Vay geh tahen Biên phòng kơl an lah rnăk nô Rơ Mah Tíu ndrel yuh Tơ Lan Blớc, rnoi Jrai tâm ƀon Tung, xã Ia Nan, nkuăl Đức Cơ. Bar năm bah năp nơh, rnăk nô Tíu lah ngoai tâm ăp rnăk ach o, mô tŏng tơm prăk gay ma hun hao văng sa rnăk vâl. Nau geh jêng bah rnăk vâl nsing tâm nau hăn kan ân bu. Rnơm nau kơl an bah tahen Biên phòng Đồn Ia Nan ndrel n’gâng kan, rnăk nô rvăt ntil cà phê gay ma tăm 3 sào, geh ntĭm nti nau mât chăm, njrăng bu tuh. Tât rnôk aơ, 3 sào cà phê hŏ geh klih, ndrel ma 2 sào ba dak ndrel 8 sào cao su, hŏ leo ân rnăk vâl nau săk geh đăp mpăn nklăp 100 rkeh/năm:

            ‘Ăp kônh tahen kŏ kơt lah rmôt kan ndrel xã kŏ kơl an kơt lah nŭih tâm rnăk vâl, ntĭm koh n’ging, poh phân, rnôk aơ rnăk vâl geh văng sa đăp mpăn lơn, mât chăm ân oh kon geh hăn nti đăp mpăn, hơm răm”.

            Tĭng nau kơp bah xã Ia Nan, nkuăl Đức Cơ, xã aơ geh 1.951 rnăk, đah bơi tât 9000 nŭih. Xã geh 7/9 thôn ƀon geh tŏng nau dơi ƀon lan mhe. Rnoh rnăk ach o huch bah ăp năm ndrel dŭt năm 2023, xã hôm 100 rnăk ach o, geh 4,9% rnoh rnăk. Groi Kruanh UBND xã Ia Nan, Phạm Văn Thuỷ mbơh, tâm ăp năm rlau aơ, n’gâng kan ndrel rmôt tahen Biên phòng gŭ kan tâm nkuăl hŏ vay tâm kơl ndâk nau nchrăp, nau rƀŏng ntĭm mbơh kơl an ƀon lan hun hao văng sa, ndâk njêng ƀon lan mhe:

            “Ntơm bah nar geh cán bộ tâm ntŭk hên ƀư nau kan, ri ăp rnăk ƀon lan koư saơ geh nau dơi, ngăn lah lŏ dak kŏ kơt lah tơm tăm jŏ năm, cán bộ tahen biên phòng kơl an âk ngăn ndrel ntĭm nti nau kan đŏng, ngăn lah ăp rnăk geh tahen biên phòng tâm nkual kơl an ri ăp rnăk geh rklaih ach o, rlet rlau gay đăp mpăn tâm nau rêh”.

            Trung tá Lê Hồng Tuấn, Kruanh Đồn Biên phòng Ia Nan, nkuăl Đức Cơ mbơh, đah nau ŭch hăn nsum ma n’gâng kan tâm nkuăl kơl an bon lan hun hao văng sa, n’hao nau geh jêng, n’huch ach o nâp nâl ndrel aơ kŏ lah du nau kan khlay, ƀư mro bah tahen biên phòng gay đăp mpăn n’har bri, đăp mpăn chính trị, đăp mpăn nau rêh jêng tâm nkuăl n’har bri geh Đồn mât njrăng:

            ‘Ƀư tĭng bôk nau kan bah neh dak bah Đảng ndrel Ngih dak tâm nau ndâk njêng ƀon lan mhe, tâm ăp năm rlau aơ, rmôt kan đă 9 đồng chí đảng viên râng rƀŭn nsum tâm 9 chi bộ thôn ƀon bah xã Ia Nan, 15 đồng chí ƀư kơl an 158 rnăk. Hăn nsum ma bôk nau kan hun hao văng sa rêh jêng bah nkuăl, tâm ăp năm rlau aơ, Đảng uỷ, Rnâng kan rđau Đồn geh nau kí ton ma Đảng uỷ, UBND xã kơl an ƀon lan hun hao văng sa, jut n’huch ach o, ndâk njêng ƀon lan mhe gay nkuăl ăp nhoat hun hao mpeh văng sa rêh jêng, tŏng dơi nau mât đăp mpăn rnă njrăng tâm rnôk mhe”.

            Ndrel kơl an ƀon lan hun hao văng sa, tahen Biên phòng Gia Lai hôm geh âk nau kan, bôk nau kơl an tâm nau rêh. Tâm năm 2023, hŏ ndâk geh 13 ngih ân nŭih ach o tâm nkuăl n’har bri, mât kơl an 63 kon se tâm Bôk nau kan “N’hao nhoat jâng oh hăn nti” ndrel “Kon rong tahen biên phòng”... Tĭng Đại tá Nguyễn Văn Nghị, Groi chính uỷ tahen Biên phòng n’gor Gia Lai, rmôt kan lŏ ƀư ueh nau ntrŭnh, ntrong kan bah Đảng, Ngih dak mpeh nau ndâk njêng mât nkuăl n’har bri, ndâk njêng ƀon lan mhe ndrel n’huch ach o nâp nâl tâm nkuăl n’har bri:

            ‘Rnôk aơ tâm lam nkuăl n’har bri geh 3 nkuăl ndrel 7 xã, nau rêh bah kônh wa ƀon lan ta aơ mâp âk nau jêr ngăn. Gay ƀư ueh nau kan hun hao văng sa, văn hoá, rêh jêng, hên lŏ ntrŭnh tât cán bộ, tahen ăp đồn biên phòng ƀư ueh nau kan bah biên phòng tâm nau ntrŭnh ƀư, ăp nkô̆ nau geh tât nkuăl nê lah hun hao văng sa, văn hoá, rêh jêng, kơl an ƀon lan jut n’huch ach o. Phung hên mra đă 196 nŭih đảng viên kơl an rlau 800 rnăk vâl tâm nkuăl n’har bri”.

            Đah nuih n’hâm “Đồn lah ngih, nkuăl n’har bri lah ƀon tơm, kônh wa ăp rnoi lah oh nô ndul deh”, Tahen Biên phòng Gia Lai kơl an tâm rgop nsum đah n’gâng kan ăp gưl uỷ, đảng, n’gâng kan bah nkuăl kơl an ƀon lan tâm nkuăl n’har bri hun hao văng sa, rêh jêng. Rnơm nê, âk rnăk vâl rklaih ach o, rgâl nau rêh tâm nkuăl neh n’har bri hôm âk nau jêr./.