Rnăk wa Võ Thị Ngọc Nhị lah ngoai tâm rnăk ntoh ngăn bah xã An Bình mô geh tâm lơh, U, che, me mbŏ leo trong, kon sau mleh. Wa Nhị geh nau kơl an bah sai nơm ri ma mông nar hăn kan tâm nkual, rgop nau kơl an ndrel bu ur bah xã An Bình kơl an âk bu ur tâm xã. Wa Võ Thị Ngọc Nhị mbơh:

‘Ngih hên ri sai ngơi ur djăt, ur ngơi sai djăt, me mbŏ ngơi ri oh kon tĭng djăt. Rnôk hăn ƀư nau kan bah dih ri oh kon nơm saơ đŏng âk rnăk mô geh ueh kơt rnăk nơm. Rnăk nơm ueh ri ƀon lan kŏ rnê, kŏ rhơn ma bu đŏng. Geh nar gâp tâm ngih ri nau kan gâp ƀư ân lôch, ân jêh. Hôm geh nar gâp hăn kan ri sai gâp kŏ ndăn sĭt răk piăng trau ân oh kon đŏng”.

Tâm ban ma rnăk wa Trần Thị Sạn tâm xã An Bình. Rnăk păng rêh ma nau tăm play khuăr. Păng râng rmôt kan bu ur mô geh nau tâm lơh tâm rnăk vâl ntơm rnôk mhe ndâk ân tât rnôk aơ. Wa Sạn êng nau mât ân ueh rnăk vâl ri hôm ntĭm nti kon se ân geh gĭt nau, djăt nau u che me mbŏ, geh nau tâm boh ma ƀon lan, nkre nkoch trêng, bonh đă oh nur ndrel ƀư gay ndâk rnăk vâl mô geh tâm lơh, rêh ueh, đăp mpăn:

‘Tâm rnăk hên, gâp ntĭm nti oh kon, sai nơm mô dơi geh nau tâm lơh tâm rnăk vâl, rnôk hăn bah dih pah kan ri mơ nơm geh nau blau bonh đă ân ăp oh nur êng êng. Nơm kŏ nkoch mbơh mô dơi tâm lơh tâm rnăk vâl, Oh nur ân geh nsôih tâm dăch dơh ndrel mô ân sai nơm geh nau lơh dong”.

Nau kan “Rmôt bu ur mô geh tâm lơh” ta Tổ 8, ấp Thanh Bình, xã An Bình, nkuăl Châu Thành geh 21 nŭih. Bah 8 năm kan, nau kan tam ngăn. Bôk năp tâm rmôt geh 3 rnăk geh tâm lơh, yơn oh nur prêng, mô janh nkoch. Jêh nau kan geh ndâk, bah nau rƀŭn mro ri oh nur gĭt kloh lpơn tâm nau rklaih nau tâm lơh tâm rnăk, kơt: Nkoch mbơh bah ăp oh nur, joi trong tât oh nur gay ma mbơh, nkoch, bonh đă sai nơm mô dơi geh nau tâm lơh, dŏng ur, rnơm pháp luật geh nau mbơh. Tât rnôk aơ, rmôt kan “Bu ur mô geh tâm lơh” mô hôm geh tâm lơh tâm rnăk vâl. Ndrel tâm ăp năm êp aơ, nau tâm lơh tâm rnăk vâl huch âk, mô geh khuch hô. Wa Huỳnh Thanh Tuyền, Kruanh rmôt bu ur xã An Bình, nkuăl Châu Thành, n’gor Tây Ninh mbơh, ntơm rnôk ndâk tât rnôk aơ, rmôt bu ur mô geh nau tâm lơh geh kơl an âk ngăn bah ăp gưl n’gâng kan ri ma nkual mô hôm geh nau tâm lơh dơi geh rlaih, mô geh tâm lơh hô, rgop na hun hao văng sa rêh jêng, n’hao nau rêh nuih n’hâm drăp ndơ tâm rnăk vâl:

 ‘Ntơm rnôk ndâk tâm năm 2015 tât rnôk aơ, rmôt bu ur mô geh tâm lơh tâm rnăk vâl hŏ geh ăp yuh n’hao nau mĭn ndrel nau blau tâm nau rêh bah rnăk vâl đah me mbŏ ndrel oh kon, u che, me mbŏ. Bah nê, ăp oh nur blau nsing tâm nau ngăn, geh nau ƀư ueh lơn, tâm mâp tâm ngơi gĭt ryơk bu têh lơn. Êp nê, ăp yuh kŏ geh sai kơl an, pă nau kan. Rƀŏng tât, rmôt ƀư nau kan mô geh tâm lơh tâm rnăk vâl ƀư âk tay nkô̆ nau ndrel nau kan mhe kơt bonh đă oh nur tâm rmôt rgop prăk tâm kơl gay ma kơl an ân nŭih tâm rmôt geh nau dơi mât rong, tăch rgâl đah tơm prăk ntơm 3 tât 5 rkeh”.

 Nau tâm lơh tâm rnăk vâl lah nau khuch tâm nau rêh, ƀư geh nau ji nau rvê bah kon nŭih, lơi âk nau khuch ân kon nŭih, ngăn lah bu ur, kon se. Nau tâm lơh tâm rnăk vâl tâm du đê̆ ntŭk ê geh rgâl ndrel êp geh nau ueh dơi, ngăn lah tâm nŭih rnoi mpôl đê̆. Rnôk aơ, nau aơ lah nau rvê ngăn bah lam nau rêh. Ndri ma, nau kan “rmôt bu ur mô geh tâm lơh tâm rnăk vâl” bah rmôt kan bu ur xã An Bình, nkuăl Châu Thành, n’gor Tây Ninh geh ndâk, gay rgop nau ndâk nau rêh ueh, ăp nhoat ndâk rnăk vâl hơm răm đăp mpăn./.