Êng ma nau vay bah năp nê, rơh rƀŭn rơh aơ, Quốc hội ơh nau tĭng nau kan rgâl ma rmôt nau kan. Tĭng nê, nŭih kan Chính phủ mra geh nau mbơh ơh nau ôp geh tât nau kan tâm nau dơi mât, rđau, uănh ndơn ăp nau kan ma nơm hŏ mbơh geh tă dơi ƀư. Wa Tạ Văn Hạ, Rmôt kan Quảng Nam rnê prêh nau mbơh bah ăp Kruanh n’gâng kan ndrel ăp nŭih kan bah Chính phủ, nau ơh geh tŏng tâm di ăp nau ŭch ma ntoh măt Quốc hội mbơh luh. Nau kan rgâl mhe aơ ƀư ăp nŭih kan Chính phủ, rđau kan bah ăp ntŭk kan ân geh tâm dăch ngăn, nâp nâl nau kan. Aơ kŏ lah nau gay ntoh măt Quốc hội uănh ăp Kruanh n’gân kan ndrel nŭih kan Chính phủ tâm nau ƀư nau ton bah nơm tâm ăp rơh ôp nau:

            ‘Ăp ntoh măt Quốc hội mbơh luh nau kan, mât tâm dăch tâm ăp nau ntrŭnh, hŏ mĭn rvê ân rjăp ăp nau ntrŭnh mêt uănh tâm dăch ma nau ôp bah Quốc hội. Ăp kruanh n’gâng kan lŏ ndơn nau ôp ndrel ơh nau ôp kŏ sŏng, tâm ban tâm ăp nau kan ma ntoh măt uănh khlay. Ntoh măt kŏ joi nkô̆ tât lôch, nchră nau tâm lôh. Êng nau ôp, yơn kŏ ndŏ luh âk nau đă, âk ntrong kan gay ma kơl an ân Chính phủ ân ăp Kruanh n’gâng kan bah ăp ntŭk kan, nau kan tâm nau rđau ân geh ueh lơn”.

            Wa Tô Thị Bích Châu, Rmôt kan bah nkuăl ƀon têh Hồ Chí Minh ân lah, rơh ôp nau ndrel ơh nau ôp geh ueh, nau ôp bah ăp ntoh măt ndŏ luh tâm ngih rƀŭn lah nkô̆ geh cử tri kâp rnơm. Yơn lah, đah nau kan kơt dak si, ntĭm nti, văn háo...mông dŏng ân ăp ntoh măt ôp nau mô âk, mông ân ăp Kruanh n’gâng kan ơh nau mô tŏng gay ma mbơh lôch nau kan ma cử tri ŭch:

            ‘Phung he ƀư ôp nau nkô̆ nau hvi ir, ăp nau kan văng sa, văn hoá, rêh jêng, chính trị, đăp mpăn bah neh dak ri 2 nar n’gul ơh nau mô dơi lôch lĕ ôh. Ndri ma, ăp nau ơh bah ăp Kruanh n’gâng kan, kruanh ntŭk kan mô tŏng mông, knŭng geh đê̆ đă dơm. Yor ntoh măt ŭch gĭt kloh, gĭt nâp tay ri ma mbơh nau kan ôp nau âk tŏ. Ndri ma lah geh ôp tâm rơh ba kơi, gâp mĭn mra săch du đê̆ nau kan hăn jru lơn”.

Tĭng uănh rnôk ôp nau ndrel ơh nau ôp tâm rơh rƀŭn tal 6, Quốc hội gưl 15, cử tri Lê Hữu Chỉnh, ta Phường Thắng Lợi, nkual ƀon têh Buôn Ma Thuột, n’gor Dak Lak ân lah, nau kan ôp nau tâm rơh rƀŭn tal 6 hŏ ntoh nau mbơh kloh, rjăp. Nŭih ôp nau ndrel ơh nau ôp kŏ nchrăp ăp ntil, nâp nau kan:

‘Bar nar n’gul ôp nau ndrel ơh nau ôp, gâp rnê ngăn ăp rđau kan n’gâng kan hŏ ơh nau ueh, Thủ tướng ndrel Kruanh Quốc hội kŏ ndri đŏng. Gâp ân lah geh âk nau ntrơn rgâl. Nkô̆ nau têh ngăn dơi geh tă bah nau mât đăp mpăn chính trị ân tât văng sa rêh jêng ndrel ngăn lah Quốc hội ndrel Chính phủ hŏ uănh khlay tât kon nŭih, kơt lah nkoch tât nau ntrơn rgâl prăk khay, kơt lah ntĭm nti, dak si, văn hoá mbơh nau geh ntô̆ n’hao, ndrel ma nau kan bah ntrong hăn, ndrâm dak, tach ndeh mpar jêh ri nsôih gay geh tât 3000 km trong hăn ngăch tâm năm kan aơ ri gâp aơ ueh ngăn. Lah du hê cử tri ri gâp ŭch ngăn ndrel rnơm Quốc hội mra ƀư jêh ăp nau kan”.

Rnê prêh mpeh nau ôp ndrel ơh nau ôp bah Groi Thủ tướng Trần Lưu Quang, wa Nguyễn Thị Sửu, rmôt kan bah Thừa Thiên Huế, mbơh:

 ‘Gâp saơ nau ueh, nau janh ndơn nau ê geh nau dơi, hŏ jang ndơn ăp nau ê dơi ri mra dơi geh rklaih ăp nau ê dơi ndrel joi ntrong rklaih, ntrong luh ân ăp nau jêr, nau nkol. Mô di lah ntoh măt bu ŭch ôp ăp nau kan nê ma saơ păng jêr, ân geh rklaih, ân geh nsing ma Chính phủ ngăn lah ngoai tâm ăp ntŭk prêh ngăn gay dơi rklaih ăp nau kan mpeh nau kơl an nau ŭch, nau mĭn bah cử tri”./.