Bah nau kan mêt uănh ân saơ, Chính phủ, Thủ tướng Chính phủ hŏ ntrŭnh ăp n’gâng kan, ntŭk kan ndrel n’gor ơm ƀư nau ntrŭnh bah Quốc hội mpeh nau ân ƀư Bôk nau kan ntuh kơl ăp nau kan bah neh dak. Bol ma rnoh nau kan mât, ntĭm ƀư lĕ 03 bôk nau kan ma Trung ương ntrŭnh lah âk (rlau 70 nau ntrŭnh), yơn tât rnôk aơ Chính phủ ndrel ăp n’gâng kan, ntŭk kan hŏ ƀư jêh, ƀư nau nsing gay n’gor ƀư ân ngăn. Bol ma bri, bah nau mêt uănh geh âk nau mbơh nau ntrŭnh âk ir, 300 nau ntrŭnh mbơh bah Trung ương ndrel n’gor. Âk nkô̆ nau ê kloh, jêr ƀư. Rnôk aơ tât n’gul năm kan, yơn ê geh nau ntrŭnh geh ăp n’gâng kan, ntŭk kan ntĭm. Groi Kruanh Quốc hội Nguyễn Khắc Định đă:

 “Tâm 3 bôk nau kan aơ bơi tât 300 nau ntrŭnh bah Chính phủ, ăp n’gâng kan 73 nau. Ăp n’gor ntrŭnh ma rhiăng blah. Mhâm âk nau ntrŭnh đa ưkơt nê. Tâm rnôk knŭng geh du chương mhe, 2 chương ơm tă bah âk năm kan. Mhâm rnôk aơ ân geh nsing tâm âk nau ntrŭnh kơt nê. Bah nau kan mêt uănh ân geh ƀư kloh du nau kan ntrŭt đă, der kan, ân mbrơi nau ƀư hun hao văng sa, rêh jêng, rklaih nau kan bah ntŭk kan tăch rgâl’.

Nau ngăn uănh bah ăp tơm ntuh kơl hun hao tơm prăk Trung ương ntop pă mbrơi (6 khay năm e mơ jao) ê geh nau nchrăp jao tơm prăk bah ngih dak tâm 5 năm ân ăp bôk nau kan bah neh dak, nau tâm rgop tơm prăk bah Bôk nau kan neh dak jêr ƀư, tơm prăk bah Trung ương năm 2022 ndrel 2021-2025 hôm mbrơi. Nau jao ăp n’gor pă tơm prăk n’gor ndrel rgum ăp tơm kơl an gay ƀư ân tŏng dơi ƀon lan mhe n’hao prêh ndrel ƀon lan mhe lah jêr, ngăn lah đah n’gor ach o.

Kruanh Quốc hội Vương Đình huệ đă ƀư kloh nau kan bah ăp n’gâng kan, ntŭk kan tâm nau mbrơi pă 3 bôk nau kan bah neh dak ƀư mpŭng âk ngăn:

‘Mêt uănh nau aơ ân geh ơh nau ôp. Mhâm nau mbrơi? Mhâm nau nkol, ntŭk ntrong păng nkol? Ndrel nau doh rklaih mhâm ƀư. Pe bôk nau kan kol ma rhiăng nkô̆ nau ntrŭnh nau mrô 28, jêh nê nkra 27, rnôk aơ nau kan bah ăp n’gâng kan, ntŭk kan mhâm ƀư ân geh nau kan nê. Mhâm lah pă tơm prăk kan mbrơi. Tơm prăk ƀư nau kan hôm mbrơi rlau ma tơm prăk ntuh kơl kơt nê mhâm dơi? Ân kơt aơ tơm prăk mpŭng lir ngăn”.

