Tâm n’gor Bạc Liêu, Kruanh Quốc hội Vương Đình Huệ tât khâl, pă nklâm ndơ ân rlau 360 rnăk dơi geh, nŭih geh n’hâm, nŭih ntưp dak si khih đioxin, nŭih geh nau rêh jêr jŏt tâm Ngih văn hoá n’gor Bạc Liêu. Kruanh Quốc hội Vương Đình Huệ lah rjăp, ƀư ueh nau vay tâm kơl ueh bah rnoi nơm vay mât chăm ân ƀon lan, ngăn lah ăp rnôk Tết tât, Đảng, Ngih dak, Uỷ ban Trung ương MTTQ Việt Nam ndrel ăp rmôt mro kơl an, nsôih dŏng nau kan, ƀư ân nau kơl an ân ăp rnăk geh nau dơi kơl, geh n’hâm ơm kăl e, rnăk ach o, ăp rnăk geh nau rêh jêr jŏt...gay ăp nŭih, ăp ngih kŏ geh rhơn vơt tết năm mhe.

            Tâm rnôk tât, Kruanh Quốc hội đă ăp gưl kan uỷ đảng, n’gâng kan, MTTQ ndrel ăp rmôt tâm n’gor ntrŭnh ƀư ueh nau rđau mrô 26 bah Ban Bí thư mpeh nau ƀư Tết Giáp Thìn 2024:

            ‘Nchrăp ăp nau dơi ueh ngăn, kơl an ƀon lan rhơn vơt năm mhe, sa tết ueh lăng, rhơn răm, đăp mpăn, têm nkre. Lŏ kơl an, mât chăm ân rnăk vâl geh dơi kơl, nŭih geh n’hâm, rnăk ach o, nŭih ntưp dak si khih Điôxin, công nhân, nŭih geh nau rêh jêr jŏt...Nkre vay tâm nchră, djăt nau đă bah ƀon lan, nŭih kan, mĭn, ndâk ƀư nau kan kơl an, pơk trong nơih ân ăp rnăk, ăp nŭih hun hao văng sa, nsôih rklaih ach o nâp nâl. Lah nŭih mô dơi rklaih ach o ri mra ntrơn jêng nau kơl an bah lam ntŭk ân geh nau kơl an ƀon lan.

Đảng, Ngih dak ndrel ăp nŭih gâp ŭch ăp rnăk dơi kơl, rnăk ach o, kônh wa geh nau rêh jêr jŏt lŏ nsôih, hao jêng, nsôih kan, tuch tăm, ăp nhoat ndâk nau rêh hơm răm, đăp mpăn. Ăp nô, yuh, oh công nhân, nŭih pah kan sâm kơl ăp nau jêr jŏt nsum bah neh dak, nkuăl ndrel ntŭk kan, ƀư rjăp nau ntrŭnh bah Đảng, nau ntrŭnh pháp luật bah Ngih dak rgop nau rklaih nau tâm boh nau kan ân tâm ban đăp mpăn, geh nau mhe tâm ntŭk kan, ndrel ntŭk kan ndâk tay nau tuch tăm ê nkra’.

            Rnôk aơ, Uỷ ban Trung ương MTTQ Việt Nam, Tổng Liên đoàn Lao động Việt Nam, Trung ương Hội chữ Thập đỏ Việt Nam pă 600 nklâm ndơ ân ăp rnăk dơi kơl, nŭih geh n’hâm, rnăk ach o, rnăk nŭih ntưp dak si khih điôxin, công nhân, nŭih pah kan geh nau rêh jêr jŏt tâm n’gor Bạc Liêu.

            Kŏ tâm pơh rlau aơ, tâm Khu công nghiệp Suối Dầu, nkuăl Cam Lâm, n’gor Khánh Hoà, Groi Kruanh Quốc hội Nguyễn Khắc Định ndrel rmôt hăn kan tât khâl ăp ntŭk ƀư “Sa Tết-năm mhe tâm pă” ndrel pă nklâm ndơ ân nŭih ƀon lan n’gor Khánh Hoà. Kŏ tâm rnôk aơ, geh Bôk nau kan Chợ Tết Công đoàn 2024 tâm n’gor. Tâm 4 ntŭk aơ, geh 10 ndrơng 0 đồng, nklăp 200 ndrơng ndơ tăch thuk ân ăp nŭih đoàn viên, nŭih pah kan.

Êng nê, Liên đoàn Lao động N’gor Khánh Hoà hôm tâm rgop nsum đah ăp rmôt kan ƀư nau khám n’hâm soan, mbơh pháp luật mpeh bảo hiểm ân công nhân pah kan. Tết năm mhe Giáp Thìn 2024, Công đoàn ăp gưl tâm n’gor Khánh Hoà hŏ dŏng 50 rmen gay ma ôp khâl, mât chăm tết ân nŭih pah kan.

            Tâm ntŭk ƀư “tết rgum nsum-năm mhe tâm pă” ndrel chợ công đoàn bah Khu công nghiệp Suối Dầu, Groi Kruanh Quốc hôi Nguyễn Khắc Định ndrel rđau kan Liên đoàn Lao động Việt Nam, rđau kan n’gor Khánh Hoà pă 400 nklâm ndơ ân nŭih pah kan. Nkoch bri đah ăp nŭih pah kan tă bah ntŭk kan Khu công nghiệp Suối Dầu, ăp ntŭk ƀư nau kan tâm n’gor Khánh Hoà, Groi Kruanh Quốc hội Nguyễn Khắc Định njoăl nau ôp khâl Tết, ôp khâl nŭih pah kan, nkre ŭch ăp rnăk lŏ nsôih pah kan, nsôih rlet nau jêr, geh du nau rêh ueh lơn. Groi Kruanh Quốc hội Nguyễn Khắc Định lah rjăp:

            ‘Rđau kan Đảng, Ngih dak, N’gâng kan n’gor Khánh Hoà mro djăt, gĭt kloh, kơl an tât nau rêh bah ăp nŭih pah kan. Ndrel ŭch nô, yuh mro tâm rnglăp, gơih pah kan jan sa ndâk nkuăl Khu công nghiệp, ndâk n’gor Khánh Hoà ndrel rgop tâm nau dơi geh nsum bah lam dak. Dăn rhơn tât ăp rnăk vâl công nhân pah kan tâm n’gor Khánh Hoà vơt năm mhe Giáp Thìn duh răm, tâm rnglăp, đăp mpăn, geh âk nau ŭch rong ndrel ueh lăng”./.