Sŏng ndrel ƀư kan rjăp. Nê lah nau ndơn saơ nsum bah ăp ntoh măt ndrel cử tri tâm 2 nar n’gul ôp nau. Ăp ntoh măt Quốc hội hŏ ôp nau geh, kloh, tâm dăch ma nau kan, nkoch kloh nau rêh; ngăn lah, mô rvê nkah tât nau kan duh bah nau rêh. Sŏng nchŏng luh ăp nau kol, nau ê dơi, ăp ntoh măt ŭch Chính phủ, ăp n’gâng kan, ntŭk kan geh ăp nau kan ân rjăp, tam, yor nau hun hao ngăch, nâp nâl bah neh dak:

‘Ơh nau ôp tâm du nau khuh n’gôr, sŏng, rgum tă bah nau rđau kan bah Kruanh rmôt kan kŏ kơt lah nau rgop đă bah nŭih ôp ndrel ơh nau bah ăp nŭih rđau kan, bah Groi Thủ tướng Chính phủ ndrel nau kan sŏng ndrel ndâk”.

‘Ăp nau ôp rnôk ntoh măt njoăl tât Tổng tư lệnh ntŭk kan hŏ ơh nau tâm di ndrel tŏng dăch. Gâp uănh geh nau ueh, yor ăp nau mbơh rklaih ma ăp n’gâng kan ndŏ luh”.

 Puăn “rđau kan” bah ntŭk kan hŏ ơh nau ôp lah ăp Kruanh n’gâng kan tâm rơh bôp năp ơh nau ôp tâm Quốc hội gưl 15. Đah nuih n’hâm ƀư kloh nau kan, ƀư kloh nau ton tâm nau rđau, mât, đă, ăp n’gâng kan, kruanh ntŭk kan mô der ăp nau tâm nchră ndrel ôp nau bah ăp ntoh măt, geh nau kan n’hêl đah âk nau kan ma ntoh măt mbơh. Du đê̆ ntoh măt Quốc hội mbơh nau:

 “Gâp ndơn saơ n’gâng kan ntŭk ntu gŭ âm geh nau rnơm, sŏng dăng ơh nau ôp ndrel ơh sŏng nau bah ntoh măt Quốc hội. Ơh nau ôp bah Kruanh n’gâng kan du gưl 5 gâp saơ geh nau ueh. Gâp hĭ geh nau ŭch tâm nchră gay ma ƀư ân kloh tay ăp nau kan ƀư leo in nau nkah tâm nau kan sŏk choih ƀư khuch ngăn tât ntŭk ntu dak lêng”.

 ‘Ntŭk kan Công thương, ntŭk kan mât ngih dak ân geh du nau mĭn, nchră ăp nkô̆ nau geh ƀư jêng ntŭk kan tăch rgâl rhuăt luh bah ntŭk ntu tăch rgâl. Moh ntŭk kan ƀư nau kan moh ntil ndơ? Năm jong kan bah ăp ntŭk nê lah dĭng jŏ gay geh ăp nau kan ân tâm di gay ma mbơh ăp nau nê. Geh kơt ê mơ nơm geh nau kan kơl an ntŭk kan tăch rgâl”.

Ơh nau ôp bah năp Quốc hội, Kruanh N’gâng kan ntŭk ntu gŭ âm Đặng Quốc Khánh mbơh kloh ăp nau jêr mpeh ndơ dŏng ndâk nkra ân ăp nau kan tơm bah neh dak, ngăn lah nau kan nkra trong cao tốc; ntoh luh ăp nau kan gay ma ndâk rêh tay ăp trong hoch dak mô hôm thăng yor geh nau hôl khih djơh hô,

Lah rjăp nau rgum mât chăm nau ơm yau nkuăl rnoi mpôl đê̆, Kruanh n’gâng kan Văn hoá, Thể thao ndrel pâl n’aih Nguyễn Văn Hùng ân lah: nau ndâk kan văn hoá tâm dâng lah nau na geh tŏng ndrel ăp gay ma njêng ntŭk ntu văn hoá. Nkre lah mbơh mra geh nau kan mhe gay pơk trong nơih lơn ân nau bonh đă, nghệ sĩ jêh rnôk lôch rơh tâm rlong, ƀư ăp nau kan geh nau dơi prêh...

Ơh nau ôp bah năp Quốc hội, Groi Thủ tướng Chính phủ Trần Hồng Hà lah rjăp ăp nau kan rđau rnoh tăch gay đăp mpă nroh tăch rgâl bah hao khlay rnôk ƀư nau rgâl prăk khay ntơm 1/7 tât. Wa Phạm Thị Thanh Mai, rmôt kan bah Hà Nội lah rjăp:

‘Groi Thủ tướng lah nŭih geh nau blau tâm nau ơh nau rnôk tâm nchră Quốc hội. Nơm ân geh ndơn saơ ăp nau kan tâm nau ôp nau ơh bah Groi Thủ tướng kŏ geh nau rjăp, hăn tâm di tâm ăp nau kan tơm. Geh ăp nkô̆ nau n’hêl ndrel ăp nau kan tơm ri nơm ŭch ân geh mông nar gay ma ton ƀư ndrel ân geh ntrong kan. Nau nê lah nau khlay gay cử tri, ƀon lan, kŏ kơt lah Quốc hội uănh”.

 Ndrel đah ăp nau kan ndrel trong kan geh ton ăp Kruanh n’gâng kan, ntŭk kan mbơh ndŏ tâm rơh rƀŭn aơ, ntoh măt ndrel cử tri ŭch lah ân geh nau kan n’hêl mra geh ƀư rjăp gay đăp mpăn ăp nau kan geh ƀư, hun hao dơi săk tam ăp nau kan geh mbơh ôp tâm rnôk geh kan ngăn./.