Rlet rlau 400 km tă bah Hà Tĩnh, hăn tay 20 km trong bri, rmôt hăn kơl an bah kon se nti ơm ngih săm THPT 1993-1996 Hà Nội tât ƀon Phú Lâm, xã Phú Gia, nkuăl Hương Khê, nkuăl yok n’har bri hôm âk nau jêr bah Hà Tĩnh. Đah nau nthoi đah Đồn Biên phòng Phú Gia, rmôt kan hŏ leo âk ndơ dŏng ntĭm nti, kơt: tủ săm ƀŭt, tivi ndrel ma rhiăng ndrôm săm ƀŭt ndrel ndơ dŏng nti ân 2 ngih săm ƀŭt mầm non Phú Gia, ntuk kan tâm Phú Lâm ndrel Ngih săm ƀŭt tiểu học Phú Gia, ntŭk Phú Lâm. Nô Nguyễn Phan Giang, Kruanh Rnâng kan hăn kơl an, kon se nti ơm bah ngih săm ƀŭt TPTH năm nti 1993-1996 Hà Nội mbơh:

‘Dơi geh nau nsum ty tâm nthoi bah Đồn Biên phòng Phú Gia, phung hên hŏ geh âk nau kan ngăn. Ăp năm mro, bôk nau kan bah phung hên kuăl jă ngăch ngăn, tâm nklăp 10-15 nar lah tŏng prăk gay ma ƀư nau kan. Bah nau kan bah hên, phung hên ŭch ƀư rêng ueh nau kơl an kŏ kơt lah nau rêng ngăn tâm nau rêh. Jă bu tât ndơn ndơ mô di lah drăp ndơ khlay ma lah ndoh ndơ khlay mpeh nuih n’hâm”.

Bah năp nê, Rnâng kan kơl an bah Kon se nti ơm năm nti 1993-1996 kŏ njoăl prăk bơi tât 60 rkeh gay ma kơl an ngih săm ƀŭt mầm non Phú Gia ƀư ndơ nkŭm bah duh ndrel nkra mpông trong lăp nâp, kloh, ăp kon se hăn nti mô hôm duh hô. Ăp ntil ndơ aơ hŏ leo âk nau rhơn ân nai nti kon se tâm nkuăl hôm âk nau mô tŏng ntĭm nti. Nai Trần Đình Chung, nai ntĭm kon se tâm ngih săm ƀŭt tiểu học Phú Gia, ntŭk Phú Lâm, mbơh:

‘Rmôt tahen biên phong lah ntŭk kơl an âk ngăn ân thôn ndrel xã. Êng nau kan mât nkual n’har bri, mât đăp mpăn nkual n’har bri ri khân păng lah nŭuh ƀư săk tam ngăn nau kơl an ueh ân ƀon lan. Ăp ntŭk kơl an geh âk ndoh ndơ kơl kơt lah phôi ntâk, mŭng, ndeh vah jâng, quạt diện ndrel âk ndơ dŏng êng kơt dak ngi, phe...ngăn lah tâm rnôk tết, 27/7 kơl an âk ngăn ân nau rêh bah ƀon lan geh n’hao tay”.

Êp nau nthoi đah ntŭk kơl an, Đồn Biên phòng Phú Gia kŏ jă âk ntŭk kơl an ƀon lan tâm xã Phú Gia hun hao văng sa, ndâk njêng ƀon lan mhe ndrel ƀon lan mhe n’hao prêh, kơl ƀon lan n’hao lơn. Wa Lê Văn Hoè, Kruanh thôn Phú Lâm nkoch, cán bọ, tahen Đồn biên phòng Phú Gia mro kơl an ƀon lan, ngăn lah ăp rnăk mâp nau jêr, kon se ach o, rêh kon đơi.

Đah nau kan hun hao văng sa, Đồn Biên phòng Phú Gia ndâk nau kan kơl an rnakư jêr kơt rong djar, rong ndrôk, rong sur, tăm ăp ntil tơm geh văng sa prêh, kơt Cam, bŭng...Nkre đă cán bộ tahen ntĭm ƀon lan nau mât rong tuch tăm. Gay kơl an bu ur hun hao văng sa, mhe aơ, Đồn Biên phòng Phú Gia hŏ ntơm ndâk rmôt kan Bu ur ndrel tahen grat ndrih. Yuh Trần Thị Hợi, Kruanh mrot bu ur xã Phú Gia, tơm rmôt kan bu ur ndrel tahen grat ndrih, nkoch:

 ‘Nau kan bah rmôt bu ur Phú Gia kŏ kơt lah rmôt bu ur đah tahen grăt ndrih đah tahen Biên phòng ri ngăn ndrel săk tam, ueh đŏng. Ăp nau kan aơ kŏ kơl an ăp nŭih tâm rmôt, ăp nŭih hun hao văng sa. Êng nê, Đồn biên phòng kơl an bôk nau kan “me ndơn bôk” bah rmôt bu ur xã, ndơn mât bôk ân kon se rêh kon đơi geh nau rêh jêr jŏ tâm 3 năm du khay 300 rbăn”.

 Êng nau mât rlau 32 km trong n’har ndrel 7 n’gâng n’har bah neh dak nkaưl Việt-Lào, Đồn biên phòng Phú Gia hôm tâm rgop nsum ma gưl uỷ, rmôt kan ƀư ueh nau kan, hun hao văng sa, rêh jêng, mât nâp neh dak, nkuăl n’har bri, kơt: “hăn ndrel ma bu ur nkualư n’har bri”, “Kon rong tahen biên phòng”, “N’hao nhoat jâng oh hăn nti”, “Rmôt bu ur đah tahen grat ndrih”... rmôt kan nchrăp ndâk, uănh kloh rnôk, nkô̆ nau, nau kan, năn gĭt nau ŭch bah ƀon lan, ăp nhoat rklaih ach o, đăp mpăn nau rêh. Trung tá Nguyễn Đình Chuẩn, chính trị viên Groi Đồn Biên phòng Phú Gia mbơh, rmôt kan rgop ma rbăn nar kan, leo xã Phú Gia jêh lôch nau kan ƀon lan mhe 2018 ndrel ƀon lan mhe n’hao prêh năm 2022:

‘Bah ăp nau kan ƀư ngăn kơt nê, Đồn Biên phòng Phú Gia hŏ ndâk nau tâm boh tâm rnglăp, tâm dăch đah rmôt kan ndrel gưl uỷ n’gâng kan bah nkual, njêng nau rnơm ŭch bah kônh wa ƀon lan tâm nkual n’har bri, rgum dơi n’hâm dăng lam ƀon lan tâm nau râng mât nau đăp mpăn bah n’har bri neh dak, ndâk njêng nkuăl n’har bri đăp mpăn nâp nâl”.

Rup gui bah ăp tahen grat ndrih “mbung ngơi, ty pah” nkre nkoch trêng, bonh đă, nkre râng pah kan ndrel ƀon lan, ndâk njêng nkra ngih vâl ân ƀon lan...hŏ jêng nau tâm dăch ndrel lah ntŭk rnơm bah gưl uỷ Đảng, n’gâng kan ndrel kônh wa ăp rnoi ta aơ. Nŭih ƀon lan kŏ rnơm nê ma lơn ŭch rŏng, tâm dăch ndrel mra lah ăp “n’gâng rêh’ ndrel đah tahen biên phòng mât nâp nau ƀư ơm n’har bri bah neh dak./.