Gay nchrăp an trong kan uănh nđôi dự thảo Luật neh ntu (nkra rgâl) mbơh an Ủy ban thường vụ Quốc hội ta rơh rƀŭn khay 4 n’hanh an rgop nău rơh tal 2, rơh rƀŭn tal 5, Quốc hội khóa 15, kêng măng 9/3, Rnâng kan Ủy ban Kinh tế ƀư rơh pah kan đah N’gâng kan Tài nguyên n’hanh Môi trường gay djăt nău mbơh mpeh ngăch mbơh ƀư bah Luật Neh ntu (nkra rgâl), ăp nău mhe hao tâm rnôk sŏk nău rgop nuĭh ƀon lan.

Kruanh Quốc hội Vương Đình Huệ ƀư tơm rơh pah kan. Tĭng nău mbơh bah N’gâng kan Tài nguyên n’hanh Môi trường, kơp tât nar 6/3, tĭng rnoh kơp ta website sŏk nău rgop nuĭh ƀon lan bah ngih pah kan nchih rgum, mô geh rnoh mrô bah ăp ntŭk lĕ wơt dơn 7.873 rơh nău rgop bah 768 rmôt kan, êng nuĭh tâm ăp nkô̆ nău bah dự thảo Luật. Jêh rgum nău rgop bah ăp ngih pah kan, rmôt kan, êng nuĭh, âk nău rgop tâm ban ŭch đah ăp nkô̆ nău bôk năp bah dự thảo Luật, uănh lah dự thảo lĕ geh âk nău rgâl, tâm di nău ŭch, nău mpŏng bah nuĭh ƀon lan, mât uănh tu tơm neh ntu an hun hao wăng sa-rêh jêng, rgop mât uănh neh ntu rjăp, dŏng neh ntêm nkrem, săk rnglăy. N’glôn jêh nar pah kan, Kruanh Quốc hội Vương Đình Huệ lah rjăp, nău sŏk nău rgop nuĭh ƀon lan an tĭng nuih n’hâm ngăn ngên, di, dah rŏng n’hanh an soih, ryơk ăp nău rgop.

Kruanh Quốc hội tâm ban ŭch đah ăp nău rgop ntoh ngơi ta ăp rơh pah kan, an uănh lah ăp trong rƀŏng, dăn đă. Jêh nĕ săch du đêt nău khlay, ngăn lah ăp nău hôm e rgop êng êng mô lah mô hŏ kloh tâm nău nchrăp ƀư luật gay ƀư mĭn njêng tay, sŏk nău rgop, ƀư rgum nchră jru, na nê̆ lơn.