Ndrel đah lam dak, rơh thi tốt nghiệp THPT năm 2024, ƀư ntơm bah nar 26- 29/6 n’gor Dak Lak geh bơi 21.000 nuĭh râng thi ta 33 ntŭk thi đah rlău 870 jrô thi ta lĕ rngôch ăp nkuâl, thị xã, nkual ƀon têh. Rlău 2.000 cán bộ, nai ntĭm uănh thi, groi nđôi n’hanh rhŏ dŏng ta ăp ntŭk thi.

Tât rnôk dja, Dak Lak hŏ nchrăp ƀư rơh thi tĭng trong nchrăp n’hanh quy định bah Bộ giáo dục đào tạo n’gluh, rƀŏng tât du rơh thi đăp mpăn, geh nău dơi âk. Pah kan njrăng n’gang nuh srê, mât kloh uĕh ntŭk gŭ rêh, đăp mpăn srăch se ndơ  sa, kơl suan thi, ntop kơl nuĭh thi, rnăk wâl njŭn hăn nuĭh thi dơi Ban rđău đă rơh thi ăp gưl an ƀư n’hanh geh trong nkra bah ơm tâm trong ƀư nsum. Nkô̆ nău đăp mpăn rnă njrăng rơh thi dơi êng uănh khlay. Tĭng Đại tá Nguyễn Hữu Lương, kruanh jrô kan Rnă njrăng Chính trị nội bộ (PA03), Công an n’gor Dak Lak, n’gâng kan công an bah ơm hŏ rdâk njêng trong nchrăp kan nsum lhăt đah ăp n’gâng kan lor nchrăp ăp trong mât đăp mpăn, rnă njrăng an rơh thi.