Việt Nam ndrel Lào geh nsum trong n’har bri jong 2.340 km, njok 10 n’gor bah Việt Nam ndrel 10 n’gor bah Lào. Bar ding geh 8 mpông n’har đah dak ba dih, 7 mpông bah neh dak, 18 trong pơk ndrel nau kan văng sa êng.

Tâm rnôk tâm nchră sỹ quan mom Tahen Biên phòng Việt Nam ndrel sĩ quan mom N’gâng kan đăp mpăn-cảnh sát-N’gâng kan Công an Lào ndrel nchră nau tă geh bah nau tâm boh tâm rơh rlau aơ. Lah rjăp nau kan khlay bah rmôt sỹ quan mom tâm nau nchră, mât nau tâm rgop ƀư ăp nau kan. Thượng uý Nguyễn Văn Quang, Groi Kruanh ƀư nau bonh đă, nkoch mbơh nau kan, Jrâu kan chính trị, Tahen Biên phòng n’gor Kon Tum, mbơh:

“Geh râng tâm n’ur lah nau ueh gay gâp ndrel ăp tahen mom tâm mâp, tâm nchră ndrel n’hao nau blau, hun hao lơn tâm nau mât nkuăl n’har bri. Săk gâp nơm rhuăt luh nau tă geh blau ri ân geh nchrăp ngăch lơn nau tâm rgop đah rmôt tahen mom bah dak băl Lào, tă bah nê nơm năn saơ ăp nau ƀư mô tâm di, nau kan mô ueh, nau ŭch ƀư tih bah ăp phung rlăng tih dôih gay ma năn tâm mbơh nchră ma rđau kan, leo luh ăp nau ntrŭnh đă njrăng, rdâng ăp phung tih dôih”.

Ntơm bah bôk năm 2023 tât rnôk aơ, ăp sỹ quan mom Tahen Biên phòng Việt Nam ndrel sỹ quan mom N’gâng kan mât đăp mpăn, Cảnh sát-N’gâng kan Công an Lào hŏ ƀư nau kan ân 499 rmôt cán bộ 2 dak tâm ro pah kan, tâm rgop mêt uănh 264 tŏ đah ma rbăn nŭih cán bộ, tahen râng, tâm rgop mât, rklaih rlau 1.500 tŏ tih, đah rlau 2.400 nŭih tih...

Tĭng Đại tá Nguyễn Thanh Hải, Groi kruanh nau kan Chính trị Tahen Biên phòng Việt Nam, rmôt sỹ quan mom lah rơh ndơn nau kan bah rmôt tahen 2 dak, ăp nau kan tâm n’ur geh nau khlay tâm nau mât, bun dăp nau tâm boh ueh, tâm rnglăp Việt Nam-Lào:

‘Tâm n’ur sỹ quan mom Tahen Biên phòng Việt Nam, sỹ quan mom bah N’gâng kan đăp mpăn, Cảnh sát Lào nar aơ lah nau mpơl saơ ngăn bah Bôk nau kan tâm rgop đah N’gâng kan tahen Biên phòng ndrel n’gâng kan mât đăp mpăn, Cảnh sát Lào. Ntoh nau kơl an, rnơm ueh tehe ngăn bah rđau kan bah rmôt kan, đah rơh mom, njêng nau gay ăp rơh mom bah 2 rmôt geh tâm mâp, tâm n’ur, tâm nchră nau kan, nkre nkah nau ơm ueh, nau tâm n’ur bah tâm boh Việt Nam-Lào”.

Kruanh rmôt kan 2 ding tâm ban nau du đê̆ nkô̆ ndrel nau rƀŏng ăp nau kan khlay tâm rơh tât đah rmôt sĩ quan mom Tahen Biên phòng Việt Nam ndrel sĩ quan mom bah rmôt đăp mpăn, Cảnh sát Lào. Tâm nê, uănh khlay nau n’hao tâm nchră, tâm rgop, mât ƀư rjăp, ngăn ăp nau tâm ton ƀư nau mât n’har bri ndrel mpông n’har tâm neh kơh đah Chính phủ dak Việt Nam ndrel Chính phủ dak Lào; mât, nkân uănh nau luh, lăp, rlet hăn, gŭ bah ăp nŭih bah ăp dak, tâm rgop lơh, rdâng ân tam phung tih dôih, njêng nau đăp mpăn ndrel pơk trong nơih ueh ngăn ân ƀon lan ndrel ăp ntŭk kan tăch rgâl bah 2 dak hăn ro trong n’har bri, tâm boh hun hao văng sa, tâm n’ur nau ơm, tâm khâl băl mpôl.

Bah năp nê, rmôt hăn kan bah sĩ quan mom ƀư ăp nau kan tăm tơm si, pă prăk ân kon se ach o nti blau, nkoch mbơh, ntĭm pháp luật ân ƀon lan 2 ding n’har bri bah Kon Tum (Việt Nam) ndrel n’gor Attapư, ƀư tâm n’ur njroh mprơ, tâm rlong thể thao, hăn tâm uănh du đê̆ ntŭk pâl n’aih, nau vay ơm ăp rnoi tâm nkuăl ƀon têh Kon Tum./.