Jêh rlau 3 khay rlu nti, nchrăp năm nti mhe 2023-2024, mom Y Dũng, rnoi Bunong tâm ƀon Parpa, xã Thuận An, nkuăl Dak Mil lŏ leo săm ƀŭt, ndơ dŏng ndrel kho ao lăp tâm Đồn biên phòng Thuận An. Mom Dũng lah kon rong bah tahen biên phòng 4 năm ndrel geh cán bộ, tahen tâm aơ mât rong. Nchrăp năm nti mhe, mom Dũng gehj cán bộ, tahen Đồn Biên phòng Thuận An ntĭm tay nau nti jrâu 5 ndrel nchrăp nau blau mhe bah jrâu 6. Đah nau kơl an bah ăp Mbŏ rong grat ndrih, ndrel nau nsôih, tă bah kon se mô lăng blau, Dũng hŏ nti blau ndrel geh dơi kon se nti xuất sắc tâm 4 năm ma aơ:

 Kơp tât rnôk aơ gâp geh gŭ ma kônh tahen biên phòng 4 năm. Tâm 4 năm rlau aơ ăp kônh hŏ ân gâp sông sa, hăn nti ăp tŏng, ntĭm nti gâp ăp nar gay ma geh nau blau. Gâp mra nsôih nti ân blau gay ma mô ƀư ăp kônh wa biên phòng rngot rvê”.

Kŏ geh ăp nau blau đŏng jêh rnôk ndơn ƀư kon rong bah Đồn Biên phòng, mon Nông Tiến Mạnh, kon se nti jrâu 4A, Ngih săm ƀŭt Tiểu học Nguyễn Du, xã Đăk Wil, nkuăl Cư Jut, n’gor Dak Nông, ngơi:

‘Rnăk gâp geh nau rêh jêr ngăn, bŏ gâp geh nau ji play nuih bah ơm, mô dơi pah kan jâk, ăp nau kan ri me gâp ƀư da dê. Rnôk tăng lah gâp geh ăp kônh tâm Đồn biên phòng Nậm Na ndơn rong, me mbŏ gâp rhơn ngăn yor geh nŭih kơl an gâp sông sa hăn nti, kơl an rnăk gâp. Gŭ ma ăp tahen biên phòng ndrel ăp kônh, ăp wa biên phòng lah ngih tal 2 bah gâp. Lor ma lăp đah ăp kônh, gâp mô lăng janh ngơi, hăn nti kŏ mô lăng blau. Ntơm bah rnôk geh ndơn mât rong ndrel kơl an, bonh đă gâp hŏ blau âk lơn ngăn, nti kŏ geh nau blau bah 2 năm aơ gâp geh kon se nti loại blau’.

Wa Điểu Plơu, Groi Kruanh UBND Xã n’har bri Quảng Trực, nkuăl Tuy Đức, n’gor Dak Nông mbơh, ăp nau kan “kon rong đồn biên phòng”, “n’hao nhoat jâng oh hăn nti” bah tahen biên phòng kơl an âk ngăn ân ăp kon se geh nau rêh jêr jŏt geh nau dơi hăn nti. Ăp nau kơl an mpeh nuih n’hâm ndrel drăp ndơ hŏ kơl âk ngăn ân kon se nti blau, kơl rklaih nau jêr tâm nau kan ntĭm nti tâm xã n’har bri, nkuăl jru, nkuăl ngai:

“Xã Quảng Trực lah du xã nkuăl n’har bei nkuăl jru, nkual ngai, nkual rnoi mpôl đê̆. N’gâng kan rđau athen hŏ kơl an, kơl âk ngăn, ngăn lah ăp kon se geh n’hao nhoat jâng hăn nti lah ăp ngih ach o, nau rêh jể jŏt ngăn, rêh kon đơi, tahen biên phòng tâm rgop nsum đah n’gâng kan tâm nkuăl ueh ngăn. N’gâng kan hên dŭt n’hâm rhơn đŏng”.

Đah nau mĭn ƀư “pă play săm ƀŭt, pă nau rƀŏng” năm 2016, Rđau kan athen Biên phòng n’gor Dak Nông ƀư nau kan “N’hao nhoat jâng oh hăn nti” Năm 2019, biên phòng Dak Nông lŏ ƀư nau kan “Kon rong đồn Biên phòng”. Tât năm 2022-2023, rmôt kan ntrŭnh ƀư nau kan “Cán bộ, tahen Biên phòng n’hao nhoat jâng oh hăn nti”.

Đại tá Bùi Đức Chính, Groi Chính phủ Tahen Biên phòng n’gor Dak Nông mbơh, tât rnôk aơ, geh 222 kon se tâm 7 xã n’har bri bah n’gor Dak Nông ndrel 12 kon se tâm n’gor Mondulkiri, dak Campuchia geh tahen biên phòng Dak Nông kơl hăn nti. Rnoh prăk kơl an ăp kon se lah bơi tât 4,5 rmen, ntơm tơm prăk rgop bah lam rmôt tahen biên phòng Dak Nông. Đah nau kơl an bah cán bộ, tahen biên phòng, ăp kon se hŏ nsôih mô rlu rlet nau jêr, nau mô tŏng mpeh nuih n’hâm ndrel drăp ndơ gay jêng kon se blau. Âk kon se nti mô lăng blau jêng kon se nti blau ndrel kon se nti xuất sắc:

‘Bôk nau kan “N’hao nhoat jâng oh hăn nti-Kon rong tahen Biên phòng” ndrel nau kan “Cán bộ, tahen n’hao nhoat jâng oh hăn nti” lah rjăp nau ueh ngăn, nau tâm rnglăp tâm dăch nting mham đah cán bộ, tahen Đồn biên phòng ndrel kônh wa ăp rnoi tâm nkuăl n’har bri mô rlu n’hao nau mĭn tâm rnglăp jêng tahen ƀon lan, ndaka nau tâm boh tâm dăch nting mham đah tahen ndrel ƀon lan ăp rnoi tâm nkuăl n’har bri, rgop nau ƀư ang lơn nau rêh ndrel nau ơm “tahen Wa Hồ”, “Nŭih tahen grat ndrih” tâm rnôk rơh mhe”.

Jêh 7 năm, ăp bôk nau kan “N’hao nhoat jâng kon se hăn nti”, “Kon rong tahen Biên phòng” bah tahen biên phòng hŏ kơl an kon se âk nkuăl jru, nkual ngai n’gor Dak Nông geh nau dơi hăn nti ndrel hao blau lơn. Rup gui ăp tahen grat ndrih lơn ma geh nau khlay đah ăp nkuăl n’har bri hôm âk nau jêr./.