Wa Nguyễn Chu Hồ, rmôt kan bah Quốc hội Hải Phòng ân lah, nau rgum nau kan bah neh dak geh âk nau mhe, ndrel ma nau rgum ntŭk ntu gung trong, tâm nê ân geh nau rklaih nau mô nâp mpeh nau nthoi gung trong bah ăp n’gor êp mper dak lêng mpeh ba lơ ndrel mpeh miền Trung. Kŏ tĭng wa, nau rgum geh uănh tât ăp ntŭk ntu gung trong êng gay ma tâm di đah nau geh văng sa mrô ndrel mât ntŭk ntu đah ăp nkuăl mât nau ơm, âk ntil sinh học gay n’hao nau rdâng đah rgâl mhe trôk nar:

 ‘Ntrong kan mrô nthoi ăp nkuăl rnôk aơ mô knŭng lah ndeh têh, ndeh mpăr ma hôm geh nthoi bah trong mạng. Ntrong tal 3 lah nau dơi rdâng đah nau ntrơn rgâl trôk nar, rnôk aơ geh gung trong hăn êng, ân tăm tay bri, bri geh lăp dak chiăt boh gay ma n’huch nau khuch bah trôk nar, nau rgâl mhe bah trôk nar. Nau nê kơt lah ân geh rgum lĕ bah neh dak hŏ geh tĭng năn nau ŭch bah nau tât mhe ndrel păng ntơm geh kơp mĭn tât nau kan leo lăp jru lơn, lăp ân geh săk tam bah công nghệ”.

Hôm đah wa Bùi Hoài Sơn, rmôt kan ntoh măt Quốc hội nkuăl ƀon têh Hà Nội, nau rgum bah neh dak hŏ mĭn tât nau nthoi ăp nau kan bah văn hoá, nau ƀư kan ân geh rklaih ân tâm ban ueh ăp nau tâm boh đah nau hun hao ndrel nau mât, hun hao ueh ăp rnoh geh ơm, nau vay. Mât, ƀư ueh ăp nau khlay bah nau ơm bah ăp rnoi, hun hao dăng nau kan ơm njêng ăp ntil ndơ kan, nau kan văn hoá geh nau ntơ lư, nau bu rnơm ndrel geh nau ueh tâm nkuăl ndrel lam ntur neh, tĭng nuih n’hâm bah nau nrŭnh đại hội 13 bah Đảng:

‘Nau rgum lam bah neh dak hŏ geh âk nau njrăng uănh đŏng tâm nau kan văn hoá ndrel ngăn lah nơm ân geh njrăng uănh tât nau kan văn hoá. Lah nơm geh ăp nau nchâp tĭng ăp ntrong ƀư ơm kơt lah bảo tàng, ngih mprơ, thư viện, mpla n’hơ...nê lah ăp nkô̆ dơi gay nơm ƀư ăp nau kan geh tâm di đah nau dơi hun hao bah neh dak. Yơn lah kŏ ân geh tay ăp nau êng ndrel nơm geh ăp ntŭk ƀư nau kan văn hoá êng êng geh ăp nau ueh êng ndrel ăp nau ueh êng đŏng. Du nau rgum dĭng lĕ bah neh dak knŭng geh nau dơi ndrel păng kŏ geh nau tâm di đah ăp nau tă geh bah neh dak rnôk nơm nsing tâm ăp nau khlay, ăp nau ueh ơm bah văn hoá"

Ân lah nau rgum bah neh dak tâm năm 2021-2030, rƀŏng tât năm 2050 lah ngoai tâm ăp nkô̆ nau ndal yor păng geh tât nau rgum bah nkuăl, ntŭk gŭ, wa Lê Hữu Trí, rmôt kan ntoh măt Quốc hội n’gor Khánh Hoà, lah kloh:

‘Nsing tâm luật rgum, ngăn lah nau rgum dĭng lĕ bah neh dak ân geh ntrŭnh ơm lơn gay ma ƀư nau dơi gay ân ăp nkuăl ntrŭnh ƀư ăp nau rgum bah gưl n’gor, tâm dâng gưl n’gor. Yơn nau khlay lah nơm rgum rnôk aơ ri mông ƀư mra mbrơi lơn yơn nau khlay lơn lah nau nâp, nau mĭn ndrel nau rƀong jŏ jong gay neh dak hun hao ngăch yơn ân geh nâp nâl mpeh nau kan văng sa bah neh dak kŏ kơt lah hun hao ăp nau geh tât ƀư nâp nala bah nau rêh nơm, tâm rnôk aơ ndrel rƀŏng tât năm 2050”.

Ta rơh rƀŭn ndal tal 2 bah Quốc hội gưl 15, ndơn nau lăp kan bah Thủ tướng Chính phủ, Kruanh n’gâng kan nchrăp kan ndrel ntuh kơl Nguyễn Chí Dũng mbơh nau mpeh nau rgum lĕ nau kan neh dak lvang năm 2021-2030, rƀŏng tât năm 2050. Tĭng nê, nau rgum dĭng lĕ nau kan neh dak lvang năm 2021-2030, rƀŏng tât năm 2050, ndŏ nkŏ nau tât năm 2030 Việt Nam lah dak hun hao geh nau dơi ueh, mhe, nau geh prêh, hun hao văng sa nsing tâm nau dơi khoa học công nghệ, ntrơn rgâl mhe ndrel ntrơn rgâl mrô, nau kan ƀư ntŭk gay ma hun hao bah neh dak ân săk tam, nâp nâl, njêng dơi ăp nkuăl, ntŭk kan văng sa, ntŭk ntu geh nau dơi nsôih, geh ntrong tâm nthoi ntŭk ntu ƀư nau kan ân tâm ban nau ueh, nau ueh, đăp mpăn ân tâm ban têh, n’hao nau dơi rdâng bah jâng văng sa, ntŭk ntu geh mât nâp, tâm ban đah nau dơi rdâng rgâl mhe trôk nar, nau rêh drăp ndơ, nuih n’hâm bah ƀon lan geh n’hao prêh, neh dak, rnăk njrăng geh mât đăp mpăn./.