Nar nđaơ (8/8) ta Rƀŭn nchră uănh lah săk rnglăy trong kan rgŏ jă, nkoch trêng năm 2022-2023 n’hanh mbơh ƀư nău kan tâm lvang bah năp tay, Binh đoàn 15 lĕ ƀư rnê nkhôm 104 bu ranh ƀon, nuĭh nsing nơm rnoi mpôl đêt ta nkual n’har bri 2 n’gor Gia Lai n’hanh Kon Tum. Tâm 2 năm bah năp, Binh đoàn 15 lĕ ƀư uĕh trong kan rgŏ jă, rgop ƀư uĕh nău kan wăng sa mât njrăng bri dak, đăp mpăn rnă njrăng ta nkual n’har bri ăp n’gor Gia Lai, Kon Tum.

Na nê̆, Binh đoàn lĕ nta nău kan đăp mpăn an 9.000 nuĭh pah kan rnoi mpôl đêt; ƀư rlău 4.200 kôp rnăk phung pah kan nuĭh Yoăn đah nuĭh rnoi mpôl đêt tâm rgop, tâm kơl hun hao wăng sa. Ndrel đah ăp nău ƀư geh nkô̆, Binh đoàn 15 lĕ mât uĕh nău ƀư bah ăp bu ranh ƀon, kô ranh thôn, chức sắc tôn giáo, nuĭh nsing nơm tâm nkual rnoi mpôl đêt, rgop mât uănh nău rêh nuih n’hâm, mât ndrăy văn hóa n’hanh đăp mpăn rnă njrăng nkual n’har bri.