Đah nău mha êng lah n’gor geh âk ƀon lan rnoi mpôl đê̆ gŭ rêh, Sóc Trăng way uănh khlay pah kan hun hao đảng lah nuĭh rnoi mpôl đê̆. Mô  dơn hun hao mpeh rnoh âk ma săk blău đảng viên mhe n’glăp lah nuĭh rnoi mpôl đê̆ nar lơn ma dơi n’hao đŏng, rgop tĭng ƀư geh nău dơi tam pah kan hun hao wăng sa rêh jêng kon nuĭh.

Phường Vĩnh Phước lah ngoăy tâm ăp phường meng  dak lêng bah thị xã Vĩnh Châu. Âk năm rlău aơ, Đảng bộ phường way ŭanh khlay pah kan n’glăp đảng viên, tâm nê geh n’glăp đảng viên lah nuĭh rnoi mpôl đê̆.

Groi Bí thư Đảng ủy phường Vĩnh Phước Nguyễn Thanh Tùng an gĭt, ăp năm, nsing ta trong nchrăp, n’glêh an jao rnoh tât kan tâm ban kơt siƀŭt rđău đă bah thị uỷ mpeh pah kan n’glăp đảng viên, Đảng uỷ phường hŏ rgum an ƀư âk trong nkra gay n’hao rnoh âk, săk blău n’glăp đảng viên; tâm nê, rdâk njêng, n’gluh an dŏng siƀŭt rđău đă, n’glêh an jao rnoh tât geh n’glăp đảng viên na nê̆ an chi bộ ntơm bah bôk năm; nkre ƀư jăp pah kan ntĭm nti tơm nuĭh n’glăp đảng viên:

Nuĭh mpôl hên ŭanh khlay tât đoàn viên, hội viên, lôch nê nsum mpôl nuĭh ntoh lư, lơn lah uănh khlay tât nuĭh rnoi mpôl đê̆ ta phường. Lôch jêh kơi ntop dăp rgum tay ăp tŏng lam lĕ rngôch. Mpeh dăp rgum bah năm 2022 nê ri lĕ rngôch rnoh 27 nuĭh, đă hăn ntĭm nti ăp jrô kơi năp nti geh 21. Kêng dŭt lah mpôl hên n’glăp đảng viên 17/16 rđĭl đah rnoh bah lơ jao, geh tât 106%, tâm nê, đảng viên lah nuĭh rnoi mpôl đê̆ 9 nuĭh, âk rlău 52%.

Ăp jrô nti đảng viên mom ta Phường Vĩnh Phước dơi tiăr nti, hao jêng bah tâm dâng. Ma ăp trong leo kan bah ăp đoàn, hội, âk nuĭh ntoh lư hŏ dơi nkoch n’hơ n’hanh dơi n’glăp tâm Đảng. Yuh Ngô Thảo Trang lah Bí thư Chi đoàn Khóm Xẻo Me, phường Vĩnh Phước, thị xã Vĩnh Châu. Yuh Trang lah bu ur leo druh ndăm way lor nchrăp grêt dêh tâm dâng , joi trong rgum druh ndăm, ntĭm nti leo ƀư nău kan. Yuh way ŭanh khlay mât n’hanh n’hao săk geh sinh hoạt ta chi đoàn, ngăch rƀah gĭt nău mĭn, nău ŭch rŏng bah đoàn viên, druh ndăm. Ntơm bah nê, yuh ndrel n’gâng kan ta ntŭk ƀư âk nău kan ngăn ngăn n’hanh geh nău tam ta lĕ rngôch ăp trong kan kơt: trong leo druh ndăm râng êng, yur mham, nkah gĭt n’hâm suan, hăn dâk leo lor hun hao wăng sa…rlău 2 năm pah kan n’hanh tiăr nti, yuh Trang dơi n’glăp đảng. Yuh Ngô Thảo Trang rhơn nkoch:

Aƀaơ ri gâp hŏ râng lôch jêh jrô nti gĭt êng mpeh Đảng, tâm let năp tay ri gâp mbra mô rlu n’hao nău gĭt êng, kơt nti, ôp rgâl êng ăp nău blău kan chính trị gay gĭt ăp tŏng lơn tâm săk n’hanh ƀư lôch jêh uĕh nău kan dơi jao gay dơi dâk tâm rmôt bah Đảng.

Lah ntŭk geh âk ƀon lan rnoi mpôl đê̆ bah n’gor Sóc Trăng, rnoi Khmer âk rlău 52%, rnoi Hoa âk rlău 17% rnoh nuĭh lam thị xã, tâm ăp năm rlău aơ, Đảng bộ thị xã Vĩnh Châu way ŭanh khlay n’hao dăng pah kan n’glăp đảng viên nkual rnoi mpôl đê̆ n’hanh uănh aơ lah nău dơn kan mbro, khlay. Đảng bộ thị xã Vĩnh Châu aƀaơ geh 42 đảng bộ, chi bộ mpeh n’gâng kan lah geh 10 đảng bộ xã, phường, 5 đảng bộ n’gâng kan n’hanh 27 chi bộ ngành; geh 207 chi bộ mpeh đảng bộ tâm dâng. Tĭng nê, n’gâng kan ta ntŭk geh rlău 4.200 đảng viên, tâm nê geh rlău 1.700 đảng viên lah nuĭh rnoi mpôl đê̆. Tĭng Groi Bí thư Rnâng kan Thị ủy Vĩnh Châu Phan Thị Xinh Hưởng, đảng viên lah nuĭh rnoi mpôl đê̆ lah mpôl kan rgop dŭt âk tâm n’gâng kan hun hao nsum bah thị xã, khân păng nkre lah nuĭh geh nsing nơm, nkre lah nuĭh leo lor tĭng ƀư ăp nău kan cách mạng ta ntŭk, lơn lah tâm rdâk njêng ƀon lan mhe. Groi Bí thư Rnâng kan Thị ủy Vĩnh Châu Phan Thị Xinh Hưởng lah:

Tâm let năp tay, Ban Thường vụ Thị ủy Vĩnh Châu ntrŏng ntăm tơm nuĭh n’glăp đảng viên tâm nkual rnoi mpôl đê̆ lah du nău dơn kan dơi ŭanh khlay n’hanh rđău đă mbro đŏng. Năm 2023 Ban Thường vụ Thị ủy Vĩnh Châu hŏ an ƀư du đêt trong nkra gay n’glăp đảng viên tâm nkual rnoi mpôl đê̆”.

Đah ăp trong ƀư ngăch ngăr, blău njêng mhe, pah kan hun hao Đảng lah nuĭh rnoi mpôl đê̆ ta thị xã Vĩnh Châu nsĭt tay ăp nău dơi uĕh. Nău nê dơi an saơ ma nău kan ngăn ngăn, lam trong kan chính trị, ăp mpôl kan đảng nâp dăng, mpơl kloh nău dơn kan rđău đă nsum mpôl lam ƀon lan tâm hun hao wăng sa, văn hóa, rêh jêng, đăp mpăn njrăng n’gang neh dak , rnăk njrăng…..ta ntŭk./.