Rnơm ndrel ŭch kâp lah nau bah âk cử tri rnôk uănh n’ôi rơh rƀŭn tal 5, Quốc hội gưl 15 đah nau kan Quốc hội tâm nchră âk nau kan khlay, kơt: Nchră 8 nau nchrăp Luật, 3 nau ntrŭnh ndrel rgop tâm 9 nau kan Luật. Tâm nê, Luật neh ntu (rgâl nkra) lŏ geh Quốc hội rgop nau rơh 2. Tât rnôk aơ, jêh rnok rgop nau ma ƀon lan, nau nchrăp Luật aơ hôm âk nau êng êng mpeh tơm prăk neh ntu ndrel sŏk lơi neh. Nau đă bah cử tri mpŏng:

‘Luật nhe ntu geh tât nau sŏk lơi neh ndrel rnoh neh. Nau kan sŏk lơi neh ma mô geh nchih kloh rnoh neh ma sŏk lơi neh. Nau pă neh mhâm ƀư ân rjăp. Lah geh nau tih ri ân geh mhal du trong jâk ngăn, bah kơi nê ƀư khuch ân neh dak hô ngăn”.

Rơh rƀŭn tal 5 geh ƀư tâm rnôk jâng văng sa lam dak nơm dôl dâk bah năp nau ntul rlong, rnôk nau hun hao tâm 3 khay bôk năm geh 3,32%, ăp ntŭk kan tơm nau tuch tăm công nghiệp ndrel tăch luh bah dak nơm geh rnoh huch mô lah hao mô âk, ân saơ nau ƀư jêh nkô̆ nau lôch năm lah nau jêr. Cử tri ndrel ƀon lan ŭch ăp ntoh măt Quốc hội ƀư ueh nau kan, nau blau, ndrel tâm nchră, nsôih ƀư ăp nau kan gay ma joi luh ăp nau kan geh nau dơi gay ma doh rklaih nau jêr bah jâng văng sa, gay dơi geh dơi nkô̆ nau hun hao 6,5% ân lôch năm. Groi Kruanh Quốc hội Trần Quang Phương ân lah:

‘Mô kâp tât 3 khay bôk năm aơ GDP mơ hŭch ndal ntơm 8,2% jur 3,3% ma tâm dŭt rơh 3, bôk rơh 4 năm e hŏ geh nau huch. Nau aơ hŏ geh nau năl, gay nchră tâm di nau nchrăp ƀư mô geh ndal ntơm 8,2 jur hôm 3,3%. Ndri ma, ân geh mbơh kloh ăp nau ê dơi mpeh khoa học, ƀư rjăp ndrel tŏng ăp lơn”.

Du nkô̆ nau êng kŏ geh uănh tâm rơh rƀŭn aơ, nê lah Quốc hội uănh rjăp ngăn nau rgum, mât ndrel dŏng ăp tu tơm ƀư nau kan njrăng, rdâng srê Covid-19. Tâm nau nchrăp mbơh bah rmôt kan mêt uănh ân saơ nau ntrŭnh ntĭm mbơh nau rvăt năp ndoh ndơ, ndơ dŏng mbrơi geh nau rgâl ƀư jêng nau rvê, klach tă bah ăp nau kan ntoh luh. Tĭng wa Phạm khánh Phong Lan, rmôt kan bah nkuăl ƀon têh Hồ Chí MInh, srê ji kơt nau rlong đah n'gâng kan dak si ndrel nŭih ƀon lan dôl mâp âk nau khuch:

‘Gâp tâm ban nau đŏng lah geh nau khuch ri nơm ân rdâng, yơn kŏ kơt lah nau săm nŭih ji ri ân geh nau tâm ban đah săk jăn, răk săm ân bu, gay bu mra dơi rdâng đah ăp nau săm jâk êng. Săk gâp nơm kŏ saơ lĕ đŏng nau kan aơ. Gâp tâm ban nau lah tih ri nơm ân geh nau mhal, yơn lah kŏ ân geh uănh tâm nau mĭn ân tâm ban rnôk nê mhâm ƀư ndrel uănh du ntrong uănh ân ueh kơl an lơn”.

 Rơh rƀŭn tal 5, Quốc hội gưl 15 geh tâm rnôk rơh rƀŭn n’gul gưl bah Rnâng kan rđau kan Trung ương mhe lôch. Trung ương đă ân lŏ geh ntrŭt dăng rjăp, ƀư ueh lơn tay nau kan ndâk, ntrơn rgâl ân nâp bah Đảng ndrel ntrong kan chính trị kloh, nâp nâl, ngăn lah ntrong kan ƀư nau kan bah pháp luật, tư pháp. Cử tri Nguyễn Thị Boá, Quận Cầu Giấy, Hà Nội đă ân ƀư ueh lơi nau jut jăng lơi ăp nau mĭn nchră  rŭch, ntrŭt ntrôl nau klan nơm tâm du đê̆ nŭih cán bộ:

 ‘Nơm ân geh “rdâng” ăp nau mĭn nchră rŭch, ƀlao nau kan,  klach der ma nau kan, mô geh nau jang, mô ŭch rdâng bôk ma nau kan nơm. Du đê̆ cán bộ rđau kan mât, du đảng viên ƀư kan ri mô geh nau klach rvê bah năp nau jêr, ân geh rklaih ngăn gay hăn tât dŭt tât lôch mpeh nau ƀư nau kan, kơp n’ăp ma nau roh hoch khĭt ôm bah nơm”.

Geh tâm rnôk nau văng sa bah dak nơm dôl dak bah năp nau ntul rlong, cử tri ndrel ƀon lan ŭch ăp ntoh măt Quốc hội ƀư nau kan, geh nau blau, ndrel tâm nchră, nsôih mbơh ăp nau gay ma joi luh ăp ntrong kan ueh ngăn gay ma doh rklaih ăp nau nkol ân jâng văng sa, ƀư ân geh nau dơi ăp nkô̆ nau văng sa, rêh jêng geh Quốc hội nchrăp luh năm 2023, pơk nau dơi ân nâp nâl ân nau kan ƀư jêh ăp nkô̆ nau nchrăp luh ân lôch năm kan 2021-2025./.