Ôi ntri (25/3), ta nkual ƀon têh Gia Nghĩa n’gor Dak Nông, Hội Chữ thập đỏ Việt Nam ƀư tâm nchră nkoch trong leo ƀư,  nău tă ơm gĭt kan tĭng ƀư trong nchrăp “Kơl ndơ dak bah dih ndăn ngăch gay ntop kơl khuch khat lôch dak bŭk năm 2023”.

Trong nchrăp Hiệp hội Chữ thập đỏ - Trăng lưỡi liềm đỏ lam ntŭr neh kơl, an ƀư ntơm bah kêng dŭt khay 8/2023 tât aƀaơ ta 4  n’gor: Dak Nông, Lào Cai, Lai Châu n’hanh Yên Bái đah lĕ rngôch tơm prăk tĭng ƀư rlău 9,3 rmen prăk. Ăp rnăk ƀon lan dơi ntop kơl bồn dak, prăk măt mô kâp geh ndơ nkol, prăk măt geh ndơ nkol gay rdâk nkra tay nhih jay, dŏng rêh…gay nkra bah khuch khat an tay bah kơi lôch dak rchoh, tĭng kơn đăp mpăn  nău rêh. Ta n’gor Dak Nông, trong nchrăp hŏ phăt prăk măt geh ndơ nkol an 20 rnăk gay nkra jay, 100 rnăk gay rdâk tay nău rêh, phăt 40 bồn nhựa đâng dak n’hanh phăt tay prăk măt mô geh ndơ nkol an 70 rnăk bah nkuâl Tuy Đức. Trong nchrăp hôm dơi ntop kơl tiăr nti, tĭng ƀư ăp nău kan nkoch trêng mpeh dak kloh uĕh, njrăng n’gang nuh srê tâm nô nău jăch ndăn; ntĭm nti rdâk njêng đăp mpăn, kỹ thuật joi trong gŭ rêh jŏ jong rnoh khlay 1,5 rmen prăk./.