Ta ntŭk kan du mpông bah UBND xă Ea Tul, nkuăl Cư M’gar, n’gor Dak Lak, nuĭh ƀon lan tât ndơ̆ sam ƀŭt rhăch nău ƀư ăp sam ƀŭt hành chính dŭt âk. Cán bộ mhe ntĭm nuĭh ƀon lan  jêh sam ƀŭt, nkre kơl nglăp dữ liệu tâm trong điện tử. Tĭng wa Y Xá Mlô, cán bộ công chức văn phòng thống kê xă Ea Tul, 98% nuĭh ƀon lan tâm xă lah nuĭh rnoi mpôl đêt jêng nău gĭt công nghệ thông tin hôm e đêt. Rlău ma nĕ, ntĭm na nê̆ kônh wa mư đăp mpăn.

“Nuĭh ƀon lan mô geh nău ŭch. Lĕ rngôch hăn tât gay ƀư. Rnoh 3 ntĭt nsa dăn ƀư khai sinh, dăn ƀư sam ƀŭt tâm nsông. Rnoh 4 ri mô hŏ dơi ƀư yor nuĭh ƀon lan mô hŏ gĭt đah công nghệ thông tin”.

Yuh H’Zin, ta ƀon Sah B, xă Ea Tul tă rlong dăn ƀư tă bah mpông dịch vụ công trực tuyến, yơn lah, ăp nău ntoh mhe jêh nĕ ƀư yuh mô ŭch ma rnôk ƀư ăp sam ƀŭt điện tử:

“Ŭch hăn tât ntŭk pah kan moh ndơ geh ôp tât dâl. Ƀư ta tĭng trong mạng geh rnôk photo, sŏk rup tih. Rnôk bah năp oh hăn ƀư kak ta ntŭk kan ngih dak geh tih, an dơm ta nĕ. Ntŭk blău ƀư hăn tât na nê̆ ƀư tay”.

Wa Lê Quang Bất, Kruanh UBND xă Ea Tul nkoch ăp jêr jŏt rnôk ƀư tĭng rgâl mrô ta ƀon lan:

“Bu mô gĭt rplay sam ƀŭt ri m’hâm dơi ƀư rgâl mrô. N’ăp tĭng rplay sam ƀŭt bah nuĭh rnoi mpôl êng. He ƀư ta máy tính dơi yơn điện thoại thông minh geh âk rplay sam ƀŭt mô dơi ƀư jêng jêr đêt nău aơ”.

Nuĭh ƀon lan tât ta ntŭk gay dơi ntĭm na nê̆ yor ƀư ăp sam ƀŭt hành chính trực tuyến lah n’hêl na nê̆ ta nkuăl Tri Tôn, n’gor An Giang. Wa Đỗ Minh Trí, Groi kruanh UBND nkuăl Tri Tôn kơp dơn đŏng: rgâl mrô ta nkual yôk, geh âk rnoi mpôl đêt gŭ rêh lah nkô̆ nău mô dơh:

“Nuĭh ƀon lan âm aơ ƀon lan rnoi mpôl đêt dŭt âk jêng bu ƀư ta điện thoại thông minh đêt ngăn. Hôm way hăn tât ta du mpông. Mpôl hên ntĭm nuĭh ƀon lan tât du mpông ƀư ta điện thoại thông minh yơn dŭt đêt”.

Mô knŭng mâp jêr jŏt tâm nău wơt dơn nu nău, mbơh ta ntŭk pah kan nsum trực tuyến, đah ăp nuĭh nkual yôk, nău kan m’hâm ƀư gay trok prăk trực tuyến jêng nău jêr. Lĕ rngôch ăp nkual jru ngai, nkual nuĭh ƀon lan mô geh thẻ ngân hàng, mô dơi gĭt đah ăp ngân hàng điện tử, bap điện tử. Khân pơng bên dŏng prăk măt, nơm ƀư êng ăp sam ƀŭt ri mư đăp mpăn. Wa Lý Văn Lâm, Groi Kruanh UBND nkuăl têh Lăng Can, nkuăl Lâm Bình, n’gor Tuyên Quang nkoch ăp jêr jŏt:

 “Nău jêr rblang ngăn lah nuĭh ƀon lan, ăp nuĭh ƀư ndơ aơ. Dŭt âk nuĭh ƀon lan mô dŏng măy tính mô lah điện thoại thông minh. Bôl lĕ dơi cán bộ ntĭm dŭt na nê̆ yơn nuĭh ƀon lan dŏng jêr jŏt đŏng”.

Wa Ma Đình Quan, Groi kruanh UBND xă Hồng Quang, nkuăl Lâm Bình, n’gor Tuyên Quang nkoch na nê̆:

“Rnôk ƀư tĭng rgâl mrô, lơn lah nu nău nsum trực tuyến, jêr jŏt ngăn lah nău wât bah nuĭh ƀon lan. Tal 2 lah rnoh rnăk ach o âk jêng rnoh rnăk dŏng điện thoại thông minh tâm nău mkra sam ƀŭt hành chính hôm e đêt. Jêr jŏt aơ mpôl hên mô hŏ dơi mkra na nê̆”.

Aƀaơ, rnoh dŏng ndơ nsum trực tuyến rnoh 3,4, 80-90% knŭng geh tâm du đêt nkual ƀon têh. Đah ăp ntŭk nkual yôk, nkual jru ngai rnoh aơ ta âk ntŭk knŭng geh 30-40%. Yor rĭ, rnoh an rgâl mrô tât tĭng rnăk, nuĭh ƀon lan dŭt jêr lôch jêh./.