Tât rnôk aơ, săm ƀŭt nchrăp Luật neh ntu (rgâl nkra) hŏ geh ƀư ngăn, geh tĭng nuih n’hâm nau ntrŭnh mrô 18 bah Trung ương, mât tâm dăch nuih n’hâm Hiến pháp, nau ntrŭnh bah Đảng ndrel trong pháp lệnh rnôk aơ.

            Ntoh nau tâm nar rƀŭn, Kruanh Quốc hội Vương Đình Huệ đă rgum tâm ăp nau kan hôm âk nau êng êng, kơt: sŏk lơi neh gay ƀư nau kan nkra ngih gŭ tăch rgâl, bôk nau kan rgum ngih gŭ tăch rgâl, ƀư kan; Nau nchrăp rnoh tăch neh, nau dơi, nau kan geh săch kơp rnoh neh; Nau nchrăp nkra rnoh neh, neh hun hao âk, ntrơn rgâl nau dơi dŏng neh. Kruanh Quốc hội lah rjăp ăp nau aơ ân geh mĭn njêng ân rjăp lor ma mbơh Quốc hội uănh, nchră Luật neh ntu (rgâl nkra) tâm rơh rƀŭn ndal tal 5.

            Mpeh nau nchrăp Luật ƀư ntŭk kan tín dụng (rgâl nkra), Kruanh Quốc hội lah rjăp aơ kŏ lah nau nchrăp Luật khlay, geh nau ueh tât tơm prăk, đăp mpăn văng sa, đăp mpăn, nâp nâl, ntrong prăk kaih neh dak. Đă lŏ ƀư jêh nau nchrăp Luật gay mât đăp mpăn Luật nchră geh ueh ngăn, tâm ban ma ntrong kan pháp luật rnôk aơ kơt Bọ luật dân sự, Luật thi hàng án dân sự, luật mât soay...ndrel tŏng dơi nau ŭch ngăn, ndâk tay nau ân manh prăk ndrel ngân hàng.

            Rgop nau mpeh nau nchrăp nau ntrŭnh du đê̆ nau kan gay doh rklaih nau jêr, nol, ntrŭt dằng ngăch nau ƀư Bôk nau kan bah neh dak, Uỷ ban rnâng kan Quốc hội tâm ban nau khlay bah nau ntrŭnh kan lah ntoh tă bah nau ŭch ngăn gay ma doh rklaih nau jêr, nau kol tâm rnôk ƀư ăp nau kan bah neh dk gay geh nau ngăch, săk tam bah ăp nau kan aơ tâm rơh tât. Groi Kruanh Quốc hội Nguyễn Khắc Định, đă:

            ‘Nau ntrŭnh lah ân geh rklaih ăp nau kan, doh rklaih ăp nau jêr ndrel ntrŭt ngăch nau kan. Ndri ma ân geh rgum doh rklaih ndrel ntrŭt ngăch. Tal bôk năp, hŏ doh rklaih ri lơi nchâp tay. Tal bar, hŏ ntrŭt ngăch ri lơi ntop tay nau đă, nau kan ƀư mbrơi, ƀư nkol, ƀư roh mông, dăch dŭt jêng mbrơi. Nau đă ân geh ƀư tâm dăch nau ntrŭnh mrô 98, nau ntrŭnh 100. Moh săk ân gleh ndrel tâm ban lah mô moh nau ntrŭnh lah nau rlong. Yor nkô̆ nau rlong jêh, geh nau dơi, geh mông nar, geh nŭih dŏng ndrel bôk nau an aơ knŭng tâm rlau du năm, bơi tât bar năm tay đŏng”.

            Kruanh Quốc hội Vương Đình Huệ nkah nau pă gưl, pă kan ân nkuăl tâm rnôk ƀư ăp Bôk nau kan bah neh dak. Yơn lah, nau ƀư kơt tĭng ân geh nkah, ân dŏng ân Bôk nau kan ndrel ƀư nau kan tâm rơh tât:

            ‘Lah pă gưl kan ân nkual ma rnôk aơ mô geh ƀư ueh nau kan nkre ma nơm kŏ mô geh dơi nau kơl dơi ân nau ndâk njêng nkô̆ nau kan bah rơh tât ri nơm mra ân nau ntrŭnh nê geh tâm nau ntrŭnh bah Quốc hội ndrel ân ƀư ăp bôk nau kan bah neh dak bah rơh tât. Hôm lah geh dơi rklaih ăp nau kan bah năp măt ta aơ mô lah nkre geh nau dơi lah du nau ntrŭnh ngăn ngên ƀư nau ntrŭnh ân ăp ntŭk kan bah Chính phủ ndâk bôk nau kan mhe. Kơt nê mra êng lơn tâm ăp nau ntrŭnh, nau kan”.

            Tâm rơh rƀŭn, Groi Thủ tướng Trần Lưu Quang mbơh: Chính phủ mra ƀư jêh pă nau kan hôm e, tŏng dơi ăp nau đă tâm rơh ơm ngăn:

            ‘Tal bôk năp ŭch ăp đồng chí lŏ kơl an gay lôch rơh rƀŭn rơh aơ hên geh dơi du nau ntrŭnh gay ma doh rklaih dơi gay bôk nau kan aơ lŏ geh dơi ndrel dơi tât dŭt tât lôch tâm di. Tal 2, ŭch nau ntrŭnh doh rklaih ân tât ntŭk, tât lôch, lah mô ri loư ân geh ntĭm mbơh âk ndrel lŏ geh nau rdâng đah ăp nau jêr êng. Tal 3, moh nau ê kloh ri nơm ân geh tâm di nau dơi leo tât nkô̆ nau gay ma doh rklaih, pơk trong nơih geh nau ntrŭnh tâm rơh tât gay lŏ doh rklaih ân jêh lôch nau ƀư 3 bôk nau kan aơ”.

            Tâm rơh rƀŭn tal 29, Uỷ ban Rnâng kan Quốc hội rgop nau mpeh nau ntop nau nchrăp ntuh kơl rgum ân nau gleh năm đah tơm prăk Trung ương ntrŭnh lvang năm 2021-2025 ntơm tơm prăk têm nsum geh tâm ban ma nau n’hao nau dơi geh, têm nkrem tơm prăk Trung ương năm 2022 ân ăp nau kan, nau ntuh kơl mbơh ndrel ntop tâm nau nchrăp ntuh kơl rgum jong năm ân rmôt kan điện lực Việt Nam tă bah tơm prăk nau nchrăp bah nau ntuh kơl jong năm./.