Kruanh Quốc hội Trần Thanh Mẫn mbơh: Rơh ngoai bah rơh rƀŭn geh nau dơi; geh cử tri ndrel ƀon lan uănh khlay.  Nau kan săch nŭih geh ƀư năn, tâm di nau ntrŭnh, nau kan đah rnoh phiếu săch âk. Nau ƀư kan tâm nchră tâm ngih rbŭn, tâm ăp rmôt ndrel ôp nau ơh ueh, ƀon lan ƀư tơm, sŏng, gleh. Âk ntoh măt geh mbơh nau, âk nau mbơh jru, ngăn, tâm nuih n’hâm ndâk, nau kan prêh, mbơh luh âk nau kan gay kơl an ân nkô̆ nau rđau văng sa, rêh jêng, neh dak, rnă njrăng bah Chính phủ, ăp n’gâng kan, ntŭk kan.

Tâm rơh rƀŭn 34, Uỷ ban Rnâng kan Quốc hội uănh kloh ndrel ntoh nau mĭn ngăn nau nchrăp kan, moh nau hŏ geh đăp mpăn tŏng dơi gay mbơh Quốc hội nchră rơh 2, ngăn lah ăp nau geh tât têh, kơt Luật Bảo hiểm xã hội (rgâl nkra) ndrel ăp nau nchrăp luật, nau nchrăp kan mbơh Quốc hội nchră tĭng nau dơi tâm du rơh rƀŭn (kơt: Rgum ntŭk trong dak lêng neh dak’ Luật mât, dŏng ndrak nsiu, ndơ rtoh ndrel ndơ kơl an (rgâl nkra); ăp nau ntrŭnh rlong ƀư bah du đê̆ nau kan ân n’gor Nghệ An, nkuăl ƀon têh Đà Nẵng. Kruanh Quốc hội Trần Thanh Mẫn đă Uỷ ban Rnâng kan Quốc hội rgum tâm ăp nau kan geh ntop tâm Bôk nau ndâk luật, pháp lệnh bah năm 2024:

 ‘Luật rgâl 4 Luật lah: Luật rgâl mhe, ntop tay du đê̆ điều bah Luật Neh ntu; Luật ngih gŭ, Luật văng sa tăch rgâl neh; Luật ăp ntŭk kan ân manh prăk ndrel Nau ntrŭnh bah Quốc hội mpeh nau huch soay hao khlay. Ăp nau kan hôm geh ăp gưl n’gâng kan ntrŭnh ri tâm moh nau ƀư kŏ ân geh doh rklaih nau jêr, nau nkol”.

 Uỷ ban Rnâng kan Quóc hội rgop nau mpeh nau nchrăp Luật đăp mpăn gung trong hăn. Kruanh Uỷ ban neh dak ndrel rnă njrăng bah Quốc hội Lê Tấn Tới mbơh kloh: Lơ 22/5, Quốc hội tâm nchră tâm Ngih rƀŭn mpeh nau nchrăp Luật đăp mpăn, nâp nâl gung trong hăn. Ngăn lah ăp nau rgop mbơh geh nau tâm ban đah nau nchrăp Luật đăp mpăn hăn trong geh djăt, rgâl. Nkah ngăn, Kruanh Uỷ ban neh dak đăp mpăn lah klh: Nsing tâm nau ƀư kan ngăn rlau aơ, đă Uỷ ban Rnâng kan Quốc hội ân ntop nau ntrŭnh “Ndeh ô tô ƀư kan rdeng kon se nti, kon se mầm non mô lah ndeh rdeng tâm rgop ma nau kan leo njŭn kon se nti, kon se mầm non” tâm Điều 64 bah nau nchrăp Luật. Groi Kruanh Quốc hội Nguyễn Khắc Định, mbơh kloh nau mĭn:

‘Ndeh njŭn kon se nti ân geh tŏng nau nâp êng, mhâm ƀư ân nŭih mât, nŭih bĭt jur ndeh ân geh đăp mpăn mô hôm geh nŭih. Nơm ân geh mbơh nkô̆ nau aơ ân kloh, nkân uănh ân kloh, ƀư ăp rơh mêt uănh kloh gay đăp mpăn ăp ndeh mô tŏng nau nâp ri geh jăng lơi lĕ”.

 Ntoh nau mĭn tâm ban nuih n’hâm ma nau ntrŭnh rjăp đah ndeh rdeng kon se nti, kon se, đăp mpăn rnôk hăn trong đah nau kan nchuăn rdeng kon se nti, kon se mầm non, kon se đah neh ô tô, Tổng thư ký Quốc hội Bùi Văn Cường mbơh: Êng nau ntrŭnh đă đah ndeh ô tô, hôm hôm đă nŭih ƀĭt ndeh, nŭih mât tâm ndeh, ntŭk ntĭm nti...Ngăn lah rdeng kon se nti tiểu học, kon se mầm non ân geh nsưng gŭ ân tâm di ma nơm, ndrel ân ƀư kloh nau jao ân ntŭk kan geh nau ntrŭnh mpeh nau tŏng ăp:

‘Điều 70 Luật trong jâng ntrŭnh, geh 2 nau dơi geh leo kon se nti lah ntŭk kan ntĭm ntil ndrel ntŭk ƀư nau kan ân manh dŏng, đă luật aơ mô knŭng ntrŭnh nau kan bah ăp ntŭk ƀư nau kan ntĭm nti ma hôm ntrŭnh mpeh ntŭk ƀư nau kan nchuăn rdeng rnôk leo kon se nti ma ndeh ô tô kŏ ân geh nau kan tâm nau aơ đŏng”.

 Kŏ tâm rơh rƀŭn aơ, Uỷ ban Rnâng kan Quốc hội rgop nau mpeh nau mbơh, djăt, rgâl nau nchrăp Luật Thủ đô (rgâl nkra) ndrel ân nau rgop mpeh nau rgum Thủ đô Hà Nội rnôk năm 2021-2030, rƀŏng tât năm 2050 ndrel Rgâl nau nchrăp Rgum nsum Thủ đô Hà Nội tât năm 2045, rƀŏng tât năm 2065./.