Rlău 1 rkeh tơ̆ nuĭh geh nău rêh jêr jŏt hŏ dơi ntop kơl  tâm 6 khay bôk năm aơ (2024), nê lah nău lư ta rnôk tâm nchră sơ kết pah kan hội chữ thập đỏ ăp n’gor duyên hải miền Trung- Tây Nguyên (Rkŭm tâm rlong mbrô 6) ƀư ôi (03/6) ta Dak Lak.

6 khay bôk năm 2024, hội chữ thập đỏ ăp n’gor hŏ rgŏ jă geh rlău 360 rmen prăk, pă nklâm ndơ an rlău 1 rkeh tơ̆ nuĭh ach o, dăch kêng ach o, nuĭh geh nău  rêh jêr jŏt, nuĭh ji  khêh dak si dioxin, rnăk dơi kơl, rnăk geh tât khuch bah trôk nar lơh, nuh srê. Nău kan njrăng n’gang trôk nar lơh kơl an rlău 25 rbăn tơ̆ nuĭh đah lĕ rngôch rnoh khlay rlău 7,5 rmen prăk. Ta tâm nchră, wa Bùi Thị Hòa, Kruanh Hội Chữ thập đỏ Việt Nam rnê âk ăp nău nsrôih, ăp nău dơi geh kan bah ăp đơn vị tâm rkŭm tâm rlong mbrô 6. Nkre dăn đă hội chữ thập đỏ ăp n’gor rgâl mhe tay trong kan, tĭng ƀư geh nău tam ăp bôk nău kan, ăp rơh rgŏ jă kơl nuĭh, kơl ăp rnăk geh nău rêh jêr jŏt nsan hao tâm nău rêh du trong geh nău tam, jŏ jong.