Ôi lơ 10/11, UBND n’gor Dak Lak ƀư tâm nchră ma druh ndăm tâm n’gor đah nkô̆ “Druh ndăm n’gor Dak Lak đah ntrơn rgâl mrô, hun hao văng sa mrô”. Râng tâm nchră geh rđau kan UBND n’gor, rđau kan ăp n’gâng kan, ntŭk kan ndrel 250 druh ndăm ntoh măt ân rlau 90 rbăn druh ndăm tâm n’gor. Rơh rƀŭn geh tâm nuih n’hâm sŏng, rđau kan ăp rmôt kan geh tât nau ơh nau ôp, nau nkol bah druh ndăm.

Ăp đoàn viên druh ndăm tâm n’gor hŏ ôp âk nau ôp geh tât nau kan kơt: Nau dơi bah druh ndăm tâm nau ntrơn rgâl mrô, nau kơl an, ntĭm nti, pă kan pah ân druh ndăm mpeh nau ntrơn rgâl rmô, văng sa mrô. Wa Nguyễn Tuấn Hà, Groi kruanh rnâng kan UBND n’gor Dak Lak rnê lah, ăp nau rgop bah ndruh drăm mbơh tâm nar rƀŭn lah nau ueh ndrel ngăn, ntoh nau kơl an bah druh ndăm geh tât nau kan khlay geh tât hun hao văng sa mrô, ntrơn rgâl mrô tâm n’gor./.