Râng rƀŭn, geh ntoh măt rđau kan ăp n’gâng kan, ntŭk kan, Trung ương, Bí thư n’gor uỷ, Kruanh UBND 5 n’gor Tây Nguyên (Dak Lak, Gia Lai, Kon Tum, Lâm Đồng, Dak Nông) ndrel 9 n’gor (Quảng Nam, Quảng Ngãi, Bình Định, Phú Yên, Khánh Hoà, Ninh Thuận, Bình Thuận, Đồng Nai ndrel Bình Phước).

Ntoh nau tâm nar rƀŭn, Groi Thủ tướng Chính phủ Trần Lưu Quang lah rjăp: văng sa, rêh jêng nkual Tây Nguyên geh hun hao, nau vay ơm ăp rnoi geh mât, ndơn ndrel ƀư kơt, nuih n’hâm ƀon lan geh mâp nâp, rnă njrăng, đăp mpăn ăp ntil.

Yơn lah, hun hao văng sa rêh jêng nkual Tây Nguyên ê tâm di ma nau geh dơi bah nkuăl. Gay hun hao nâp nâl, nkuăl Tây Nguyên, nŭih ƀon lan geh nau rêh đăp mpăn, hơm rtăm, ƀư nâp nau rnă njrăng, đăp mpăn neh dak tĭng nkô̆ nau, nau đă mrô 23-NQ/TW bah Bộ chính trị, Thủ tướng Chính phủ ntrŭnh Bôk nau kan hun hao văng sa, rêh jêng ndrel ma nau mât đăp mpăn, neh dak bah nkuăl Tây Nguyên.

 Nkô̆ nau tơm bah Bôk nau kan hun hao văng sa, rêh jêng ndrel ma nau mât rnă njrăng, neh dak bah nkuăl Tây Nguyên lah n’hao nau săk tam hun hao văng sa, rêh jêng, geh nsum ma nau mât đăp mpăn nkuăl Tây Nguyên tâm rơh tât. Tă bah nê, ăp ntoh măt rgum nchră nau ƀư ân geh ngăn, ơm leo nau ntrŭnh 23-MQ/TW ndrel Bôk nau kan lăp tâm nau rêh, rgop nau hun hao nkuăl Tây Nguyên ngăch, nâp, mât đăp mpăn, rnă njrăng, neh dak.

 Rơh rƀŭn, Đại tướng Tô Lâm lah rjăp: Đảng, Ngih dak mro kơl an ngăn mpeh ăp nau ndrel ƀư âk nau ntrŭnh, nau rgum gay hun hao nkuăl Tây Nguyên. Ma tơm êp aơ lah nau ntrŭnh 23-NQ/TW bah Bộ chính trị mpeh “Nau rƀŏng hun hao văng sa, rêh jêng ndrel đăp mpăn neh dak nkuăl Tây Nguyên tât năm 2030, rƀŏng tât năm 2045” ndrel Bôk nau kan hun hao văng sa, rêh jêng geh nsum ma nau mât đăp mpăn, rnă njrăng neh dak nkuăl Tây Nguyên bah Chính phủ.

Đại tướng Tô Lâm đă ăp n’gâng kan, ntŭk kan, nkuăl tâm ban, ƀư rjăp, ƀư ân geh ăp nau ntrŭnh rđau, rgum nau kan, tu tơm, nsôih ƀư ân tam ăp nau ntrŭnh, nau kan mhe gay ƀư dơi nkô̆ nau tâm Bôk nau kan hŏ nchrăp luh đah nuih n’hâm “5 nsôih rjăp”. Ngăn lah: Nsôih  doh rklaih nau jêr, nkol; nsôih ƀư jêh ăp nau mhe, “ndâk tay” nau geh dơi, nau jêng bah nkuăl, hun hao nau ơm, nau vay, kon nŭih nkuăl neh Tây Nguyên, nau dăng janh kơt nuih n’hâm Đam San jêng nau dơi hun hao văng sa, rêh jêng, n’hao nau rêh bah ăp rnoi Tây Nguyên, “mô ân nŭih geh nchlơi ba kơi”; nsôih rklaih tă bah ơm, bah ngai, tă bah nau hôm jêr kol, rnă njrăng, mô ân ndrât ndal, nsôuh ƀư nâp trong kan chính trị tâm dâng ân nâp, tŏng nau đă, nau kan, n’hao nau dơi bah cán bộ, công chức tâm nau ƀư kan, tĭng nuih n’hâm rđau kan bah Tổng Bí thư Nguyễn Phú Trọng, Thủ tướng Chính phủ Phạm Minh Chính lah: “Ntă nŭih mô jang ƀư, mô janh kan ri dak ba meng ân bu êng ƀư”.

Đại tướng Tô Lâm lah rjăp: Đă gưl uỷ, n’gâng kan ăp n’gor êp nê tâm rgop ngăn đah ăp n’gor Tây Nguyên tâm nau ƀư Bôk nau kan bah Chính phủ, n’hao nau tâm rboh, tâm rgop hun hao pâl n’aih, ntrong kan, nau geh ơm, ueh bah Tây Nguyên. Ntơm bah jŏ, nau vay jang, dăng tâm rnôk tâm lơh ndrel janh, dăng nau blau mhe tâm nau rgâl mhe, nuih n’hâm tâm rnglăp, du nuih n’hâm tĭng Đảng, tĭng Wa Hồ bah kônh wa ăp rnoi mpôl Tây Nguyên, Đại tướng Tô Lâm rnơm ngăn lah: Đảng bộ, n’gâng kan, rmôt tahen ndrel ƀon lan ăp rnoi bah n’gor Tây Nguyên mra rlet nau jêr, nau ntul rlong, ƀư ueh dơi nau kan hun hao văng sa, rêh jêng, đăp mpăn neh dak, ơm leo Tây Nguyên hun hao ueh, ăp ntil ndrel nâp nâl./.