Tâm dŭt năm mô lah tâm nar lễ, 21 Đảng viên geh Đồn Biên phòng Axan pă kơl 95 rnăk tâm 2 xã A Xan ndrel Tr’hy, nkuăl Tây Giang, n’gor Quảng Nam, lŏ tât ôp khâl ăp rnăk tâm nkuăl n’har bri, git nau min, nau ŭch ndrel nau joi gĭt nau mĭn, kan bah kônh wa, ăp cán bộ tahen Đồn Biên phòng A Xan hŏ ƀư âk nau kơl an kônh wa, rnăk mâp nau jêr gay rklaih ach o.

 Rnăk wa Bliềng, tâm thôn Kinoonh, xã A Xan bah năp năp nơh lah rnăk ach o. Ntơm rnôk geh ăp Đảng viên Đồn Biên phòng A Xan kơl an, nti kan, nau rêh wa Bliềng hŏ rgâl ueh:

"Bah năp nơh rnăk gâp jêr ngăn, nau rêh pah pât, mô tŏng âk, geh ăp tahen Biên phòng kơl an kon ntil, nti nau kan mât chăm ri ma rnăk hên rong sur ueh ngăn, leo nsĭt săk geh ân rnăk vâl. Lah ueh ăp kônh wa tahen âk ngăn”.

Nau kơl an bah ăp Đảng viên Đồn Biên phòng A Xan hŏ rgop nau ƀư kơl an ăp rnăk nsôih pah kan jan sa. Thượng uý Nguyễn Văn Trọng, Kruanh rmôt bonh đă ƀon lan, Đồn Biên phòng A Xan mbơh. Rmôt kan pă ăp đảng viên ndơn nau kơl an ntơm 5-7 rnăk ach o, rnăk rêh ndrâu, nau rêh ach o. Êng nô kơl an 5 rnăk:

‘Ntơm bah nau rêh văng sa rêh jêng tâm nkualư nơm mât, nau rêh bah ƀon lan lah nsum mâp âk nau jêr ngăn. Rmôt kan ntrŭnh âk nau kơl an ƀon lan hun hao văng sa. Jêh geh cán bộ tahen Biên phòng A Xan geh kơl nti tuch tăm, mât rong, kônh wa ăp nhoat joi saơ ntrong hăn bah rnăk nơm tâm nau hun hao văng sa. Ngăn lah ăp nau kan hun hao rnăk vâl leo nsĭt nau geh geh văng sa prêh, rgop nau n’hao nau geh jêng an rnăk vâl bah ƀon lan tâm nkuăl”.

 Gay ƀư nau kan Đảng viên Biên phòng kơl an ăp rnăk tâm nkuăl n’har bri, Đồn Biên phòng A Xan săch ăp cán bộ, tahen geh nau blau ngăn, gĭt tât nau vay bah kônh wa. Bah nê, ƀư ueh nau dơi tâm nau kơl tâm nchră, ƀư kan, kơl an kônh wa hun hao văng sa, jut n’huch ach o. Thiếu tá Nguyễn Văn Lợi, Bí thư Đảng uỷ, chính trị viên Đồn Biên phòng A Xan, nkual Tây Giang, n’gor Quảng Nam mbơh, Ntơm bah rnôk ntrŭnh ƀư nau kan pă kan ân đảng viên ƀư kơl an ăp rnăk vâl, nau rêh bah kônh wa geh nau rgâl âk ngăn, geh âk rnăk hao sâm geh:

‘Đồn đă Đảng viên hăn kơl an ăp rnăk ach o bah xã. Nkô̆ nau gay ma gĭt lơn nau rêh bah ăp rnăk aơ moh nau khân păng ŭch gay ma râng tâm rgop nsum ma ăp gưl kan gay ma kơl ân ƀon lan ngăn. Bah nau kan kơl an ƀon lan hun hao văng sa rêh jêng, bôk nau kan bah tahen Biên phòng ntrŭnh ƀư ri rnôk aơ nau rêh bah kônh wa ƀon lan ăp nhoat hun hao văng sa. Rnôk aơ ăp rnăk ăp nhoat ƀư tơm văng sa bah nơm”.

Đại tá Nguyễn Bá Hưng, Groi Chính uỷ tahen Biên phòng n’gor Quảng Nam mbơh, Đảng uỷ, N’gâng kan rđau kan tahen Biên phòng hŏ rđau gưl uỷ 11 Đồn Biên phòng tâm rgop nsum đah Đảng uỷ, UBND 30 xã, phường nkuăl n’har bri, gôl dak pă nau kan ân 212 đảng viên ƀư nau kan kơl rlau 1000 rnăk ƀon lan. Tâm nê, geh 132 đảng viên ƀư kơl an 720 rnăk nŭih rnoi mpôl đê̆. Âk đảng viên geh nau kan ueh, tâm ban, geh nau nchrăp, nkô̆ nau kan ngăn gay ma kơl an ăp rnăk geh pă kơl an. Đại tá Nguyễn Bá Hưng lah rjăp, bôk năp, ăp đảng viên bonh đă âk rnăk ndâk ueh nau kan văn hoá, mô geh nau tih pháp luật, nau tih dôih tâm nau rêh, rƀŏng trong ân kônh wa nkuăl n’har bri hun hao văng sa geh săk tam:

‘Đảng viên geh pă nau kan ân ăp rnăk vala, ăp khay ndâk nau nchrăp kan tâm di ngăn gay ma rgum kơl an ân ăp rnăk tâm nau hun hao văng sa, rêh jêng, râng nau mât đăp mpăn rnă njrăng. Nau kan geh ƀư săk tam hŏ bonh đă kơl an 10 rnăk geh nau rêh mô lăng nâp blau gay ma ndơn rgâl nau mĭn, mô dơi hăn tĭng tâm ăp nau tih, mô ƀư tih pháp luật. Êng nê, hôm kơl an ân 25 rnăk rklaih ach o, kơl an ueh ân nau mât nkuăl n’har bri, hun hao văng sa rêh jêng tâm nkuăl”./.