Mhe nơh, tâm xã Ia Chía, nkuăl Ia Grai, N’gâng kan rđau tahen Biên phòng n’gor Gia Lai ƀư nau pă nklâm ndơ, prăk, săm ƀŭt, ndơ dŏng nti tâm Bôk nau kan “Cán bộ tahen kơl nhoat jâng kon se hăn nti”. Ƀư bôk nau kan aơ, N’gâng kan rđau tahen Biên phòng n’gor Gia Lai hŏ ndơn mât bôk 193 kon se ntơm jrâu 1 tât jrâu 12 tâm xã n’har bri bah Gia Lai. Rơh aơ, ăp Đồn Biên phòng tâm n’har bri mra pă prăk ndrel ndơ ân kon se, geh 2 rkeh prăk măt rvăt săm ƀŭt, ndơ dŏng, kho ao lăp năm nti mhe ndrel 6 khay prăk sa. Rnoh prăk ƀư nau kan aơ rlau du rmen, rgop nau kơl an kon se tâm nkual n’har bri rklaih nau jêr. Yuh Nguyễn Thị Dung, gŭ tâm thôn beng, xã Ia Chía, kon păng geh bu pă ndơ, ngơi:

 ‘Lah ueh tahen biên phòng ndrel ăp gưl n’gâng kan geh nklâm ndơ khlay tâm n’har bri Ia Chía, ăp nklâm ndơ aơ khlay ngăn, kơl an hên bah oi nau jâk mpeh prăk tâm rnôk ân kon hăn nti”.

Bah năp nau rêh dŭt jêr bah kon se tâm 13 xã n’har bri, tahen Biên phòng Kon Tum hŏ kơl ảnlau 1,9 rmen kơl an kon se lăp tâm năm nti mhe 2023-2024”. Bôk năm nri mhe, N’gâng kan rđau tahen Biên phòng n’gor Kon Tum mbơh dĭng lĕ rnoh prăk bơi tât 2 rmen gay kơl an kon se geh nau rêh jêr jŏt tâm nkual n’har bri hŏ geh ăp rmôt hăn kan bah N’gâng kan rđau kan ndrel rmôt kan tâm dâng pă tât ăp kon se. Rnoh prăk aơ kơl an ân 253 kon se tâm Bôk nau kan “Cán bộ, tahen n’hao nhoat jâng hăn nti”.

Ăp oh kŏ geh nau rêh jêr jŏt mô geh ngih gŭ tâm 13 xã n’har bri tâm 4 nkuăl bah n’gor Kon Tum, geh: Đăk Hlei, Ngọc Hồi, Sa Thầy ndrel Ia H’Drai. Ndrel ma nê, 74 kon se nti, tâm nê geh 6 oh kon se tâm nkuăl n’har bri mpeh dak Lào ndrel Campuchia tâm bôk nau kan “N’hao nhoat jâng kon se hăn nti” geh N’gâng kan rđau tahen Biên phòng n’gor Kon Tum kơl an 110 rkeh.

Di rnôk năm nti mhe 2023-2024, ăp Đồn biên phòng tâm njok n’har tâm dăch ma Lào ndrel Campuchia trong rlet n’gor Kon Tum kŏ pă nklâm ndơ, ndơ dŏng nti ân 15 kon se lah “Kon rong tahen Biên phòng” bonh đă ăp kon se rnơm lơn gay ma lăp tâm năm nti mhe 2023-2024.

Đah nkô̆ nau “pă play săm ƀŭt, nkoch nau mpŏng ŭch” năm nti aơ, ăp Đồn Biên phòng tâm njok trong n’har bri bah n’gor Dak Nông lŏ ƀư bôk nau kan “N’hao nhoat jâng oh hăn nti”, Đại tá Bùi Đức Chính, Groi Chính uỷ N’gâng kan tahen Biên phòng n’gor Dak Nông mbơh, tât rnôk aơ, hŏ geh 22 kon se tâm 7 xã n’har bri bah n’gor Dak Nông ndrel 12 kon se bah n’gor Muldulkrri, dak Campuchia geh biên phòng Dak Nông kơl hăn nti. Rnoh prăk kơl an kon se hăn nti geh nau rêh jêr jŏt bơi tât 4,5 rmen tă bah nau rgop kơl an bah ăp rmôt tahen biên phòng Dak Nông. Đah nau kơl an bah ăp cán bộ tahen biên phòng, ăp kon se hŏ nsôih mô rlu gay rlet rlau ăp nau jêr, nau mô tŏng mpeh drăp ndơ ndrel nuih n’hâm gay jêng kon se gĭt nau, kon se blau nti. Âk kon se ntơm bah nau nti mô lăng dơi ndrel jêng nau nti blau ndrel kon se nti blau ngăn ngên:

‘Bôk nau kan “N’hao nhoat jâng oh hăn nti-Kon rong tahen Biên phòng” ndrel âk nau kan “Cán bộ, tahen n’hao nhoat jâng kon se hăn nti” lah rjăp nau ueh bah nau kơl an, nau tâm rnglăp tâm dăch nting mham đah cán bộ, tahen biên phòng đah kônh wa ăp rnoi mpôl tâm nkual n’har bri. Nkre lah, bah bôk nau kan hŏ kơl ntĭm nti ân ăp cán bộ tahen Biên phòng mô rlu n’hao nau mĭn tâm rnglăp njêng tahen ƀon lan, ndâk nau tâm rnglăp tâm njêng tâm dăch nting mham đah kônh wa ƀon lan ăp rnoi tâm nkuăl n’har bri, rgop nau ƀư ueh ang tay nau rêh ndrel nau vay om ‘Tahen Wa Hồ”, “Nŭih tahen drat ndrih” tâm rnôk mhe”.

Ăp bôk nau kan “N’hao nhoat jâng oh hăn nti”, “Kon rong tahen biên phòng” bah tahen biên phòng hŏ kơl an ân âk kon se tâm nkuăl n’har bri ăp n’gor n’har bah Tây Nguyên geh nau dơi hăn nti ndrel hao jêng. Rup gui bah ăp tahen drat ndrih lơn ma geh nau khlay đah nkual n’har bri mâp âk nau jêr. Ăp nau kan geh nau khlay ngăn ngên nê lơn ma ƀư rjăp tay nau tâm rnglăp nau rŏng bah “Tahen wa hồ” đah ƀon lan tâm ntrong n’har bri./.