Ôi 14/6, Sở Lao động-Thương binh ndrel Xã họi n’gor Dak Lak tâm rgop nsum ma Liên đoàn Lao động n’gor ƀư nar rgum pă nau joi nau kan năm 2024 đah nkô̆ “Nthoi nau kan-rƀŏng nau kan-nâp nâl nau rêh”. Nar rgum geh nau râng bah rlau 1000 nŭih, kon se nti, sinh viên...tâm lam n’gor; 30 ntŭk kan, rmôt kan, ntŭk ntĭm nti nau kan đah rlau 10 rbăn ntŭk săch. Êng nau kan ê nkra công nghiệp, săch kon se hăn nti dak ba dih, nar rgum pă mbơh nau kan rơh aơ săch nŭih ƀư geh n’ăp ma kỹ thuật viên thẩm mỹ, spa, nŭih kan dak si, nau ƀư dak ngêt, kơl an kan, mbơh nau tăch ndoh ndơ.

Rơh aơ, ntŭk kan Ngân hàng Ngih dak Việt Nam kŏ ƀư bôk nau kan “Gĭt tât tơm prăk” kơl an nŭih pah kan tâm Dak Lak gĭt dơi ăp nau blau mpeh tơm prăk, geh nau gĭt tât prăk ndrel nau ơm geh bah prăk Việt Nam, nau dŏng ƀư ma prăk; Nŭih pah kan hôm geh râng bôk nau kan sŏk ndơ geh nkhôm-pă nkre prăk. Rơh aơ đŏng, Liên đoàn lao động n’gor Dak Lak kŏ pă 50 nklâm ndơ ân đoàn viên công đoàn geh nau rêh jêr jŏt./.