Ntrŏng, Rgâl dơh glêh siƀŭt: “Keh pơk”  uănh năl rnoh di nuih n’hâm, nău mpŏng ŭch bah nuĭh ƀon lan, doanh nghiệp, âk n’gor hŏ geh ăp trong ƀư êng gay n’hao rnoh mbrô dja. Bah nê rgop rdâk njêng du ntŭk ƀư siƀŭt dêh bên, yor ma ƀon lan rhŏ dŏng.

          Nô Đinh Văn Tây ta xã Ia Klar hăn tât ntŭk dơn n’hanh mplơ̆ lôch jêh ƀư siƀŭt nkuâl Đức Cơ, n’gor Gia Lai ƀư siƀŭt ndơ̆ prăk sŏk soăy. Roh nklăp 30mnĭt nô hŏ ƀư lôch jêh siƀŭt:

Nuĭh kan ta aơ dŭt rah rơch, ngăch lăp tâm nău kan. Nău way he ƀư jŏ 1 pơh mơ lôch, lah hôm geh nău mô hŏ di ri khân păng mbơh an he hao nkra tay hôm mô ri ƀư ngăch ngăn.

Tĭng wa Hồ Thị Hiền, Groi kruanh jrô kan Nội vụ nkuâl Đức Cơ, di nuih n’hâm, mô di nuih n’hâm, dŭt di nuih  n’hâm lah 3 rnoh gay nuĭh ƀon lan ta Đức Cơ chấm điểm lôch tâm dâl nău đah cán bộ. Năm 2022, rnoh di nuih n’hâm mpeh nău rhŏ dŏng ƀư siƀŭt bah nkuâl Đức Cơ dâk tâl 5 tâm lĕ rngôch rnoh 17 nkuâl, thị xã, nkual ƀon têh:

Uănh năl bah nuĭh ƀon lan đah nău rhŏ dŏng bah nhih pah kan ngih dak ma nuĭh ƀon  lan tât ôp nău kan tĭng ƀư siƀŭt, ri lôch rnôk tĭng ƀư ăp siƀŭt ri mbra geh du njuat nuĭh ƀon lan dơi cán bộ, công chức ntĭm nti n’hanh tĭng ƀư  siƀŭt, lôch nê ri cán bộ mbra phăt phiếu ndơ̆ an nuĭh ƀon lan, dăn nău rgop nău rhŏ kan ta aơ geh nău uĕh đŏng lah mô. Lah di nuih n’hâm ri kônh yơ uănh năl, mô di nuĭh n’hâm ri ăp  kônh yơ hŏ uănh năl gay nkra bah tay, nkra tâm let năp tay gay rhŏ dŏng kan uĕh lơn.

      Gay n’hao rnoh di nuih n’hâm bah nuĭh ƀon lan, doanh nghiệp rnôk  hăn tât ƀư siƀŭt, ta n’gor Quảng Ninh, siƀŭt mpeh n’glĕ nău dơi nkra bah n’gâng kan ta ntŭk dơi lĭr nkrêp mbơh kloh ta nhih pah kan n’hanh trang điện tử. wa Bùi Tuấn Anh, Groi Giám đốc Sở Nội vụ n’gor Quảng Ninh an gĭt:

       Quảng Ninh rđău đă đah n’gâng kan tâm dâng n’hanh gưl xã nkoch trêng ma âk trong ƀư. Ntơm bah lĭr nkrêp ta nhih pah kan xã, jay văn hóa tât nkoch trêng ma nhih pah kan ƀoh rup ƀoh ngơi ta n’gor ăp măng gay ăp quy định trong kan bah trung ương, n’gor dơi tât nuĭh ƀon lan gay nuĭh ƀon lan wât n’hanh rgop nău. Đah nău dăn đă rlơ̆ mpôl hên ăp khay dơi mâp, tâm dâl nău n’hanh nkra tât dŭt nkô̆ nău.

       Du đêt n’gor, nkual ƀon têh kơt Quảng Bình, Quảng Trị, nkual ƀon têh Hồ Chí Minh hŏ tĭng ƀư geh nău dơi trong ntĭt leo “Ƀon lan chấm điểm” đah 6 rnoh mbrô n’glăp gâl: Nuih n’hâm wơt, ntĭm nti  ƀư siƀŭt; mông nar jŏ ƀư siƀŭt;  mông nar mplơ̆ siƀŭt lôch jêh ƀư di mông nar ton; mpeh roh huach prăk dŏng ngăn n’hanh nău di nuih n’hâm nsum. Rnoh di nuih n’hâm nsum bah ntơm dơn geh 7 tâm rnoh điểm 9, hŏ n’hao mbrơi  tât 8 điểm, geh ntŭk tât 9 điểm. TS Lê Đặng Trung, Giám đốc Công ty rblang năl mông nar ngăn, ngoăy tâm ăp đơn vị lor bôk năp râng trong nchrăp kan ƀon lan chấm điểm uănh năl:

Njêng an lĕ ma nuĭh ƀon lan n’hanh cán bộ ngih dak way bên an lah, aơ lah du njăr trong hăn plơng ơh tay lôch tĭng ƀư rhŏ dŏng, aơ lah du rêng ƀư ngăn dơm. Gâp mĭn lah nê lah du nău dơi dŭt uĕh, yor păng kloh rvah lah dŭt âk năm aơ ƀư jêng nău mĭn dăn an mô dơn mpeh bah nhih pah kan ngih dak ma bah mpeh nuĭh ƀon lan khân păng pha lah ŭch nău nê đŏng. Đah trong plơng ơh ngăch, ơh di, njêng luh ntŭk kan ma nuĭh ƀon lan mbra plơng ơh tay dah rŏng mô klach rvê nkre geh nău dơi uănh năl di đŏng ri nău tâm rgop tâm nău plơng ơh nê dŭt âk.

        Năm 2022, rĭng rnoh di nuih n’hâm mpeh nău rhŏ dŏng ƀư siƀŭt bah 63 n’gor lah  80,08%. Tĭng kơp nđăp bah Bộ Nội vụ, rnoh dja tâm năm 2023 (mbra mbơh tâm quý 2 năm 2024), mbra geh tât 87,7 %. Ăp nău rgâl dơh glêh dŭt n’hâm suan tâm  trong tĭng ƀư  chính phủ mbrô rƀŏng tât rdâk njêng du nău rêh kloh uĕh, du ntŭk dŏng ƀư siƀŭt dêh bên,  yor ma ƀon lan rhŏ dŏng dôl an saơ ăp nău dơi geh di, ntrŭt nsôr ăp nuĭh, tĭng n’gor ƀư lôch jêh ăp tŏng rêng công nghệ mbrô tâm rgâl dơh glêh siƀŭt kan./.