Rmôt kan mêt uănh đă geh nau jao nau nchrăp ƀư tơm prăk kan mô lah mbơm tơm prăk kan trơm prăk trung ương ƀư Bôk nau kan bah neh dak lvang năm 2024-2025 gay ăp n’gor nchrăp ueh tâm nau pă tơm prăk. Rđau ƀư rjăp nau  rklaih ăp nau jêr, nau nkol, ngăn lah nkra, ntop ăp nau ntrŭnh ê tâm di tâm ăp nau ntrŭnh pháp luật mbơh ƀư 03 nau kan bah neh dak. Đă Kiểm toán Ngih dak geh nau đă rklaih ƀư tơm prăk tâm rơh rƀŭn tal 9 bah Uỷ ban Rnâng kan Quốc hội.

Rgop nau tâm nau nchrăp Luật tăch drăp ndơ (rgâl nkra), Uỷ ban Rnâng kan Quốc hội đă nau kan rgop nau ân geh rklaih nau nkol, nau tâm rkăng geh nau tât khuch tâm nau sa khâm, mpŭng lir, geh sa nsum tâm nau tăch drăp ndơ, ngăn lah rnoh tăch ndơ tâm nau kan neh ntu. Nau nchrăp luật tăch drăp ndơ (rgâl nkra) hŏ ntop âk nau ntrŭnh mpeh ntŭk, nar tăch, ndơn săm ƀŭt, nau nkra săm ƀŭt râng  tăch rgala tĭng nau đăp mpăn kloh rah vah, pơk trong nơih ân nŭih râng tăch rgâl, nkre tâm ban ma nau ân prăk lor. Ndrel nê, nau nchrăp Luật kŏ ntop ăp nau đă tăch, ndơn săm ƀŭt râng rvăt đah nau kan trực tuyến rgop nau n’hao nau dŏng nau kan điện tử mhe. Ăp ntoh măt đă ân geh kơp, ntrŭnh tâm Pháp luật ƀư nau kan kơt pháp luật mpeh neh ntu gay n’huch nau ân prăk lor, ƀư nkol kan. Kruanh Uỷ ban pháp luật bah Quốc hội Hoàng Thanh Tùng, đă:

‘Kơp nau ê dơi tâm nau nkol bah du đê̆ nau ntrŭnh tâm du đê̆ nau kan, tâm nê geh nau kan tăch rvăt drăp dnơ, rklaih nau nkol ƀư ji nuih tâm ƀon lan, ngăn lah jêh rnôk tăch drăp ndơ geh dŏng neh tâm Thủ Thiêm Tân Hoàng Minh ndrel du đêư nau kan tâm du đê̆ n’gor êng, rklaih nau kan “rmôt drih, rmôt chăng” ƀư nau kan mphol rnoh, mpeh rnoh, ƀư nau kan mô tâm di tâm rnôk tăch rvăt drăp ndơ”.

Kruanh Quốc hội đă rơh aơ ân geh rklaih ngăn nau kan aơ, nsôih rklaih nau nkol, nau tâm rkăng geh nau tât sa khâm, mpŭng lir, ƀư geh sa nsum. Kruanh Uỷ ban Tư Pháp bah Quốc hội Lê Thị Nga đă nau ntrŭnh ngăn mpeh 10% prăk ân lor tâm rnôk ân geh tăch drăp ndơ:

 “Lah tăch rgâl ndoh ndơ geh nau dơi dŏng neh đak nau jao neh, ân manh neh gay ƀư nau kan ntuh kơl ri prăk ân lor đê̆ ngăn lah 10% ndrel âk ngăn lah 20%. Phung hên ndơn saơ tĭng nau ntrŭnh bah luật rnôk aơ ri rnoh prăk ân lor âk đê̆ ngăn ân ăp ntil ndrăp ndơ ntrŭnh tâm rnoh 5%. Nkre neh ntu lah ăp drăo ndơ geh rnoh khlay lah đah ăp nŭih ƀư nau kan gay ma ntuh kơl. Ndri ma, gay ƀư kloh nau kan ntrơn rgala rnoh prăk ân bah nau nchăm lor ntơm bah 5% tĭng luật rnôk aơ ma hao 10% ndrel nchră tât nau khuch bah nau ntrŭnh aơ tâm nau geh dơi ngăn"”/.