon văn hóa dja. Hôm nkô̆ nău khĭt yot tâm ƀon hôm ƀư mpŭng lir đŏng bol ma rnăk hôm jêr jŏt yơn hôm ƀư tĭng nău  way ơm kăl e đŏng. Tă bah kruanh thôn, bí thư, mặt trận ăp nsum mpôl hŏ rgum hop gay kônh wa gĭt wât n'hanh ntlơi ăp ntil nău mô uĕh, geh ăp nkô̆ nău tâm ton, nău way gay kônh wa kơt tĭng ƀư 2, 3 rnoh tât kan, hôm đŏng lah kon său hăn nti hôm đêt, đêt nuĭh hăn nti tât đại học, nkoch trêng mhâm ƀư gay lĕ rngôch ăp nuĭh gĭt kơt nti n'hanh djăt tĭng nău rđău đă bah cán bộ ƀon.

- Tâm let năp tay, nsrôih rdâk njêng tay ƀon jêng ntŭk wăch rgum năch pâl nđaih, ndjôt săk tơm văn hoá bah nuĭh Jrai, gưl uỷ, n'gâng kan n'hanh ƀon lan Plei Ốp mhâm geh trong nchrăp mêh wa?

Nău ta năp măt lah mât ndray văn hoá, ntĭm nti an druh ndăm gĭt chĭng gong n'hanh njêng ăp rmôt chĭng gong, rmôt ka dŏ tâm ƀon, lôch nê lah mât ndray nău kan trah mon rup si, nău kan cheh bok brai gay di đah jâng nsing ƀon văn hoá. Lôch nê đŏng lah, nkoch trêng kônh wa tĭng ăp nghị quyết thành ủy, đảng ủy, tâm ban kơt chi bộ, aƀaơ ta Đảng, ngih dak dŭt ntrŭt nsôr kônh wa ƀư pâl nđaih, chi bộ mpôl hên ri dăch dêh đah kônh wa ƀon lan gay nkoch trêng gay kônh wa saơ ăp nău geh nsĭt tay bah nău ƀư pâl nđaih, bol hôm jêr jŏt yơn let năp tay mpôl hên mbra nsrôih joi trong nkra bah.

Mhe aơ, ƀon Ốp dơn geh tơm ndơ ntuh kơl bah lơ gay rdâk njêng jay rot, bê tông yơn hôm ntưm ma ja đŏng, rnôk năch hăn uănh pâl khân păng dŭt ŭch uănh nuĭh Jrai tŭr chĭng goh gong, njroh mprơ, tâm ƀon aƀaơ geh dŭt âk nău mha êng rđĭl đah ăp ƀon êng ƀa ƀă, jêng mpôl hên ân gĭt mât ndray, kơt tâm jay rot ri ân geh bor chĭng gong, geh sah khiău, geh ndrơng ŭnh, tâm ăp nar ƀư pâl rlưn rhơn mƀak mpôl hên tŭr chĭng goh gong an năch hăn pâl nđaih ndrel rhơn nđơr, tâm ƀon Ốp aƀaơ geh 2 rmôt chĭng, du rmôt chĭng bu ranh, du rmôt chĭng bu ur, hôm geh rmôt ka dŏ đŏng, ăp rmôt njroh mprơ dja way hăn rhŏ an năch pâl nđaih uănh, gâp mpŏng mbra dơi mât mbro.